Nuummi innuttaasunik ataatsimiisitsinermit apeqqutit akissutillu takukkit

Apriilip ulluisa aqqarnanni 2018 innuttaasunik ataatsimiisitsinermi suut apeqqutigineqarpat? Apeqqutit akissutillu ataani takukkit.

Nakorsat qassit ullaakkut sianertunik sullissisarpat?
Nakorsat arfineq pingasut aqqaneq marlullu akornanni peqqissaasullu marluk tallimallu akornanni ullaat tamaasa nakorsamut oqarasuaammut sianertunik oqaluussisarput.

Nakorsamut oqarasuaatikut sullissineq qanoq ingerlanneqarpa?
Nal. 8.15-ip 8.30-illu akornanni sianertoqarsinnaavoq, sianertut 100-it siulliit akornanniikkuit normumik pissarsissaatit, taakku akornanniinngikkuit utaqqinermi nipi tusaassavat. Oqarasuaatikkut sullississut 500-it pallillugit utaqqisoqarsinnaavoq. Agguaqatigiissillugit ullaat tamaasa inuit 200-it nakorsamut oqarasuaammut sianertarput. Innuttaasut ataasiakkaat peqqinnissakkut sullisisumik oqaluussiniarlutik minutsialunniit minutsit 30-it 60-illu akornanni utaqqisarput.

Suna pillugu nakorsat allattaat pinnatik peqqinnissakkut sullissisut nakorsamut oqarasuaammut sianertunik sullissisuuppat?
Sianertut tamarmik peqqinnissakkut sullissisumik innuttaasup nakorsamit takuneqarnissamik, nutaanik nakorsaatitulernissamik, nutaanik allanilluunniit misissortinnissamik il.il. pisariaqartitsineranik naliliisinnaasumik oqaluussissapput. Innuttaasup paasissutissiissutai naapertorlugit tamanna pissaaq.
Taamaammat sapinngisamik sukumiisumik paasissutissiisoqassaaq ass.: Nappaammut ersiutit qanoq sivisutigisumik attappigit? Allanngortarpat (ass. ullaakkut/unnukkut, nerininni pisunninniluunniit il.il. )? Siornatigut taama anniarsimavit? il.il.

Sulisussarsiniarnermut atatillugu unammilligassat Peqqinnissaqarfimmit qanoq iliuuseqarfigineqarpat?

Peqqinnissaqarfimmi sulisussarsiniarnermut atatillugu ilinniagalinni pineqartuni tamani unammilligassanut iliuusissatut siunniussat aaqqissuussamik sulinissamik qulakkeerisussat aallaavigineqarput.
Nunatsinni peqqinnissamut tunngatillugu ilinniarfiit Peqqinnissaqarfimmit qanimut suleqatigineqarput Peqqinnissaqarfiullu inuusuttunik soorlu Danmarkimi nunaniluunniit allani ilinniartunik attaveqarnini sapinngisamik attattuarniartarpaa. Tamatuma saniatigut aamma Danmarkini nappaarsimmavinni arlalinni sulisut pingasut sisamalluunniit Dronning Ingridip Napparsimmavissuani atorfik ataaseq nikittaallutik inuttalertarpaat.

Peqqinnissaqarfiup eqiterutitsilluni aaqqissuuteqqinneqarnera sumut killippa? Maanna nukiit pitsaanerusumik atorneqarpat?
Eqiterutsitsilluni aaqqissuusseqqinnermi peqqinnissaqarfik nunassittarnermut naleqqussarneqarluni tallimanik qitiusumik immikkoortoqalerpoq. Eqiterutitsilluni aaqqissuusseqqinnermi aqutsisut allaffissornikkullu ingerlatsineq illoqarfinnut annernut eqiterunneqarput. Ilinniagaqassutsikkut nukiit attaveqatigiissinnaanerat siunertaralugu aamma kattunneqarput. Taamaaliornikkut napparsimasunik sullissinermut piffissaq atugassaq annertusivoq. Taamaammat aap nukiit pitsaanerusumik atorneqarput. Illoqarfinnili minnerusuni nakorsatut atorfiit allanngunngillat.

