Nalilersuileruttorpugut

Stemningsbillede af Indlandsisen Aatsitassanut, Suliffeqarnermut, Nunamut Namminermut, Nunanilu Avannarlerni Suleqatigiinnermut Naalakkersuisoq Vittus Qujaukitsoq Tunngaviusumik Inatsisissaq pillugu Isumalioqatigiissitap siumut isigaluni sulinissaa pillugu maanna nalilersuivoq.

Tunngaviusumik Inatsisissaq pillugu Isumalioqatigiissitap maanna nalilersorneranut pissutaavoq Tunngaviusumik Inatsisissaq pillugu Isumalioqatigiissitap siulliup sulianik amerlasuunik naammassisaqarpiarsimannginnera. Ingerlasimanera tamarmi pitsaasimanngilaq, tamatumalu taamatut ingerlaqqinnginnissaa Vittus Qujaukitsup kissaatigaa.

Tuaviuussat suliarinerlutaasarput
”Ilaatigut Namminiilivinnissamut akisussaaffik tigugakku Tunngaviusumik Inatsisissaq pillugu Isumalioqatigiissitap sulisimanerata misissornissaanut piffissaq atorsimavara. Tunngaviusumik Inatsisissaq pillugu Isumalioqatigiissitap siuliani sulisimanerata uteqqinnginnissaa sapinngisamik anguniarpara. Taamaattumik Inatsisartuni Naalakkersuisunilu partiit oqaloqatigineranit suliassap tunngavia misissoqqinneqarpoq. Suliassap tunngavia ilusilersorneqassaaq nalornissutigineqannginnissaa qulakkeerneqarniassammat. Tamattami ilisimavarput ”tuaviuussat suliarinerlutaasartut”, taamaattumik Tunngaviusumik Inatsisissaq pillugu Isumalioqatigiissitami suliassap tunngaviata pitsaasuunissaa anguniarnerani piffissaqartitaarusuppunga” taama Naalakkersuisoq, Vittus Qujaukitsoq oqaaseqarpoq.

Naalakkersuisooqatigiinnissamut isumaqatigiissummi suliassiissutit pingasut aallaavigalugit suliaqartussaavoq, tassaasut:

  1. Isumalioqatigiissitap katitigaanera nalilersoqqinneqassaaq, naalakkersuisooqatigiinnissami isumaqatigiissummi partiit ilaasortaatitarerusutatik kiffaanngissuseqarlutik innersuussinissamut aalajangeerusukkamik.
  2. Kiffaanngissuseqarluni ilaasortassanik innersuussuteqarnermi qinigaanngitsunik toqqaasoqassappat qanoq iliornissamut piareersaatinik tekniskiusunik sanasoqassasoq, aammalu
  3. Tunngaviusumik Inatsisissaq pillugu Isumalioqatigiissitapsuut suliassarpiaanersut ersarissumik allassimasariaqarnersut ilanngutissagai, isumaliutissiissutigineqannginnerani innersuussutigineqannginneranilu.

Nammineq aalajangeeqataasinnaanermut tunngaviusumik inatsit killiliivoq
Sammisassarisat Kalaallit Nunaata piginnaaneqarfigilersinnaasai eqqarsaatigalugit Tunngaviusumik Inatsit killiliititsisuusoq qularutissaanngilaq. Assersuutigalugu Nunanut allanut tunngassutilinni, sillimaniarnermut politikkimi, innuttaassuseqarnermut, eqqartuussivillu qullersaannut. Suliassaqarfiit tamakku aatsaat akisussaaffigineqarsinnaalissapput ulloq taanna Kalaallit Nunaat naalagaaffittut namminiilivippat.

Naggataatigut Naalakkersuisoq Vittus Qujaukitsoq ima oqaaseqarpoq:
” Tunngaviusumik Inatsisissaq pillugu Isumalioqatigiissitaq pilersinneqarsimavoq innuttaasut angerlarsimaffimminni namminneq oqartussaassuseqalernissaat siunertaralugu, tamannalu maanna inatsit tunngaviusoq atuutsillugu pisinnaanngilaq. Tamanna ima isumaqarpoq, Tunngaviusumik Inatsit aalajangersimasunik killissaqartillugu namminneerluta tamakkiisumik aalajangiisinnaanngilagut. Avissaavinnissaq aamma/imaluunniit Danmarkimik suleqateqarnikkut nammineq aalajangiisinnaanissaq tunniunneqarsinnaavoq. Kisianni tamanna Isumalioqatigiissitap suliassaraa, siunnersuuteqarfigisussaallugulu.”

Annertunerusumik paasisaqarusukkussi naalakkersuisup allattaa Helene S. Pedersen, tlf. +299 34 68 39, e-mail: hspe@nanoq.gl attavigineqarsinnaavoq.