Ilanngussaq 8: Nunanut allanut sillimaniarnermullu suleqatigiissitaq

Suliassiissut
Namminersorneq pillugu Isumalioqatigiissitamut suliassarititani 2000-imi januaarip ulluisa arfineq-aappaanneersuni allassimavoq:
"Isumalioqatigiissitat Kalaallit Nunaata nunanut allanut sillimaniarnermullu oqartussaassuseqarnerata, inissisimanerata iliuuseqarsinnaaneratalu ineriartortinneqarsinnaanera misissussavaat. Tamatumunnga ilanngullugu:
- nunatta nunarsuarmi sumiinnera aallaavigalugu sillimaniarnikkut inissisimanera isumaliutigineqassaaq tamatumanilu Kalaallit Nunaata soqutigisaasa pitsaanerpaamik illersorneqarsinnaanerat ilanngunneqassallutik,
- nunatta nunat tamalaat akornanni nammineerluni sinniisoqarsinnaanerata pisariaqartinneqarnera tamatumunngalu periarfissat misissorneqassapput, ullumikkut nunatta sinniisaasa naalagaaffiup Danmarkip aallartitaanut ilaallutik peqataasarnerinut taarsiullugu, tamatumunnga ilanngullugu Europarådimi susassaqarfinnilu taassuma ataaniittuni nammineerluni sinniisoqartitsinissaq pisariaqartinneqarnersoq periarfissaqarnersorlu.
- Isumalioqatigiissitat qinnuigineqarput nunatta killeqarfiisa illersorneqarneranni aalisarnermillu nakkutilliinermi nunatsinni najugallit peqataasinnaanerat misissoqqullugu isummersorfigeqqullugulu.
- Isumalioqatigiissitat Namminersornerulluni Oqartussaaneq pillugu inatsimmut, inatsisinut pisinnaatitsissutinut atuuttunut kiisalu naalagaaffiup Namminersornerullutillu Oqartussat akornanni ingerlatsineq pillugu taaneqartunullu sinaakkusiussanik isumaqatigiissutinut allannguutissanik siunnersuuteqarsinnaatitaapput.
Isumalioqatigiissitat nunanut allanut sillimaniarnermullu tunngassutilinnik suliaqarnerminni ataatsimiititaliap "Annoraaq"-mik taagorneqartup nalunaarusiaa tunngavigissavaat."
Tamatuma saniatigut suleqatigiissitap allaaserissavaa 1979-ip kingornatigut Kalaallit Nunaata nunanut allanut sillimaniarnermullu soqutigisaasa ingerlanneqarnerisa ineriartornerat.
Suleqatigissiitap misissussavaa suliaqarfiit sorliit aamma aaqqissuussinerit isumaqatigiissutillu pioreersut sorliit tungaasigut allannguutissanik pisariaqartitsisoqarnersoq imaluunniit kissaateqartoqarnersoq. Ilanngullugu suleqatigiissitap misissussavaa allannguutaasinnaasut qanoq kinguneqarsinnaanersut Kalaallit Nunaata nunanut allanut sillimaniarnermullu soqutigisaasa ingerlanneqarnerata aamma naalagaaffiup Namminersornerullutillu Oqartussat akornanni apeqqutit oqartussaassuseqarnermut suliassanillu isumaginnittussanngortitaqarnermut tunngasut tungaasigut.
Suleqatigiissitaq suliassaqarfimmi iluani periarfissanik nalunaarsuissaaq Isumalioqatigiissitamut suliassarititatut nalunaarsukkani anguniagassat pingaarnerit anguneqarsinnaaqqullugit.
Naggataatigut suleqatigiissitaq periarfissat nalunaarsukkat tunngavigalugit inassuteqassaaq Isumalioqatigiissitap inaarutaasumik isumaliutissiissutissaani nalunaarsukkanit suut salliutinniarneqassanersut.
Isumalioqatigiissitanut nalunaartarneq
Suleqatigiissitaq Isumalioqatigiissitap ataatsimiinnissai tamaasa suliaminut killiffiit pillugit nalunaarusiortassaaq, apeqqutinillu Isumalioqatigiissitap tamarmiusup isumaliutigisassaanik isummerfigisassaanillu saqqummiussisassalluni. Suleqatigiissitaq Isumalioqatigiissitap ataatsimiinnissai tamaasa sivikinnerpaamik sapaatip akunnerinik marlunnik sioqqullugit Allattoqarfik aqqutigalugu Isumalioqatigiissitap ataatsimiinnissaanut soqutiginaatilittut isigineqartunik nassiussisassaaq.