Sanaartugassami ’Ilulissani Mittarfiup allineqarnera’ ASN-imut nassuiaatip (Avatangiisinut Sunniutissanik Naliliinerup) tamanut ammasumik tusarniaassutigineqarnera.

Nassuiaat
Ilulissani maanna mittarfik 845 meterinik takissuseqarluni aamma 30 meterinik silissuseqarluni timmisartunit, Dash-8-nit annerusunit miffigineqarsinnaanngilaq. Taamaattumik mittarfiup 2.200 meterinut takissusilimmut aamma 45 meterinik silissusilimmut allineqarnissaa kissaatigineqarpoq. Taamatut alliliinerup kingunerisaanik timmisartut annerit (200-t missaat tikillugit ilaasoqarsinnaasut) mittarfimmik atuisinnaalissapput.

Maanna mittarfiup inissisimaffiani mittarfik allineqassaaq. Kisiannili mittarfissaq maanna mittarfiusumut naleqqiullugu avannamut kimmut, sinerissap tungaanut 150 meterinik nikingasumik sananeqassaaq. Maanna mittarfiusoq tallineqarsinnaanngilaq, mittarfiup takinerulernerani silaannartap akornuteqannginnissaanut piumasaqaatit annertusineqartussaammata. Maanna mittarfiusoq mittarfissap nutaap tungaanut timmisartumut aqqusinertut (taxivej) atorneqassaaq. Mittarfiup allineqarnissaata saniatigut aamma timmisartut annerit missinnaalernerisa aallartussanullu ilaasussat amerlinerisa kingunerisaannik terminalimi, garagemi, timmisartut unittarfianni il.il. inissaq annertunerusoq pisariaqartinneqalertussaavoq, taamaattumillu mittarfiup sananeqarnerata saniatigut aamma illunik sullissinermilu atortunik il.il. nutaanik sanasoqassaaq.

Innuttaasunik ataatsimiitsitsinissaq
Kalaallit Airports A/S atortut ilaasa avatangiisinut sunniutaannik nalilersuineq aamma avatangiisinik nakkutilliinermut akiliutit pillugit Namminersorlutik Oqartussat nalunaarutaat nr. 5, 27. marts 2013-meersoq naapertorlugu ASN-imut nassuiaat pillugu innuttaasunik ataatsimiititsisussaapput. Ilulissani innuttaasunik ataatsimiisitsinissaq pissaaq marlunngornermi 8. marts. Kalaallit Airports A/S ataatsimiititsinissamut najukkani tusagassiorfiit aqqutigalugit allagarsiissaaq, taamatullu piffissaliussaq sumiiffissarlu pillugit tassani paasissutissiisoqassaaq.

Tusarniaaneq
Kikkulluunniit suliamut soqutigisaqarsinnaasut tusarniaanermut akissuteqarnissamut kaammattorneqarput. Tusarniaaneq tamanut ammasumik ingerlanneqassaaq, aammalu ullormit tamanut ammasumik saqqummiunneqarfianiit sapaatit akunnerini arfineq pingasuni ingerlanneqassalluni.

Tusarniaanermi najoqqutassat ukununnga tunngasuupput:
- Ilulissani Mittarfiup allineqarnissaa, ASN-imut nassuiaat.
- Ilulissani Mittarfiup allineqarnissaa, teknikkimut tunngassuteqanngitsunik eqikkaaneq.
- Ilanngussaq 1: Ilulissani mittarfiup allineqarnissaanut kuutsitsisinnaanermut akuersissut pillugu paasissutissiineq.
- Ilanngussaq 2: Ilulissani naasunik uumasunillu misissuinermit nalunaarusiaq.
- Ilanngussaq 3: Ilulissani timmisartut nipiliornerat pillugu teknikkimut tunngasut pillugit allakkiaq.
- Ilanngussaq 4: Ilulissani mittarfiup allineqarnissaanut takussutissiinerit

Tusarniaanermut killissarititaasoq: Sisamanngorneq 5. april 2018, nal: 16:00.

Tusarniaanermi akissuteqaat uunga nassiunneqassaaq:

Pinngortitamut Avatangiisinullu Naalakkersuisoqarfik,
Postboks 1614
3900 Nuuk

Imaluunniit e-mail-ikkut: pan@nanoq.gl.

Tamanut ammasumik saqqummiunneqarpoq: Ulloq 8. februar 2018 nal.: 16:00.

Sammisaq:

Avatangiisit

Tusarniaanerup suunera:

Avatangiisinik nalilersuinerit

Naalakkersuisoqarfik:

Pinngortitamut Avatangiisinullu Naalakkersuisoqarfik

Saqqummiunneqarfia:

08 februari 16:00:00

Tusarniaanermi piffissaliussaq:

05 apriili 16:00:00

Tusarniaanermi akissutit uunga nassiuteqquneqarput:

pan@nanoq.gl