AtuartigukNunanit allaniit Kalaallit Nunaannut takornariartoqartarnerata aningaasarsiornikkut sunniutigisai
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Assiliisoq: Aningaaq R. Carlsen, Visit Greenland
Visit Greenland, AECO, SIKUKI, Nalik Ventures, Air Greenland, KAIR aamma GrønlandsBANKEN tamanut saqqummiusseqqammerput nalunaarusiamik ‘Nunanit allanit Kalaallit Nunaannut takornariartoqartarnerata aningaasarsiornikkut sunniutai”, qulaajaasumik takornariartitsisarnerup nunatsinnut 2023-imi sunniutigisai pillugit.
Ukiuni amerlasuuni siullermeersumik maanna kisitsisinik paasissutissanik pingaaruteqartunik takornariartitsineq pillugu saqqummiussisoqarpoq. Soorlu kisitsisini takuneqarsinnaasoq takornariartitsineq nunatsinni aningaasaqarnitsinnut patajaatsunik tunniussaqartarpoq, avammullu niuerutigisatta pingajorarterutingajaanik annertussuseqarluni.
”Takornariartitsisarnerup nunatsinni aningaasarsiornitsinnut qanoq pingaaruteqartiginera pillugu nalunaarusiaq sakkussaavoq pitsassuaq, takornariartitsinerup qanoq annertutigisumik aningaasarsiornitsinnut suliffinnillu qanoq amerlatigisunik inuussutissarsiornermi tunniussaqartarneranik paasisaqarniarnermi. Ukiuni aggersuni takornariartitsisarnerup annertusiartortumik suliffissanik amerlanerusunik, akissarsianik pitsaanerusunik aningaasarsiornermillu pitsaanerusumik sumiiffinni suliffeqarfinnut tunniussaqartarnissaa naatsorsuutigaarput. Taamaattumillu nuannaarutissaavoq paasillugu takornariartitsineq nunatsinnut pitsaasunik annertuunillu sunniuteqartartoq, taamaasillunilu inuussutissarsiutit tassaniittut peqataaffigissallugit kajuminnartuullutik”, taama oqaaseqarpoq Naalakkersuisoq Naaja H. Nathanielsen
Takornariartitsinermi inuussutissarsiutit nukittuut atortussaqartinneqassapput tigussaasunik atorneqarsinnaasunillu paasissutissanik aammalu kisitsisinik, taamalu aalajangiisarnerit paasissutissanik tunngaveqarluartunik ingerlanneqartaqqullugit. Taamaattumik nalunaarusiami pineqartumi paasissutissat atorfissaqartinneqarluartut saqqummerput, ineriartortitseqqinnissami sakkussaalluartut.
Inuiaqatigiinnut piviusunik sunniutaasut uuttortarsinnaajumallugit, matumanilu aamma aningaasarsiornikkut iluanaarutaasut nunatsinni namminermi, Naalakkersuisut kissaatigaat nukittorsaavigissallugit takornariartitsinermut atatillugu naatsorsuusiortarnerit, taamaalu suliniummik aallartitsisoqarpoq ukiumoortumik naatsorsuusiortarnermi sunniutaasartut pillugit, aningaasat kaaviiaartinneqartartut, suliffissat pilersinneqartartut nunatsinnilu namminermi isertinneqartartut uuttorneqarsinnaalersikkumallugit, nunani tamalaani uuttuutit atorlugit.
Annertunerusunik paasisaqarumagaanni attavigineqarsinnaasoq pisortap tullia Flemming Birk, e-mail: febk@nanoq.gl
Naalakkersuisoqarfimmi pisortaaneq Jørgen T. Hammeken e-mail: joeh@nanoq.gl
Inuussutissarsiornermut, Niuernermut, Aatsitassanut, Inatsisit atuutinneqarnerannut aamma Naligiissitaanermut Naalakkersuisoqarfik. Email: isiin@nanoq.gl, oqarasuaat +299 34 50 00.