Ilulissani Kangiata Illorsua ukiumik ataatsimik kinguartoorpoq

Ukiumut matumunnga taarsiullugu Ilulissani Kangiata Illorsuata sanaartornissaa 2019-imut upernaamut kinguartinnissaa illuliassamut suleqatigiit aalajangiussimavaat. Naatsorsuutigisamut naleqqiullugu suliniummik iluarsaassinerit, kiisalu illuliassamik pisariusinnaasumik annikitsortalersukkatut titartaanerit naatsorsuinerillu sivisunerusimapput, soorlulusooq ukioq manna illup napatitsisutut sisannik ilusissaanik sanaartortoqarlunilu ikkussugassanngorlugit nassiunneqarsinnaasimanatik. Taamaattumik Kangiata Illorsuata 2021-mi ukiakkut atoqqaarfissiortinnissaata piareernissaa maannakkut naatsorsuutigineqarpoq.

Ilulissani Kangiata Illorsuata sanaartorneranik ingerlatassanik siullernik KJ Greenlandimit suliffeqarfittut suliniummut pingaarnertut suliaqartussamit, sanaartornissaq 2019-mi aallartinneqassaaq.

Illuliornerup aallartinnissaanik kinguartitsineq suliniutip ilusilersugaanera suli eqqornerusumik aaqqinnissaanut suleqatinut peqataasunut, siunnersuisartunut, suliffeqarfiutilinnut atortussiortunullu periarfissiissaaq. Ilulissani Kangiata Illorsuaq Namminersorlutik Oqartussat aamma Avannaata Kommunianik suleqateqarluni Realdaniamit sanaartorneqarpoq – aammalu illumi saqqummersitanut paasisitsiniaanermullu Nordea-fondenimit tapiissuteqartoqarluni. Realdaniap suliffeqarfiutaa Realdania By & Byg tassaavoq Kangiata Illorsuanik sanaartortitsisoq.
Inuussutissarsiornermut Nukissiuuteqarnermullu Naalakkersuisoq Aqqalu Jerimiassen oqarpoq:
”Soorunami kinguartoorneq ugguaraarput, illumulli naatsorsuutigisatsinnut, aammalu siunissami Kalaallit Nunaanni takornariaqarnermut Kangiata Illorsuata ilorraap tungaanut sunniutaanik tunngaviusumik tamanna allannguissanngilaq.”

Avannaata Kommuniani borgmesteri Palle Jerimiassen oqarpoq:
”Sumiiffimmut Kangiata Illorsua assorsuaq sunniuteqassaaq – aamma suliffissaqartitsineq eqqarsaatigalugu. Kinguartoorneq akorngutitut annikitsutut uggornartutut isigaarput, kommunilli anguniagaq tunaartaraa: Tassalu, Kangiata Illorsua sanallugu naammassineqassasoq”.

Realdania By & Byg-imi pisortaaneq Peter Cederfeld oqarpoq:
”Ilulissani Kangiata Illorsua illulioriaaseqarnermi pisariusutut unammillerfiusussamillu iluseqarpoq. Qaasuitsullu killeqarfiata avannaani sanaartortoqarneq tamatigut silap pissusia pissutigalugu tamanna aarlerinartoqarfiullunilu ukiup ilaa sanaartorfissaq sivikitsuuvoq. Aalajangiineq imaannaasimanngilaq pisariaqarlunili. Sanaartornissap aallartinnissaanik kinguartitsinitsigut 2019-imi sanaartornerup aallartinnissaanut suut tamaasa piareernissaat maannakkut qulakkeersinnaalerparput”.

Karl Jensen, KJ Greenland A/S-imi pisortaq oqarpoq:
”Tamakkiisunut siunnersuisartoq Dorte Mandrup, aamma sanaartortitsisoq Realdania By & Byg suliniummi iluarsiissutissat pillugit oqaloqatigilluarpavut, taamaalilluta 2019-imi sanaartornerup aallartinnissaanut piareersimassalluta.”

2017-imili sanaartorfigissaanermik Avannaata Kommunia ingerlataqarsimavoq. 2019-imi upernaami illuliorneq aallartissaaq. Ilulissani Kangiata Illorsua 2021-mi oktobarimi atoqqaarfissiortinnissaanut piariissasoq naatsorsuutigineqarpoq.

Ilulissani Kangiata Illorsua
Ilulissat eqqaanni paasisitsiniaanermik ingerlatsivissap sumiiffimmi takornariaqarnerup ineriartornera nukittorsassavaa, aammalu sumiiffiup alutornartup oqaluttuassartaa, allanngoriartornera pingaaruteqassusialu paasisitsiniutigissallugu, ilaatigullu silap pissusaata allanngoriartornerata pingaaruteqassusianik oqaluttuarinnissalluni. Kangiata Illorsua, Dorte Mandrupimit titartarneqartoq ukiumut 25.000-it missaannik takusarneqartassasoq naatsorsuutigineqarpoq. Ingerlatsivissamut suleqatigiit tassaapput Namminersorlutik Oqartussat, Avannaata Kommunia, Realdania aamma Nordea-fonden.

Attaveqarfissat:
Naalakkersuisoqarfiup pisortaanera Jørn Skov Nielsen, Inuussutissarsiornermut Nukissiuuteqarnermullu Naalakkersuisoqarfik
E-mail: jsn@nanoq.gl // Oqarasuaat: +299 55 61 88

Borgmesteri Avannaata Kommunia, Palle Jerimiassen
E-mail: paj@avannaata.gl // Oqarasuaat: +299 94 30 67

Pisortaq Karl Jensen, KJ Greenland A/S
E-mail: karl@kj.gl // Oqarasuaat: +299 94 26 63

Realdaniami qullersatut pisortaq, Realdania By & Byg Peter Cederfeld
E-mail: pc@realdaniabyogbyg.dk // Oqarasuaat: +45 70 11 06 06

Realdania By & Byg’imi suliniummik siulersuisoq, Frants Frandsen:
E-mail: ff@realdaniabyogbyg.dk // Oqarasuaat: +45 29 69 52 73

Ilulissani Kangiata Illorsua pillugu paasissutissat assilisallu
https://realdania.dk/ilulissat-isfjordscenter