Allorfiup unammisitsineranut ajugaasut nassaarineqarput

Allorfiup aningaasanoornernut filminik oqaluttuamilluunniit unammisitsineranut ajugaasut nassaarineqarput

Unammisitsinerup siunertaraa aningaasanoorneq qaqugukkut nuannersumiit ajornartorsiutinngortarneranit taavalu aningaasanoortarnerup ajornartorsiutaaneranik ilisimasat annertusineratigut pitsaaliuineq.

Allorfik, Pinngitsuuisinnaajunnaarnermut Ilisimasaqarfiup unammisitsinermut tunniussat qujassutigingaarpai.

Aningaasanoornermut unammisitsinermi ajugaasuupput Nalunnguarfiup Atuarfiani atuaqatigiit 8.d aamma Atuarfik Hans Lyngemit atuaqatigiit 5.a. Tamarmik aningaasanoorneq pillugu filimiorsimapput.

Atuartut Nalunnguarfiup Atuarfianeersut filmiliartik ”The gambler”-imik atsersimavaat filmiliaminiillu pisuusaartitsineq nittartakkanillu takussutissiat atorlugit sanasimavaat. Atuarfik Hans Lynge-mit 5 a namminneerlutik aningaasanoornermut filmiliartik ”Ludomani” annikitsunik pisuusaartitsisillutik sanasimavaat.

Filmit Allorfiup nittartagaani takuneqarsinnaapput: allorfik.gl.

Peqqissutsimut Ilisimatusarnermullu Naalakkersuisututut Doris J. Jensen oqarpoq: ”Filmit ajunngilluinnarput. Filmit nuannaarutigaakka eqqarsaatissiissummillu aamma tunivaanga”. Nangillunilu: ”Kajumissaarususuppasi Allorfiup nittartagaani filmit takoqqullugit. Aningaasanoorneq innuttaasut peqqissusaannut ajornartorsiutaavoq pimooruttariaqarnerusarput. Taamaattumillu aamma Nuummi ukiamut aningaasanoorajunneq pillugu ataatsimeersuarnissamut qaaqqusinissannut qilanaarpunga”.

Aningaasanoorneq annertusiartorpoq. 2014-mi innuttaasut peqqissusaannik misissuisitsinermi takutippaat inersimasut akornanni ukiuni kingullerni ajornartorsiutitalimmik aningaasanooriaaseqartut 7,2 %-mik annertussuseqartut taamaalillunilu 2005-mut 4,0 %-mik annertussusilimmut naleqqiullugu marloriaatinngorsimasoq. Katillugit 20 %-ii 2014-mi nalunaarput ajornartorsiutitalimmik aningaasanooriaaseqartut 2005-mi 13 %-iusut.

Atuaqatigiit ajugaasut aningaasanoorajunneq pillugu ataatsimeersuarnermi 2018-mi ukiakkut akissarsiassartik pissavaat tassani Peqqissutsimut Ilisimatusarnermullu Naalakkersuisoqarfik Allorfik suleqatigalugu aaqqissuunneqartussaalluni.

Atuartitsissutinut atortussat suli www.gambling.gl –imi aaneqarsinnaapput atorneqarsinnaallutillu.

Paasissutissanik sukumiinerusunik pissarserusukkuit siunnersorti Nivi Thomassen Olsen oqarasuaat +299 34 66 54 imaluunniit e-mail nith@allorfik.gl pissarsiarineqarsinnaapput.