Kim Kielsen naalagaaffeqatigiinnermut tunngasut pillugit Savalimmiunut ataatsimiigialersoq

Statsministeri Lars Løkke Rasmussen, Savalimmiuni Lagmandi Aksel V. Johannesen aamma Naalakkersuisut Siulittaasuat Kim Kielsen juunip ulluisa 11.-anni 12.-iannilu naalagaaffeqatigiinni naalakkersuinikkut siuttut ukiumoortumik ataatsimeeqatigiissapput, taamatullu ataatsimeeqatigiinnissaq ukioq manna Savalimmiuni ingerlanneqassaaq.

Naalakkersuisut Siulittaasuata, Statsministerip aamma Lagmandip peqatigiillutik naalagaaffeqatigiit ataatsimoorussamik suliassaqarfiinut tunngasut kiisalu suleqatigiinnermut tunngatillugu piffissami matumani sammineqartut eqqartussavaat.

Kim Kielsen ima oqarpoq:

”Savalimmiut tikeraaqqinnissaanut aamma Savalimmiuni Danmarkimilu naalakkersuinikkut siulittaasut naapinnissaannut qilanaaqaanga.

Naatsorsuutigaara ukioq manna ilaatigut tuluit EU-mit aniniarlutik aalajangernerisa kingorna EU-mik aamma Tuluit Nunaannik siunissami suleqateqariaasissatsinnut tunngasut eqqartussagivut, aamma nunanut allanut tunngasutigut naalakkersuinikkut ingerlatsinermut tunngassuteqartut suleqatigisuleqatigiissutiginissaannut tunngatillugu siusinnerusukkut isumaqatigiissutigisimasagut ataatsimoorluta nalilersuiffigissagivut naatsorsuutigaara.

Tassunga atatillugu pissusissamisoorluinnartuusoraara maani nunatsinni nunat allat aningaasaliissuteqarsinnaanerinut tunngasut soqutigineqaleraluttuinnartut qanoq aqussanerivut oqaluuserissagutsigu, aamma Danmarkimi Savalimmiunilu allanilu nunani allaneersut aningaasaliissuteqartarneri ilanngullugit.”

Ileqquliunneqarsimasimasoq malillugu naalagaaffeqatigiinni siuttut ataatsimiinnerat naggaserlugu tusagassiortunik katersortitsisoqassaaq, tamannalu ukioq manna Skerpimi spejderit illuutaanni ingerlanneqassaaq, sisamanngornermi juunip 12-anni nal. 11.30.

Naalagaaffeqatigiinni naalakkersuinikkut siuttut naapeqatigiinnerini naalakkersuinikkut pissutsit persuarsiutaanngisumik oqaloqatigiissutigineqartarput, taamatullu naapeqatigiinneq kingulleq siorna aasakkut Danmarkimi Christiansømi ingerlanneqarpoq.

Sukumiinerusumik paasisaqarnerorusuttut attavigisinnaavaat Naalakkersuisumut allatsi Eqaluk Høegh oqarasuaat +299 56 24 50 imaluunniit e-mail eqah@nanoq.gl