Qimminik qitsunnillu nunatsinnut eqqussisarneq

Qimminik qitsunnillu nunatsinnut eqqussisarneq taakkulu Kalaallit Nunaanni namminermi angallanneqartarneri

Kalaallit qimmii qimuttut illersorniarlugit qitsunnillu nunatsinnut eqqussisarneq taakkulu Kalaallit Nunaanni namminermi angallanneqartarnerinut maleruagassat matumuuna Kalaallit Nunaanni Uumasut Nakorsaqarfik Inuussutissalerinermullu Oqartussaaffimmit (UNIO) eqqaasitsissutigineqarput.
Qimminik qimuttoqarfiusunut qimminik eqqussinissaq inerteqqutaavoq, Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaat nr. 18, 30. oktober 1998-imeersumi § 19, imm. 2 naapertorlugu. Qimmilli sulinermi kiisalu innarluutilinnit ikiortitut atorneqartartut qimmeqarfinnut eqqunneqarsinnaapput, tamannali aatsaat pisinnaalluni Namminersorlutik Oqartussat immikkut akuersissuteqarneratigut. Qimmit sulinermi atorneqartartut tassaapput qimmit politiit ilanngaaserisulluunniit sulinerminnut atatillugu atortagaat.

Qimmit qimuttut Kalaallit Nunaanniit annissat qimminik qimuttoqarfiusut iluinut avataannulluunniit eqquteqqeqqusaanngillat.
Qimminik qimuttunik qimmeqarfiit ima nassuiarneqarsimapput:
  • Kalaallit Nunaata Avannaa Kitaalu allorniusat sanimukartut 66°-imit (qaasuitsup killeqarfia) avannamut, kiisalu
  • Kalaallit Nunaata Kangia tamarmi kujammut Nunap Isua tikillugu, allorniusat tukimukartut 44° kangia.
Kalaallit qimmii qimuttut kisimik qimuttoqarfinniissinnaatitaapput qimmillu allatut nagguillit qimmeqarfinnut nassarsinnaanissaat inerteqqutaalluinnarluni. Tassani pineqarput qimmit takornarianit soorlu umiarsuit takornariartaatsit atorlugit nassarneqartartut kiisalu najukkani ataasiakkaani qimmiutigisat nunatsinni namminermi angalanermi nassarneqartartut.
Qimmimik qitsummilluunniit nunanit allanit najukkanut qimmuttoqarfiit avataaniittunut eqqussisoqassatillugu, Kalaallit Nunaata Danmarkimi Allartitaqarfianit allakkatigut akuersissummik pissarsiniartoqaqqaartoqartarpoq. Danmarkimi Kalaallit Nunaata Sinniisoqarfia paasissutissat tullinnguuttumi saqqummiunneqartut tigoreeraangamigit eqqussinissamut akuersissummik tunniussisarpoq:
a. Uumasup akiuussutissanik kapineqannginnerani ataavartussamik ID-nalunaaqutsersimaneranut (soorlu mikrochip-imik) uppernarsaat.
b. Perlerornaveersaammik kapineqarsimaneranik uppernarsaat. Ulloq eqqussivissaq nallertinnagu qimmeq sivikinnerpaamik ulluni 30-ini sivisunerpaamillu ulluni 365-ini perlerornaveersaamik kapineqareersimassaaq.
Qimmiaqqat qaammatit pingasut inorlugit utoqqaassusillit eqqunneqannginnerminni perlerornaveersaamik kapineqarsimanissaat pisariaqanngilaq, qimmiaqqat arnaat siuliani allassimasut naapertorlugit maleruagassallu malillugit kapineqareersimatillugu. Taamaattoqassappat uumasup anaanaasup akiuussutissinneqarsimanermut uppernarsaataa takutinneqartassaaq.
c. Qimmit nappaataanut Parvovirus-imullu (tunngaviusumik akiuussutissiisarnissat aallartissimatillugit) akiuussutissamik kapineqarsimaneranut uppernarsaatit (qimminut tunngatillugu kisimi atuutsinneqarpoq). Qimmiaqqat qaammatit pingasut inorlugit utoqqaassusillit qimmit nappaataannut aamma parvovirus-imik tunillanneqarsinnaanermut akiuussutissinneqarsimanatik eqqunneqarsinnaapput, anaanarisaat maleruagassat naapertorlugit akiuussutissinneqartarsimappat takuuk qulaani allassimasoq. Taamaattoqassappat uumasup anaanaasup akiuussutissinneqarsimanermut uppernarsaataa takutinneqartassaaq.
d. Uumasup peqqissusaanut uppernarsaat uumasut nakorsaanit akuerisaasumit atsiorneqarlunilu ullulerneqarsimasoq. Peqqissutsimut uppernarsaat uumasup ulloq eqquunneqarfissaa eqqarsaatigalugu ullunik 14-inik pisoqaanerussanngilaq.
e. Uumasut nakorsaanit akuerisaasumit oqaaseqaat (uumasup peqqissusaanut uppernarsaammut ilanngunneqarsinnaasoq) tassani uppernarsarneqassaaq uumasoq terianniat qumaanik nappaateqalersinnaanissaanut (Ecchinococcus multilocularis) akiuussutissamik ulloq eqqussiffiusussaq ulluni 14-ini sioqqutsilluni katsorsarneqarsimasoq. Uumasoq erlavimmi qumaqalersinnaanissamut katsorsarneqarsimasut aallarunneqarnissami tungaanut uumasunit allanit pallinneqarsinnaajunnaarlugu immikkoortinneqassaaq.
f. Uumasup kommunerisamut eqqunneqarfissaminut Kalaallit Nunaanni kommunimit pigineqarsinnaanissaanut akuersissut.
Kalaallit Nunaata Sinniisoqarfia e-mail una aqqutigalugu: journal@ghsdk.dk attavigineqarsinnaavoq.
Qimmimik/qitsummik kommunimut pigineqarsinnaanissamut tunngatillugu apeqqutit qinnuteqaallu emailadresse-mut ataani allassimasumut nassiunneqarsinnaapput:
  • Kommune Kujalleq: kommune@kujalleq.gl
  • Kommuneqarfik Sermersooq: kommuneqarfik@sermersooq.gl
  • Qeqqata Kommunia: qeqqata@qeqqata.gl
  • Kommune Qeqertalik: qeqertalik@qeqertalik.gl
  • Avannaata Kommunia: avannaata@avannaata.gl
Maluginiarneqassaaq qimmimik qitsummilluunniit pigineqarsinnaanissamut tunngatillugu kommuni eqqussiviusussaq uumasumut eqqunneqartussamut tunngatillugu allanik piumasaqaateqarsinnaammat, soorlu uumasut arnavissat kinguaasiorsinnaajunnaartinneqarsimanissaannik piumasaqaateqarsinnaammata.

UNIO-mit erseqqissaatigineqarpoq qimmimik qitsummilluunniit nunatsinni namminermi kommunerisamit kommunimut allamut nuunnermi qimmimik qitsummilluunniit pigisaqarsinnaanissamik qinnuteqartartussaammattaaq.

Apeqqutissaqartoqartillugu Kalaallit Nunaanni Uumasut Nakorsaqarfik Inuussutissalerinermullu Oqartussanut uumasut@nanoq.gl-imut imaluunniit 34 50 00-imut ammasarfiata iluani, tassa ataasinngorneq, marlunngorneq, sisamanngorneq tallimanngornerlu nal. 9.00-imiik 15.00-ip tungaanut saaffiginnittoqarsinnaavoq.