Vivian Motzfeldt Ilulissani isumaqatigiissutip ukiuni qulinngortorsiornerani qaffasissumik ataatsimiinnermi tikeraartitsisuuvoq

Nunanut allanut tunngasuni Naalakkersuisoq Vivian Motzfeldt Ilulissani isumaqatigiissutip ukiuni qulinngortorsiornerani qaffasissumik ataatsimiinnermi tikeraartitsisuuvoq

Nunanut allanut tunngassutilinni Naalakkersuisunngoqqammersoq Vivian Motzfeldt Nunanut allanut ministeri Anders Samuelsen peqatigalugu Ilulissani isumaqatigiissutip ukiut qulinngortorsiorneranut atatillugu Ilulissani qaffasissumik ataatsimiititsinermi maajip 22-anni 23-annilu ingerlanneqartumi qaaqqusisuupput. Ataatsimiinnermi issittumi naalagaaffiit arfineq pingasut ministerii aallartitaallu taamatullu Issittumi nunap inuiisa kattuffiinit aallartitat peqataassapput.

Ilulissani isumaqatigiissummi maj 2008-meersumi issittumi naalagaaffiit tallimaasut Issittup eqqissisimasumik inissisimanissaata qulakkeerneqarnissaanut imminnut pisussaaffilerput, akerleriissutaasinnaasut nunarsuatsinni periusaasut malillugit eqqissisimasumik oqaloqatigiinnikkut qaangiiniarnermi isumaqatigiinnerit aqqutigalugit qaangerneqartarnissaat uani pineqarluni. Taamatullu sumiiffinni imminut nappassinnaasumik aningaasarsiornikkut ineriartortinnissaat, avatangiisaannik illersuineq ilisimatusarnerillu suleqatigiiffiginissaat pisussaaffiusut erseqqissaatigineqarpoq.

Naalakkersuisoq Vivian Motzfeldt Ilulissani qaffasissumik ataatsimiinnissamut atatillugu ima oqaaseqarpoq: ”Issittumi suleqatigiinnermut peqataanitsigut Kalaallit Nunaata kissaatigaa peqataaffigerusullugulu Issittoq sumiiffiussasoq eqqissisimasoq. Issittoq tassaassaaq nunarsuarmioqatigiit suleqatigiinnerisigut oqaloqatigiinnerisigullu eqqissisimasoq, aningaasaqarnikkut- aamma imminut nappassinnaasumik ineriartortoq, taamaalilluni Issittup inuinut iluaqutaasussanngorlugu.”

Pilersaarut ilaatigut makkuninnga imaqassaaq:
- Qaffasissumik ataatsimiinneq, tassani issittumi naalagaaffiit arfineq pingasuusut nunallu inuiisa Ilulissani isumaqatigiissutip pingaaruteqarnera issittumilu suleqatigiinnermi assigiinngitsutigut isiginniffiiit assigiinngitsut pillugit oqallisigissavaat.
- Issittumi Siunnersuisooqatigiinni Ilisimatusarnermi suleqatigiinnissamut isumaqatigiissutip sumiiffinnit assigiinngitsunit isigineqarnera pillugu eqqartueqatigiinneq.
- Ilulissat Kangerluat aqqusaarlugu nunaqarfimmut Ilimanamut paasisassarsiorneq. Ilimanami sumiiffimmi illuaqqiornikkut aningaasaqarnikkut ineriartortitsineq pilersinneqarsimavoq, tassanngaannit takornariat nunatta avatangiisaanik pinnersumik misigisassaqartinneqarlutik.
- Isumaqatigiissutip ukiut qulinngortorsiorneranut atatillugu eqqaassutissamik uleersineq - kulturikkut saqqummiineq.
- Tusagassiortunik katersortitsineq.

Annertunerusumik paasissutissanik pisariaqartitsiguit Naalakkersuisoqarfimmi pisortaq Kenneth Høegh attavigisinnaavat, kenh@nanoq.gl, +299 565604