AtuartigukNaleqarluartumik Qaqortumi takornariartitsineq pillugu isumasioqatigiinneq
Nassiussisuuvoq: Nunanut Allanut, Inuussutissarsiornermut Niuernermullu Naalakkersuisoqarfik
Nunanut Allanut, Inuussutissarsiornermut Niuernermullu Naalakkersuisoq Vivian Motzfeldt qaaqqusisutut ingerlatsisuuvoq takornariartitsisarneq pillugu Qaqortumi isumasioqatigiissitsinermi, sapaat 21. august, nunatta kujataanit tamaniit takornariartitsisarnermik ingerlatsisuusut peqataaffigisaannik.
Takornariartitsineq pillugu isumasioqatigiinnermi naapeqatigiinnermi siunertaavoq takornariartitsinermik inuussutissarsiortut tusarniaaviginissaat, Nunamut Tamarmut Atuuttumik Takornariartitsisarnermut Periusissialiornermut paasissutissanik katersinermut atatillugu, kiisalu inuussutissarsiortut isumaannik tusarniaanermi takornariartitsisarnermut inatsisissamik nutaamik ilusilersuinermut atatillugu.
”Uanga assut qujamasuutigaara inuussutissarsiornermik ingerlatsisut piumassuseq pigisaat takutinneqartoq, nuannaarutigalugillu paasisagut takornariartitsinermik inuussutissarsiortut unammilligassaat ineriartortitsinermili periarfissaat pillugit. Isumasioqatigiititsinermi oqallittoqarpoq apeqqutini pingaaruteqartuni, soorlu piffissamik takornariartitsiviusartumik sivitsuisinnaaneq aamma piginnaasatigut ineriartortitsineq pillugit. Tamatumalu saniatigut siunnersuuteqartoqarpoq inuussutissarsiummi atugassarititaasuni killiliussat pitsaanerulersinneqarsinnaaneri, immikkut isiginiarlugu najugaqavissut nunanit allaniit nunatsinnut tikeraartunit kaaviiaartitanit annertunerusunik pissarsiassaqarnissaat eqqarsaatigalugu. Aamma nuannaarutigaara peqataasut isumaqatigiissutigimmassuk pitsaanerusunik ersarinnerusunillu inatsisitigut atugassaqartitsisoqartariaqarnera, qularnaarisunik takornariartitsisarnerup annertusiartornissaanik aningaasatigullu kaaviiaartitsineruleriartornissaani najugaqavissut aningaasaliinnginnermi annertusiartortunik inerisaanermi ukiuni aggersuni iluanaarutissaqarneruleriartuaarnissaannik.”, taama oqarpoq Vivian Motzfeldt.
Vivian Motzfeldt-ip Qaqortumut tikeraarnerminut atatillugu naapippai Borgmester Stine Egede kommunimilu aningaasaqarnermut inuussutissarsiornermullu ataatsimiititaliaq, tassanilu oqaloqatigiissutigineqarlutik inuussutissarsiornikkut ineriartortitsineq nunattalu kujataani inuussutissarsiornermut attuumassutilinnik sammisat allat.
Ilanngullugulu aamma timmisartut mittarfissaannik sanaartorfiusoq pulaarneqarpoq, KAIR-ilu tassani peqqissaartumik suliniut pillugu ilisimatitsissuteqarluni, kingornagullu sanaartornermik aallartitsiviusoq Vivian Motzfeldt-imit alakkarterneqarluni.
Nunatta Kujataani angalaarneq naggaserneqarpoq Great Greenland pulaarnermik. Pisortaq Preben Møllerip oqaluttuarai unammilligassat atuuttuusut amernik pisiniartarnermi, qassaasarnermi nioqqutissiassanillu immikkuullarissunik nioqqutissiortarnermut atatillugu, aammalu puisit amiinit nioqqutissianik immikkuullarissunik nunatsinni namminermi nunanilu allani niueruteqarneq.
”Nunatta Kujataani angalaneq sutigut tamatigut naleqarluarpoq. Annertuunik paasissutissarsivigisannik ataatsimiinnerni amerlasuuni peqataavunga, taamaasillungalu assut qilanaaralugu nunatsinnik kaajallaallunga angalaarnerma ingerlaqqinnissaa, angallavissarpullu tulleq tassaasoq Nunatta Kangia.”, taama oqaaseqarpoq Vivian Motzfeldt.
Kaajallaalluni angalaneq ingerlanneqarpoq Visit Greenland-ip Pisortaa, Anne Nivíka Grødem peqatigalugu. Tamatumalu saniatigut Greenland Venture peqataavoq aningaasalersuisarnermi periarfissat pillugit paasissutissiisarnikkut.
Annertunerusunik paasissutissarsiumagaanni attavigineqarsinnaavoq Nunanut Allanut, Inuussutissarsiornermut Niuernermullu Naalakkersuisoqarfik ugguuna isiin@nanoq.gl imaluunniit Naalakkersuisup allattaa Arnaruluk Lundblad email: alun@nanoq.gl imaluunniit oqarasuaatikkut +299 34 56 82