Aalisakkanut aasaru tunitsiveqartitsilluartoqassaaq

Umiarsuit tunitsiviit tallimat aasaru tunitsivigineqassapput

- Nuannaarutigaara ingerlatsiveqatigiit umiarsuarnik tunitsiviusinnaasunik sumiiffinni assigiinngitsuni umiarsualiiniarmata. Aamma Royal Greenland umiarsuarnik tunitsiveqartitsiniarmat, umiarsuaq saarullinnut uumatitsivilik Maniitsoq aamma umiarsuaq Sisimiut saarullinnut tunitsivigineqassapput. Umiarsuit Paamiunit Kangerlummut tunitsivigineqarsinnaassapput, aamma Kangaatsiap eqqaani tunitsivigineqarsinnaassallutik, Aalisarnermut, Piniarnermut Nunalerinermullu Naalakkersuisoq, Erik Jensen oqarpoq.

- Qularutiginngilluinnarpara umiarsuit tunitsiviusut sumiiffinni pineqartuni tunitsivigineqalerpata aalisakkanik tunisineq uneqattaassanngitsoq. Umiarsuarnik tunitsiveqartitsisoqalerpat aalisartut pitsaasumik tunitsiveqarnermikkut atugassaqartitaassallutik, Naalakkersuisunut ilaasortaq erseqqissaavoq.
Naalakkersuisut ullumi juunip arfineq aappaanni ingerlatsiveqatigiit sisamat akuerivaat umiarsuit tunitsiviusut katillugit tallimaasut tunitsivigitissinnaagaat.

Ingerlatsiveqatigiit uku akuerineqarput:

Kitaa Seafood ApS, Nuup eqqaani saarullinnut tunitsiviliisinnaassasoq.

Royal Greenland A/S, Qeqertarsuatsiaanit Kangerlummut Royal Greenlandip kilisaataa Sisimiut tunitsiviusinnaassasoq aamma umiarsuaq saarullinnut uumatitsivilik Maniitsoq Maniitsumit Kangerlummut tunitsiviliisinnaassasoq.

Royal Greenland A/S, Upernaviup eqqaani saattussanut tunitsiviliisinnaassasoq.

Papik Fish ApS, Kangersuatsiap eqqaani saattuanut, saarullinnut aamma nipisat suaannik tunitsiviliisinnaassasoq.

Nuussuaq Fish ApS, Nuussuup eqqaani qaleralinnut tunitsiviliisinnaassasoq.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi immikkoortortami pisortaq, Kunuk Holm. Email: kunh@nanoq.gl