AtuartigukNaalakkersuisut suliffeqarnermut nalunaarusiaat 2021
Nassiussisuuvoq: Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik
Naalakkersuisut 2021-imi suliffeqarnermut atatillugu nalunaarusiaanni suliffeqarnerup iluani killiffik saqqummiunneqarpoq. Naalakkersuisut suliassaraat qularnaassallugu nunatsinni suliffeqarneq ilorraap tungaanut ineriartortinneqassasoq, siunissamut ungasinnerusumut aamma siunissamut qaninnerusumut.
Suliffeqarnermi unammilligassat annerpaat ilagaat ilinniarsimasunik sulisussanik amigaateqarneq. Unammilligassaq tamanna siunissami minnerulernavianngilaq. Siunissami inuit agguataarnerisa ineriartorneranik inuiaqatigiit katitsigaanerat allannguuteqartassaaq. Tamanna isumaqarpoq siunissami inuit sulisinnaasutut ukioqartut ikiliartornissaannik. Tamanna nammineq inunnut sulisinnaasunut annertuumik piumasaqaateqassaaq. Sulisinnaasut piginnaaneqarluartut amerlanerulersinneratigut periarfissaqarpoq inuit agguataarnerisa ineriartornerata kingunerisaanik sunniutaasussat annikinnerulersinnissaat. Taamaattumik sutigut tamatigut pissutissaqarpugut kinguaariit tulliuttut sapinngisamik pitsaanerpaanik ilinniagaqartarnissaannik tapersersussallugit.
”Nunatsinni inuiaqatigiit atugarissaartut ataqatigiissumik ineriartorsinnaaqqullugit pingaaruteqarpoq inuiaqatigiinni suli amerlanerusut ilinniarluarsimasuunissaat suliffeqarnermilu eqeersimaartumik ingerlatseqataanissaat. Siunissami suliffeqarnermi piumasaqaataasut suli annertusiartuinnartumik immikkut ilisimasaqarnermik piumasaqarfiuleriartussapput, inuillu silatuut aamma assassullaqqissut atorfissaqartinneqarlutik pisariaqartinneqaleriartussapput. Taamaattumik inuiaqatigiittut innuttaasut tapersersortariaqarpagut, pingaartumik inuusuttut ilinniakkaminnik naammassinnittarnissaanni pitsaanerpaamik periarfissinnissaannik. Tamannami inunnut pineqartunuinnaq nuannaarutaassanngimmat, kisianni ataatsimut isigalugu inuiaqatigiinnut iluaqutaasussaammat” – taama oqaaseqarpoq Jess Svane, Isumaginninnermut, Suliffeqarnermut Nunamullu Namminermut Naalakkersuisoq.
Naak ilinniagaqarnermi qaffasissuseq sulisinnaasut akornanni qaffakkiartoraluartoq suli ilinniagaqartartut ikippallaaqaat. Naalakkersuisut nalunngilaat ilinniagaqarneq suliffeqarnerlu imminnut atasuusut, taamaattumik produktionsskoletut ittut ilinniartitaanerit aallartinneqarnissaat suliniutigineqarpoq. Ingerlatsinerit taamaattut inuusuttunik nalinginnaasumik ilinniartitaanernik ingerlatsivinni malinnaaniarnikkut ajornartorsiuteqartartunut assigiinngisitaarnerusunik ilinniagaqarsinnaanermut periarfissiisussaapput. Ilinniarneq pisarpoq ilinniarfiit sannaviini sulinikkut, atuagarsornermik ilikkagassani nalinginnaasuni akoqartillugu, ilinniartut ataasiakkaat namminneq pisariaqartitsinerat malillugu. Taamatut aaqqissuussinikkut inuusuttut suli annerusumik ilinniartitaanermut aamma suliffeqalernissamut piumassuseqarnerulersarput. Naalakkersuisut inuusuttunik piginnaanngorsaasarneq immikkut ukkataraat, taamaattumik pikkorissartitsisarnerit suliffeqarnermi suliniutini tamani maanna ilaatinneqalerput.
Nalunaarusiaq uani aasinnaavat
Annertunerusumik paasisaqarniaruit attaveqarfigiuk naalakkersuisup allattaa Helene S. Pedersen e-mail: hspd@nanoq.gl imaluunniit oqarasuaat + 299 34 56 11