Isummat pigiliutiinnakkat atorunnaarsitsigit – suiaassusinut tamanut

Aningaasaqarnermut Naligiissitaanermullu Naalakkersuisoq Naaja H. Nathanielsen-imit, Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen-imit, Isumaginninnermut, Suliffeqarnermut, Nunamullu Namminermut Naalakkersuisoq Jess Svane-mit aamma Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Peter Olsen-imit

Ullumikkut ulloq tassaavoq Angutit Ulluat ullumikkullu ullup malunnartinniarnerani naligiissitaaneq taamaallaat arnanut tunnganngitsoq erseqqissassallugu periarfissaqarpugut, kisiannili arnat angutillu assigiimmik periarfissaqarlutillu naligiissitaanissaannut tunngalluni.

Angutit Ulluat ukiut tamaasa 19. november nalliussineqartarpoq. 1999-imi atulersinneqarpoq Dr. Jerome Teelucksingh-imit ullorlu taanna atorlugu angutit peqqissusiat paasisitsissutigineqartarpoq angutillu inuiaqatigiinnut tunniuttagaannut tunngatinneqartarluni.

Ullumikkorpiaq nunatsinni anguterpassuit immikkut maluginiarneqarnissaat pingaartipparput. Arnatullimi aamma angutit qanoq ittuunissaannik isiginnittaatsinik angutit misigisaqartarput, taakkulu angujuminaatsinneqarsinnaasarput. Angutit naligiissitaannginnermik pissuteqartumik ajornartorsiutigisartagaat aappariinnermi, ilaqutariinnermi, ilinniartitaanermi peqqissutsimullu tunngasuni malunniuttarput. Statistikkimi tamakku ersarilluinnarput.

Arnanut sanilliullutik angutit ilinniagaqanngitsut suliffeqanngitsulluunniit amerlanerupput.
Arnanut sanilliullutik angutit angerlarsimaffeqanngitsut amerlanerupput.
Arnanut sanilliullutik angutit persuttaasartut amerlanerupput.
Arnanut sanilliullutik angutit imminut toquttartut amerlanerupput.

””Ilinniartitaanermi sumiluunniit arnat angutillu assigiinngitsorujussuarmik agguataarsimasut takuneqarsinnaavoq, angutit nukappiaqqallu ataatsimut isigalugu angusaat annikinnerusarput ilinniartunilu angutit ikinnerusarlutik. Pissutsit taamaattut suliassatut pingaartutut isigaakka aaqqinniarnissaannullu peqataarusuppunga”

Ilinniartitaanermut Naalakkersuisoq, Peter Olsen

Tassani ikiorneqarnissamik pisariaqartitsisoqarnera ersarippoq, inuiaqatigiittullu inuttullu ataasiakkaatut iliuuseqartariaqarnitsinnik ersersitsisuuvoq ikioqatigiinnissatsinnullu ataatsimoorluta suliaqartariaqarnitsinnik ersersitsisuulluni. 

”Angutiviup” qanoq ittuunissaanik ilimasunnerit tamanut atuuttutut ileraangata inuit ilaannut tamanna artornarsinnaasarpoq. Malikkuminaassinnaavoq, tamattami assigiinngilagut, misigissutsikkulli aamma artornarsinnaalluni ilimagineqartutut pisinnaanngikkaanni. Ima artornartigilersinnaavoq allaat ilaat suliffeerullutik, ilinniakkaminnik unitsitsillutik, angerlarsimaffeerullutik, persuttaasartunngorlutik ajornerpaamillu pisoqartillugu imminorlutik pisarlutik. Meerartaarnermi angutit sulinngiffeqarsinnaanerisa pitsanngoriarnerat siuariarneruvoq, taamaalillutillu angutit amerlanerusut angajoqqaatut akisussaaffimmik tiguseqataasinnaanngorlutik. 

Tamatta inoqatitsinnik pingaartitsinissatsinnik kaamaattuerusuppugut kiisalu arnat angutillu qanoq ittuunissaannik isummat allanngortinnissaannut sapiissuseqarnissatsinnik kaammattuerusulluta. Inuit angerlarfissaqanngitsut, suliffeqanngitsut anniarnerminnilu allanut tutsitsisartut ammut isigineqarunnaarnissaannut peqataagit. Naapitatta isigisattalu isikkui piinnarnagit inuit ataasiakkaat iliuuseqarfigitigit tamattalu kinaanitta piginissaanut inissaqartilluta. 

Tamattami naligiimmik naleqarpugut. Tamatta assigiinnik periarfissaqassaagut. Naligiissitaasoqassaarlu – angutaagaluaraanni arnaagaluaraanniluunniit. 

Angutit ulluanni pilluaritsi. 

Attavissaq:

Ivalu Nørreslet Rex (Finansdepartementet)
Toqq/direkte 34 66 84
irex@nanoq.gl