Ilinniarnertuunngorniarfik najornagu ilinniakkamik ingerlatsisinnaaneq

Ilinniarnertuunngorniarfinni ilassutitut aamma ilinniartitsissutini ataasiakkaani ilinniartitaaneq ilinniarnertuunngorniarfik najornagu ungasissumiit ilinniartitaanertut ingerlanneqartartussaq

Nutaatut maanna periarfissaalerpoq qinnuteqassalluni ilinniarnertuunngorniarfik najornagu ungasissumiit ilinniakkamik ingerlatsisinnaanermut.

GUX Sisimiut, Ilinniartitaanermut, Kultureqarnermut Ilageeqarnermullu Naalakkersuisoqarfik suleqatigalugu misiligutitut suliniummik pilersitsivoq, neqeroorutinik ilinniarnertuunngorniartarnermi ilassutitut pikkorissarnernik aamma ilinniartitsissutini ataasiakkaani pikkorissarnernik, ungasissumiit ilinniartitaanertut aaqqissuussaasunik. Ungasissumiit ilinniartitaanernik suliniutit taaguuteqarput eGSK aamma eGENK tassaallutillu: "e-Ilinniarnertuunngorniartarnermi ilassutitut pikkorissartarneq” aamma "e-Ilinniarnertuungorniartarnermi ilinniartitsissutini ataasiakkaani pikkorissartarneq”.

September 2018 aallarnerfigalugu neqeroorutigineqalissapput ilinniartitsinerit ilinniartitsissutini: Qallunaatut A, Matimatikki B, Tuluttut B aamma Uumassusilerineq C.

Ilinniartutut nutaatut ilinniartitaaneq malinnaavigineqarsinnaassaaq ilinniartitsissutinillu soraarummeernikkut naammassisaqartoqartarluni ukiup ataatsip iluani, tamakku tamarmik illoqarfimmut ilinniarnertuunngorniarfilimmut nooqqaanngikkaluarluni, suut tamarmik internetti aqqutigalugu ingerlanneqartarmata.

eGSK tassaavoq ilinniarnertuunngorniartunut ilinniarnertuunngorniarnermi ilinniartitaanermik naammassisaqareersimasunut, kisiannili ilinniartitsissummik amigaateqartunut, imaluunniit qaffasissutsimik naammassisaqarumasumut qaffasinnerusumik ilinniartitaanermut aalajangersimasumut isersinnaajumalluni.

eGENK saaffiginnippoq inunnut meeqqat atuarfiannik naammassisaqarsimasunut september 2018 sioqqullugu, kissaateqarlutillu ilinniarnertuunngorniarfimmi ilinniartitsissummi ataatsimi ilinniartitsissutiniluunniit arlaqartuni pikkorissarnissamik.Ilinniarnertuunngorniarfimmi ilinniartitsissutit ataasiakkaat tassaanngillat ilinniarnertuunngorniartarneq ataatsimoortoq, kisiannili ilinniartitaanerup ataatsimoortup ilagisinnaallugit.

Qinnuteqarnissamut piffissaliussaq killiligaavoq eGSK-mut aamma eGENK-mut 5. augustimut, ilinniartitaanerlu septemberimi aallartissalluni.

Annertunerusunik paasisaqarniaraanni, kiisalu skemamik qinnuteqarfissamik piniaraanni periarfissaavoq saaffiginnissalluni GUX -imut Sisimiuni, ugguuna eGUX@kti.gl