Aningaasarsianit akileraarutit pillugit Inatsisartut inatsisaata allanngortinneqarnera pillugu Inatsisartut inatsisaat

Tusarniaaneq uunga siunnersuummut: Aningaasarsianit akileraarutit pillugit Inatsisartut inatsisaata allanngortinneqarnera pillugu Inatsisartut inatsisaat

Asasakka Tusarniaavigisat

Matumuuna inatsisissatut siunnersuummut missingiut qulaani taaneqartoq tusarniaatitut nassiunneqarpoq.

Oqaaseqaatit Aningaasaqarnermut Naalakkersuisoqarfiup kingusinnerpaamik tigoreersimassavai: ulloq 17. juli 2018

Inatsisissatut siunnersuummut oqaaseqaataasinnaasut uunga e-mailikkut nassiuteqquneqarput: oed@nanoq.gl kiisalu CC-lugu pnil@nanoq.gl

Tusarniaanittaaq tusarniaanerni www.Naalakkersuisut.gl-imi nassaarineqarsinnaavoq.

Siunnersuutip imarisai:

Aningaasarsianit akileraarutit pillugit Inatsisartut inatsisaannut allannguutinik arlalinnik siunnersuut imaqarpoq. Pingaarnertut imarisai makkuupput:

  • Umiatsiaaqqamik inuussutissarsiutigalugu aalisarnermi, umiatsiaaqqanut 6 meterinut ataallugulu takissusilinnut aquuteralannik pisinermi ingerlaannartumik nalikilliliisinnaanermut periarfissaq.
  • Pissarsianit akileraarutit, Kalaallit Nunaanni aningaaserivinni soraarnerussutisiaqarnissaq siunertaralugu aaqqiissutiniittumut imaluunniit Kalaallit Nunaanni soraarnerussutisiaqarnissamut aningaasaateqarfimmiittunut akilerneqartut utertinneqarnissaannut periarfissaq. Pissarsiat ingerlatseqatigiiffinniik Kalaallit Nunaanni angerlarsimaffeqartuneersuussapput.  
  • Sikumik imermillu avammut niuernissamut pisinnaatitaasut akileraannginnissaannut tunngavik, tamanna avammut niuernissaq siunertaralugu sikumik imermillu iluaquteqarnissaq pillugu Inatsisartut inatsisaat malillugu akuersissummik peqartoqarpat.
  • Ingerlatseqatigiiffiit il.il. Kalaallit Nunaanniittut akornanni nakkutigisamik nuussinerit nammineq nalunaarsornissaannut aamma uppernarsarnissaannut il.il. pisussaaffik.

 

Inussiarnersumik inuulluaqqusillunga 

Per Nielsen (Aningaasaqarnermut Naalakkersuisoqarfik)

Toqq/direkte 34 64 08

PNIL@nanoq.gl

Tusarniaanerup suunera:

Inatsisartut inatsisaat

Saqqummiunneqarfia:

13 juni 10:55:00

Tusarniaanermi piffissaliussaq:

17 juli 00:00:00

Tusarniaanermi akissutit uunga nassiuteqquneqarput:

oed@nanoq.gl kiisalu CC-lugu pnil@nanoq.gl