Kalistat OLT-mi ataatsimiinnermi peqataavoq

Nunat imarpinni  piffinnilu nunasiaataasimasut (OLT) ukiuni arlalinni naapinngereerlutik kiisami ukioq manna ataatsimiipput. Tamanna Noumeami Ny Kaledoniamiittumi pivoq  novemberip 17-anit 22-anut 2022. Nunalerinermut, Imminut Pilersornermut, Nukissiuuteqarnermut Avatangiisinullu Naalakkersuisoq Kalistat Lund Naalakkersuisut sinnerlugit ataatsimeeqataavoq. 

”Kalaallit Nunaat sinniisuuffigisinnaagakku, taamaalillungalu Nunarsuarmi suleqatigiinnermi EU-mi Kommissærimut Jutta Urpilainenimut soqutigisavut saqqummiussinnaagakkit nuannaarutigaara. 2019-ili ataatsimoorluta naapikkatta aatsaat ataatsimoorluta naapeqqinnerput iluatsiffiulluarpoq, isummat ataatsimullu soqutigisatta OLT-eqativut peqatigalugit avitseqatigiissutigisinnaallugit periarfissaqaqqileratta pitsaavoq.” 

Nualluussuarmik nappaalaneq pissutigalugu OLT-it 2019-imili imminnut tikillutik ataatsimiissimanngillat. Ukiuni qaangiuttuni ukiumoortumik ataatsimiinnerit isiginnaarutikkut ingerlanneqartarput. 

”Aappaagu ministerit ataatsimiinnissaanni Kalaallit Nunaat aggersaasuussaaq, oqalliffinnilu assigiinngitsuni OLT-it sinniisuuffigisassallugit. Aappaagu ataatsimiinnissaq Bruxellesimi ingerlanneqarnissaa naatsorsuutigaarput”, Kalistat Lund oqarpoq.

Tuluit Nunaata EU-mit anereernerata kingorna nunarsuaq tamakkerlugu OLT-it maanna 13-iupput. Taakku tassaanerupput siornatigut nunasiaataasimasut, EU-mullu ilaasortaanngitsut, taamaattorli aaqqissuussaanikkut nunanik pingasuusunik EU-mullu ilaasortaasunik attaveqartut, nunallu taakku tassaapput Danmark, Holland aamma Frankrig. 

Ilaatigut 2021-miit 2027-mut Kalaallit Nunaat katillugit 1,7 mia. kr.nik isumaqatigiissuteqarsimavoq. Aningaasaliissutigineqartut 90 %-ii ilinniartitaanermut atorneqarput sinnerilu 10%-it ”minguitsumik ineriartornermik” taasamut, tassa ataavartumik nukissiuuteqarnermut, ilisimatusarnermut, silaannaap pissusaanut uumassusillillu assigiinngisitaarnerinut ineriartortitsinermi atorneqarput. 

EU Kommissionip OLT-illu akornanni suleqatigiissimaneq aningaasalersuinermullu tunngasortai ilanngullugit ukiumoortumik ataatsimeeqatigiinnermi killiffissioqatigiissutigineqartarpoq. Taamatuttaaq qulequttat ataatsimut soqutigisaqarfiusut oqaluuserineqartarput, tassani minguinnerusumut ikaarsaariarnissanut tunngasut ilanngullugit, tassungalu atatillugu Kalaallit Nunaata minguinnerulernissaq anguniarlugu politikkeqarnera pingaartitaallu Naalakkersuisumit Kalistat Lundimit saqqummiunneqarput. 

Taakku saniatigut OLT-ermiut akunnerminni suleqatigiinnertik aallaavigalugu nunat peqataasut ministerii iluminni ataatsimeeqatigiittarput. Suleqatigiiffimmi ulluinnarni OCTA-mik taaneqartartumi suleqatigiinnermi OLT-it Kommissionimut allanullu suleqatigiiffinnut tulluuttunut soqutigisatik pingaartitatillu saqqumilaartittarpaat. Ukiumoortumik ministerit ataatsimeeqatigiikkaangamik politikkikkut isumaqatigiissummik aammalu allaffissornikkut suliassanik isumaqatigiissummik aalajangiisarput, tassanilu ukiumi aggersumi sulinissami pingaartitat isumaqatigiissutigineqartarput, taamatullu suleqatigiiffimmut OCTA-mut siulersuisut katitigaanerat suliarineqartarluni. Ukiumoortumik ministerit ataatsimiinneranni politikkikkut aqutsisuusarpoq siulittaasoq, taannalu ataatsimiinnermut aggersaasuusarpoq. 

Annertunerusumik paasisaqarusukkuit Naalakkersuisup allattaa Manasse Berthelsen attavigineqarsinnaavoq uunga, e-mail mabr@nanoq.gl, oqarasuaat angallattagaq +299 54 68 88