Sanaartugassami Nuummi Mittarfiup allineqarnera’ ASN-imut nassuiaatip (Avatangiisinut sunniutissanik Naliliinerup) tamanut ammasumik tusarniaassutigineqarnera

Nassuiaat

Nuummi maanna mittarfik 950 meterinik takissuseqarluni aamma 30 meterinik silissuseqarluni timmisartunit, Dash-8-nit annerusunit miffigineqarsinnaanngilaq. Taamaattumik mittarfiup 2.200 meterinut takissusilimmut aamma 45 meterinik silissusilimmut allineqarnissaa kissaatigineqarpoq. Taamatut alliliinerup kingunerisaanik timmisartut annerit Nuummi mittarfimmut toqqaannartumik missinnaalissapput.

Mittarfiup tallissutissaata inissisimaffissaanut maanna mittarfiusoq aallaavigineqassaaq, taamaattumillu mittarfiup tallissutissaa kujammut Qinngorput tikingajallugit tassanngaanniillu avannamut Nuup Kangerluata tungaanut takissuseqassaaq. Mittarfiup allineqarnissaata saniatigut aamma timmisartut annerit missinnaalernerisa aallartussanullu ilaasussat amerlinerisa kingunerisaannik terminalimi, garagemi, timmisartut unittarfianni il.il. inissaq annertunerusoq pisariaqartinneqartussaavoq, taamaattumillu mittarfiup sananeqarnerata saniatigut aamma illunik sullissinermilu atortunik ilaalu ilanngullugit nutaanik, mittarfiup ingerlanneqarneranut pisariaqartinneqartunik sanasoqassaaq.

Innuttaasunik ataatsimiitsitsinissaq

Kalaallit Airports A/S atortut ilaasa avatangiisinut sunniutaannik nalilersuineq aamma avatangiisinik nakkutilliinermut akiliutit pillugit Namminersorlutik Oqartussat nalunaarutaat nr. 5, 27. marts 2013-meersoq naapertorlugu ASN-imut nassuiaat pillugu innuttaasunik ataatsimiititsisussaapput. Innuttaasunut ataatsimiisitsineq ataasinngorneq 12. Marts ingerlanneqassaaq. Kalaallit Airports A/S-imiit ataatsimiititsinissamut piffissaliussaq sumiiffissarlu pillugu najukkani tusagassiorfiit aqqutigalugit allagarsiissaaq.

Tusarniaaneq

Kikkulluunniit suliamut soqutigisaqarsinnaasut tusarniaanermut akissuteqarnissamut kaammattorneqarput. Tusarniaaneq tamanut ammasumik ingerlanneqassaaq, aammalu ullormiit tamanut ammasumik saqqummiunneqarfimminiit sapaatit akunnerini arfineq pingasuni ingerlanneqassalluni.

Tusarniaanermi najoqqutassat uunga tunngasuupput:

  • Nuummi Mittarfiup allineqarnissaa, ASN-imut nassuiaat.
  • Nuummi Mittarfiup allineqarnissaa, teknikkitiguunngitsumik eqikkaaneq.
  • Ilanngussaq 1: Maangaannaq kuutsitsisinnaanermur akuersissut pillugu paasissutissat.
  • Ilanngussaq 2: Tunngavissatut nalunaarusiaq – naasut aamma uumasut.
  • Ilanngussaq 3: Timmisartut nipiliornerat pillugu teknikkikkut nalunaarusiaq
  • Ilanngussaq 4:  Nuummi mittarfiup allineqarnissaanut takussutissiinerit

Teknikkimut tunngatillugu nalunaarusiat allat, tusarniaanermut najoqqutassanut ilaatinneqanngitsut Kalaallit Airport A/S-imut attaveqarnikkut pissarsiarineqarsinnaapput.

Tusarniaanermut killissarititaasoq: Marlunngorneq 3. april 2018, nal: 16:00.

Tusarniaanermi akissuteqaat uunga nassiunneqassaaq:

 

Pinngortitamut Avatangiisinullu Naalakkersuisoqarfik,

Postboks 1614

3900 Nuuk

 

Imaluunniit e-mail-ikkut:

pan@nanoq.gl.

Tamanut ammasumik saqqummiunneqarpoq:

Ulloq 6. februar 2017 kl.: 16:00.

Sammisaq:

Avatangiisit

Tusarniaanerup suunera:

Avatangiisinik nalilersuinerit

Naalakkersuisoqarfik:

Pinngortitamut Avatangiisinullu Naalakkersuisoqarfik

Saqqummiunneqarfia:

06 februari 16:02:00

Tusarniaanermi piffissaliussaq:

03 apriili 16:00:00

Tusarniaanermi akissutit uunga nassiuteqquneqarput:

pan@nanoq.gl