AtuartigukKitaani tikaagulliit suli pisarineqarsimanngitsut ilaannik umiatsiaararsortunut nuussineq aammalu paggatassiineq
Nassiussisuuvoq: Aalisarnermut Piniarnermullu Naalakkersuisoqarfik
Agguaassisartoqatigiit KNAPK-p kommunillu sinniisai tusarniaareersullu Naalakkersuisoq aalajangerpoq kitaani qamutilissortunut ukioq manna tikaagullittassiissutigineqartunit pisarinngitsuukkat ilaat umiatsiaararsortunut pisassiissutigineqassasut. Tamakkiisumik Kitaani tikaagullittassiissutinit pisarineqanngitsut 89-upput.
Naalakkersuisup aamma aalajangerpaa umiatsiaararsortunut tikaagullittassiissu-tigineqartunit pisarineqanngitsut 32-it, aamma qamutilissortunit pisarinngitsuukkat ilanngullugit katillugit 10-it, katillugit 42-it kitaani umiatsiaararsortunut pisassiissutigineqassasut. Taakku nungunnissaasa tungaannut piniarneqarsinnaapput imaluunniit ukioq manna oktobarip 31-annut piniarneqarsinnaallutik. Piniarneq oktobarip 8-iani aallartissinnaavoq.
Ittoqqortoormiini umiatsiaararsortunut tikaagullittassiissutigineqartunit pisarineqarsi-manngitsut marluk aqutsiveqarfimmi Tasiilami tikaagullittaasiissutigineqassapput. Taakku oktobarip qiteqqunnerani kommunip KNAPK-llu Ittoqqortoormiuni aamma Tasiilami immikkoortortaasa oqaloqatigiissutigereerpatigit piniarneqarsinnaapput.
Kommunit namminneerlutik tikaagullinniarnissap aallartinnissaa aalajangissavaat.
Pisat pillugit nalunaarutiginninnerit Naalakkersuisoqarfimmut kommunit allaffii aqqutigalugit piaartumik nalunaarutigineqassapput.
Sukumiinerusumik paasisaqarusukkaanni immikkut siunnersorti Masaana Dorph-imut Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: mado@nanoq.gl – tlf. nr. +299 34 53 44