Anthon Frederiksenip Københavnimi Sundholm pulaarpaa

Qallunaat Nunaanni kalaallit amerlavallaat sanngiitsutut inissisimapput pisariaqartitaminnik avatagiiseqaratik Qallunaat Nunaannilu pissutsinut pisariaqartin-neqartunut tamakkiisumik ilisimasaqaratik najugaqartuupput. Ajoraluartumik innuttaasut sanngiinnerusut Sundholmimut pisarput, angerlarsimaffeqanngitsunut sanngiinnerusunut atornerluinermillu ajornartorsiuteqartunut najugaqarfiusumut.

Anthon Frederiksenip tallimanngormat 6. juli Sundholmi, kalaallinik innuttaasunik amerlasuunik isumaginniffiusoq pulaarpaa. ”Alianarpoq sanngiinnerusumik inissisimasut kalaallit innuttavut taama amerlatigisut, Qallunaat Nunaanni pissutsinut ilisimasaqarpiaratik, angerlarsimaffeerullutik atornerluinermillu ajornartorsiutilittut inissittartut takullugit. Arlallit Sundholmimut inissikkaangamik amerlanerit illorraap tungaanut ingerlariaqqinngisaannangajattarput, ajoraluartumillu ilai nakkaattuuis-sortarlutik”.

Anthon Frederiksen nangippoq: ”Sundholm kalaallinut sanngiinnerusunut annertuumik sulissutiginnippoq. Pisariartinneqarporli erseqqissaassuteqarnerunissaq, Qallunaat Nunaannut nuunnerup inunnut taamatut inissisimasunut iluatsitsiviunngittoortarnera pillugu, angerlarsimaffimmimi ajornartorsiutit qaangerneqarsin-naanerat angujuminaammat pissutsinut ilisimasaqariinngikkanni, saaffissarissaanngikkaanni aningaasaateqanngikkaannilu. Naalakkersuisut kommunellu innuttanut sanngiinnerusunut inuunerminni ajornartorsiuteqalersimasunut pitsaanerusumik ikiorsiisinnaasariaqarput, kukkusumik alloriannginnissaat anguniarlugu, ajornartorsiutinimmi anginerulersitsiinnarsinnaammata. Pisariaqartinneqarpoq ajornannginnerusumik ikiorsiisarnissaq siunnersuisarnissarlu, kommunellu ujartuinerusariaqarput suliniuteqarnerminni”.

Sundholmi Amagerimi Københavnimiittumi angerlarsimaffeqanngitsunut unnu-isarfiuvoq, nakorsiarfigineqarsinnaasumik, cafeqarluni, unnuisarfeqarluni, sammissassaqartitsiveqarluni innuttaasunullu sanngiinnerusunut angerlarsimaffeqarluni paaqqinniffiusumik. 40-50 pct. kalaallinit najugaqarfigineqarpoq.

Paasisaqarnerorusukkuit attavigiuk Naalakkersuisumut allatsi: Judith K. Nielsen, mobil +299 530627.
Mail: judi@nanoq.gl