Statsministerip aamma Naalakkersuisut Siulittaasuata ataatsimiinnerannit oqaaseqaat.

Naalakkersuisut attaveqaqatigiinnermut aningaasaliineq inuussutissarsiutit ineriartortinnissaannut aamma nutaanik suliffeqalernissamut aammalu isertitassanut tunngavissatut pingaartutut isigaat. 2017-p ukiaanerani nuummi qitiusumik umiarsualivik atulersinneqarpoq maannalu pilersaarutigineqarluni Nuummi, Ilulissani Qaqortumilu mittarfissat nutaat pingasut sanaartornissaat. Pitsaasunik angallannermut periarfissat tunngaviupput siuariartornermut ineriartornermullu toqqammavissatut.

Mittarfissanik suliniummut taama angitigisumik aningaasaliinerit, Naalakkersuisunit saqqummiuneqartutut, aningaasaqarnikkut anguniagaavoq annertooq. Naalakkersuisut aningaasaliinissamut pilersaarutaat suliniummut tamarmiusumut annertunerpaamik nammineerluni aningaasaliineruvoq, aammali avataanit annertuumik attartornikkut pissalluni.

Danskit naalakkersuisuisa nalilerpaat, mittarfiliornissamut suliniut ataatsimut isigalugu ima annertussuseqartoq - aningaasaliiniarneq aammalu avataanit suleqatissanik toqqanissaq apeqqutaatillugit – nunanut allanut aamma sillimaniarnikkut politikkikkut attuumassuteqarsinnaasoq, Kalaallit Nunaanni aamma Kalaallit Nunaata avataani, soorluttaaq ukiuni amerlasuuni Kalaallit Nunaata aningaasaqarniarneranit annertuunik isumalluutinik atuiffiunissaa.

Tamanna tunngavigalugu statsministerip Naalakkersuisullu Siulittaasuata ullumikkut isumaqatigiissutigaat ataatsimoorlutik misissorniarlugu, taamalu pisoqassappat danskit tungaannit qanoq tapiisoqarsinnaanersoq mittarfiliornermi suliniutit ilaannut aningaasaliinissamut.

Tamanna pillugu ataatsimoorluni sulinissap aallartinnissaa isumaqatigiissutigineqarpoq, tamannalu naammassineqarsinnaalluni Inatsisartut 2018-mi ukiakkut ataatsimiinnissaannut Naalakkersuisut mittarfiliornissat pillugit inatsisissatut siunnersuusiornissaat sioqqullugu.

Statsministerip aamma Naalakkersuisut Siulittaasuata aammattaaq isumaqatigiissutigaat erhvervsministeri aamma Inuussutissarsiornermut Nukissiuuteqarnermullu Naalakkersuisoq qinnuigineqassasut annertunerusumik suleqatigiinnissamut siunnersuusioqqullugit danskit inuussutissarsiortuisa pensionskarsiisalu Kalaallit Nunaannik ilisimanninnerulernissaannik aningaasaliinissamullu soqutiginninnerulernissaannik siunertaqartumik. Ataatsimoorluni ineriartortitsinermut aningaasaateqarfimmik pilersitsinissamut periarfissat kinguneriumagassaalu tamatumunnga atatillugu nalilerneqarumaarput.

Statsministeri ima oqaaseqarpoq:
"Kalaallit Nunaani attaveqaatitigut pitsanngorsaaniarluni kissaateqarnermut tunuliaqutaasunut tunngasut isumaqatigaakka. Matumani ilaatigut pineqarput unammillersinnaaneq, inuussutissarsiutit ineriartortinnissaat aamma takornariariaqarnermut atugassarititaasut ineriartorteqqinnissaanut toqqammavissat pitsaanerusut.
Mittarfiliortiternissamut suliniutip sammineqartup nunanut allanut sillimaniarnikkullu politikkikkut attuumassuteqarsinnaavoq, Kalaallit Nunaaniinnaanngitsoq sunniuteqariatarsinnaasoq, tamannalu ukiuni amerlasuuni Kalaallit Nunaata aningaasaqarnikkut isumalluutaannit annertuumik atuiffiussalluni.
Taammaattumik nuannaarutigaara Naalakkersuisut Siulittaasuata Kim Kielsen uangalu ullumikkut isumaqatigiissutigigatsigu, ataatsimoorluni misissuilluni sulinissap aallarnisarnissaa.
Tamanna ilutigalugu ataatsimoorluni aningaasaateqarfiup Kalaallit Nunaanni siuariartornissamut ineriartornissamullu periarfissat pitsaanerulersissavai.

Uanga Danmark Kalaallit Nunaannut suleqataasutut isigaara, aammattaaq inuussutissarsiutinik ineriartortitsineq aamma Kalaallit Nunaanni attaveqaatitigut aningaasaliissutinut aningasalersuineq pineqaraangat. Taassumalu takutippaa naalagaaffeqatigiinnerup nakuussussia Kalaallit Nunaat Danmark-illu akornanni."


Naalakkersuisut Siulittaasuat ima oqaaseqarpoq:
"Nuannaarutigaara suliaq tamanna pillugu oqallinnitsinni ammasumik pitsaasumillu pissusilersorneq statsministerip tungaanit takusimasara. Uanga pitsaasumik tiguara, statsministerip isumaqatigimmanga attaveqaqatigiinnerup siuariartornermut siumukarnissamullu pingaaruteqarnerat.

Mittarfissanik sanaartornissamut suleqatigiinnissamut oqallinnitsinni kalaallit danskillu oqartussaasuia akornanni aalajangiisinnaanermut agguataarineq atuuttoq tunngaviuvoq kiisalu naligiissumik suleqatigiinnissamut kissaateqarnerput.

Tamannalu tunngavigalugu Naalakkersuisut akuersaartumik danskit naalakkersuisuinik periarfissarsiorluni suleqatigiinnissamut peqataarusupput, danskit tungaannit mittarfiliortiternissamut suliniutit ilaannut aningaasaliinissamut tapiisinnaanerannut tunngatillugu. Tamanna siunissami periarfissanik pissanganartunik imaqarpoq, mittarfiliassat piviusunngortinnissaannut aammalu akornatsinni suleqatigiinnerup ineriartortinnissaanut tunngatillugu
."

Annertunersumik paasissutissat pissarsiarineqarsinnaapput pressesekretær Jakob Bøving Arendt oqarasuaatikkut 33922259 imaluunniit naalakkersuisut siulittaasuata allattaa Eqaluk Høegh 299 562450 saaffigalugit.