Attumi tatsimut imeqarfimmut nutaamut killeqarfissamik pilersitsinissamut siunnersuut

Matumuuna Pinngortitamut Avatangiisinullu Naalakkersuisoqarfiup Attumi imeqarfimmut killeqarfissaq nutaaq pillugu siunnersuut tusarniaassutigalugu nassiuppaa. Imeqarfimmut killeqarfissatut siunnersuutigineqartoq tatsip imeqarfissatut nutaatut siunnersuutigineqartup eqqaaniippoq.

Killeqarfissami tatsip inuit suliaqarnerannit mingutsitsinissamut illersorneqarnissaa siunertarineqarpoq, Nukissiorfiit taseq siunissami imermut imigassamut imeqarfissatut atorneqarnissaa kissaatigimmassuk. Imeqarfimmut killeqarfissatut siunnersuutigineqartoq nunap assingani ilanngunneqartumi takuneqarsinnaavoq, tassanilu aappaluttumik titarnilerlugu titartarneqarpoq.

Taseq imermut imigassamut imeqarfissatut siunnersuutigineqartoq atorneqalissappat, Nukissiorfiit Attumi erngup pitsaassusianik pitsaanerusumik nakkutilliisinnaalernissaq naatsorsuutigaat. Kisiannili tatsip imeqarfiup killeqarfilerneqarneranut peqatigitillugu imeqarfiup killeqarfiata iluani suliaasartut annikillisusssaapput.

Imeq mingutsinneqarnissamut illersorniarlugu Avatangiisinut Inatsimmi suliat, imeqarfiit killeqarfiisa iluini suliarineqaqqusaanngitsut allassimapput. Allattuiffimmi suliat uku allattorneqarput:

  • Assartuutinik motoorinik ingerlatilinnik atuineq.
  • Atortunik/sakkunik motoorinik ingerlatilinnik atuineq.
  • Illunik, aqqusinernik pisuinnaalluunnit aqquserninik sanaartorneq.
  • Illunik pioreersunik alliliineq.
  • Suliffeqarfinnik inuussutissarsiornermik ingerlataqarfiusunik, sullissivinnik assigisaannillu ingerlatsineq.
  • Uumasuuteqarneq.
  • Akuutissanik imermut mingutsitsisinnaasunik atuineq, assartuussineq uninngasuuteqarnerlu.
  • Suliat allat, erngup mingutsinneqarnissaanut ulorianartorsiortitsisinnaasut.
Matumuuna Naalakkersisoqarfiup imeqarfimmut killeqarfissamut nutaamut siunnersuut tamanut ammasumik tusarniaassutigineqartussanngorlugu nasssiuppaa, taamaalilluni kikkut tamarmik siunnersuummut oqaaseqaateqarnissamut periarfissinneqarlutik. Aamma siunnersuut Nukissiorfinnut, Nakorsaaneqarfimmut, Kommune Qeqertalimmut, Peqqissutsimut Naalakkersuisoqarfimmut, Aningaasaqarnermut Akileraartarnermullu Naalakkersuisoqarfimmut, Kalaallit Nunaanni Nersutaateqqarnermut Inuussutissalerinermullu Oqartussaasunut, Royal Greenlandimut, KNAPK-mut aamma Nuna tamakkerlugu Pilersaarusiornermut Immikkoortortaqartimmut nassiunneqarpoq.

Naalakkersuisoqarfik allakkatigut, oqarasuaatikkut e-mail-ikkullu oqaaseqaatinik tigusisinnaavoq. Naalakkersuisoqarfimmi attaveqarfissat tassaapput:

Najguaq:
Pinngortitamut Avatangiisinullu Naalakkersuisoqarfik
Imaneq 1A
Postboks 1614
3900 Nuuk

Oqarasuaat:
346727

E-mail:
nisa@nanoq.gl

Oqaaseqaatinik tunniussinissamut ulloq Juulip 19-ni 2018 killigitinneqarpoq.

Naalakkersuisoqarfimmiit erseqqissaatigineqassaaq, imeqarfimmut killeqarfissat sumiiffimmut erngup tatsimut imermut imigassamut imeqarfissatut erngup kuuffigisaanut tamarmiusumut illersuiffiusussanngorlugu aalajangersarneqarmat. Taamaattumik tunngaviusumik killeqarfissap siunnersuutigineqartumit minnerulersinneqarnissaa ajornarpoq.

Aamma Naalakkersuisoqarfimmiit erseqqissaatigineqassaaq, tusarniaanermi taamaallaat tatsip imermut imigassamut imeqarfissatut siunnersuutigineqartup eqqaani imeqarfimmut killeqarfiliinissaq kisimi pineqarmat. Tusarniaanerup matuma naammassereernerani Naalakkersuisut imeqarfimmut killeqarfimmik pilersitsissappata, tamatuma kingorna Nukissiorfiit tatsimit imermut imigassamut imeqarfissatut siunnersuutigineqartumiit Attumi imermik imigassamik pilersuinermut atuinissamut qinnuteqaammik nassiussisussaassapput.

Nukissiorfiit tatsimik atuinissamut akuersissummik taamaattumik tunineqassappata, siunissami Attumi imermik imigassamik pilersuineq tatsimit imermut imigassamut imeqarfimmit ingerlanneqartussaavoq. Kisianili Attumi taseq imermut imigassamut imeqarfik pioreersoq imermut imigassamut imeqarfittut suli atuutissaaq, tassungalu killeqarfik pioreersoq atorneqaannassalluni. Tamatuma kingunerisaanik Attumi imermik pilersuinermi isumannaassuseq annertusissaaq, taseq imermut imigassamut imeqarfik pioreersoq saniatigut tatsitut imermut imigassamut imeqarfittut sillimmataassammat.

Kommunalbestyrelsi imeqarfinnut killeqarfinnik nakkutilliinermi oqartussaasuuvoq. Tatsit imermut imigassamut imeqarfiit mingutsinneqannginnissaat qulakkeerniarlugu, imeqarfiit killeqarfiini unioqqutitsilluni suliaqartoqannginnissaa kommunalbestyrelsip nakkutigisussaavaa. Imeqarfimmut killeqarfiit iluanni inerteqqutaasunik suliaqartoqarpat, kommunalbestyrelsi ilaatigut innuttaasunut peqqussuteqarsinnaavoq inerteqquteqarsinnaallunilu.

Naalakkersuisoqarfik:

Pinngortitamut Avatangiisinullu Naalakkersuisoqarfik

Saqqummiunneqarfia:

07 juni 00:00:00

Tusarniaanermi piffissaliussaq:

19 juli 00:00:00

Tusarniaanermi akissutit uunga nassiuteqquneqarput:

nisa@nanoq.gl