Naalakkersuisoqarfik marlunnik immikkoortortaqarpoq, tassaasunik Aatsitassanut Inatsisillu Atuutsinneqarnerannut suliassaqarfiit. Immikkoortortat marluusut taakkua aatsitassanut inatsisillu atuutsinneqarnerannut suliassaqarfinni pingaarnertigut politikkimik, periusissianik, pilersaarusiornermik ataqatigiissaarinermillu ingerlatsinissaq akisussaaffigaat, aammalu suliassaqarfimmi nunatsinnut iluaqutaasumik pikkorissusilimmik sunniuteqarluartumillu aqutsisussaallutik. 

Naalakkersuisoqarfik Namminersorlutik Oqartussat qitiusumi allaffeqarfiata ilaagaa aammalu aatsitassanut suliassaqarfimmi pingaarnertigut pilersaarusiorneq isumagisaralugu, ilanngullugu Naalakkersuisoqarfik aatsitassarsiorluni ingerlatassat pillugit politikkikkut oqallinnernut tunngavissanik suliaqarnermi peqataasarpoq. Tamatuma saniatigut Naalakkersuisoqarfik aatsitassanut suliassaqarfiup iluani inatsisitigut akisussaasuuvoq.

Aatsitassanut Inatsisillu Atuutsinneqarnerannut Naalakkersuisoqarfik sisamanik immikkoortortaqarpoq, ilanngullugit atorfilittanut immikkoortortaqarfik, sullissinermut aningaasaqarnermullu immikkoortortaqarfik, ujarassiornermut immikkoortortaqarfik kiisalu inatsisit atuutsinneqarnerannut suliassaqarfimmut immikkoortortaqarfik. Aatsitassanut Ikummatissanullu Aqutsisoqarfik Naalakkersuisoqarfiup akisussaaffeqarfiisa ataanni immikkoortortaavoq.

Aatsitassanut suliassaqarfiup iluani suliassat nalinginnaasut ilaatigut tassaapput inatsisiliorneq aamma inatsisinik nassuiaaneq, oqartussat suliarinninnerannik isumaginninneq, akileraarusiisarnermut tunngasut, sillimmasiisarnermut tunngasut, royalty-nut ilusiliat il.il., aatsitassarsiornermut suliassanullu angisuunut tunngatillugu inuiaqatigiinni piujuartitsinissaq, nalinginnaasumik inuussutissarsiutinik siuarsaaneq aamma avammut nioqquteqarnissamut akuersissutit.

Inatsisit atuutsinneqarnerannut suliassaqarfimmi Naalakkersuisoqarfiup pinerluttulerinermut inatsisit eqqartuussisarnerlu pillugit inatsisit pillugit danskit oqartussaasui qanimut suleqatigai. Suleqatigiinnermi tassani siunertaavoq, Naalakkersuisut suliassaqarfimmut takorluugaannut pingaartitaannullu naapertuuttumik inatsisit atuutsinneqarnerannut suliassaqarfiup ineriartortinneqarnissaa.