Anigorsinnaanngisamik nappaateqaraanni nakorsaatinik peqqissagaanni suna pillugu tamatigut nakorsaq allagarseeqqartariaqarpa?
Aalajangersimasunik nakorsaatillit tamarmik ukiumut ataasiarlutik nakorsamit misissortittartussaapput. Anigorsinnaanngisamik nappaatillit aalajangersimasumik nakorsaatiminnik ukiumoortumik misissortinnissartik sioqqullugu inniminniisariaarullugit, arlaleriarlugit atugassanik allagartalerneqarajupput, taamaakkaluaq ukiumut ataasiarluni misissortittoqassaaq nakorsaatinullu allagartamik nutaamik pissarsilluni.

Paasineqartutut tusaaneqartutulluunniit misiginngilanga?

Nakorsat peqqissaasullu tamarmik sapinngisaminnik pitsaanerpaamik sullissiniartarput. Kukkusoqarsinnaavoq kukkuerillu t ilinniarfioqqullugit saqqummiunneqassappu. Peqqinnissaqarfimmi nuanninngitsumik misigisaqarsimaguit tamatigut Peqqinnissaqarfimmi siunnersorti attavigalugu napparsimasut pisinnaatitaaffii, maalaaruteqarsinnaaneq – taarsiiffigitissinnaanerlu kiisalu Peqqinnissaqarfimmi periarfissat killissallu pillugit ilitsersorneqarnissamut ikiorneqarsinnaavutit ilitsersorneqarsinnaallutillu.

Nakorsiarninni tamatigut allamik ilaqarsinnaanerit eqqaamajuk. Nappaatip imaannaanngissusaa tamatigut nakorsamut oqaatigineqartanngilaq. Illit nammineq qanigisaasutut utoqqarmik nakorsiaqateqaruit, taava nappaatip oqaluttuassartaa pillugu paasissutissanik sapinngisamik sukumiisumik piareersarnissarsi eqqaamassavarsi ass.: Qanoq sivisutigisumik nappaammut ersiuteqarsimaneq. Nappaammut ersiutit allanngortarnersut (ass. ullaakkut/unnukkut, nerinermi imal. pisunnermi il.il.)? Siornatigut taama anniartarsimaneq il.il.

Peqqinnissaqarfimmi immikkoortut arlallit akornannut inissittooruma qanoq iliussaanga?
Nakorsartinninnut nakkutigineqarninniluunniit atatillugu immikkoortortanik qitiusumilluunniit immikkoortortanik arlalinnik attaveqateqassaguit, Peqqinnissaqarfimmi siunnersortimit illit suliniutit pisinnaatitsissullu tunngavigalugit suliamik ilinnut tunngasumik misissuisinnaasumit malittarinnissinnaasumillu taperserorneqarnissat siunnersorneqarnissallu tamatigut qinnutigisinnaavat.

Suna pillugu aggeqqeqquneqaannartarpunga?
Aggeqqeqquneqarsinnaanermut patsisaasut ilaat tassaavoq maanna qanoq innerit tunngavigalugu nappaammut ersiutit navianaateqannginnerannik nakorsap naliliinera. Akuttunngitsunik nappaammut ersiutinik maluginiagassannik nakorsap paasissutissisinnaavaatit. Nappaammut ersiutit allanngorpata, tamatigut nakorsaq attavigeqqinneqassaaq pinasuagassaappallu ajoqusersimasunut nakorsiartarfik attavigineqassalluni.

Peqqinnissaqarfik Sermersuumi naammattunik sulisoqarpisi?
Atorfiit aningaasaliiffigineqartut tamarmik inuttaqarput, utaqqisarnerillu sivikillinissaat nakorsiartarfimmilu atugassarititaasut nakorsamullu oqarasuaatip pitsaanerulernissaat kissaataappat, aningaasaliissutit qaffanneqarnissaat piumasaqaataavoq. Innuttaasuttaaq pisariaqartitaat iliuuseqarfiginiarlugit taamaaliortoqarpoq

Sapigaqarnermut tunngasut sipaarniarfigineqarpat?
Naamik, sapigaqarnermilli nappaatinik suussusersiniaanermut atatillugu suleriaatsit allannguuteqartinneqarput. Innuttaasut qanittumi nutaanik neqeroorfigineqarnissaat naatsorsuutigineqarpoq.

Meeraq napparsimasoq pinasuartumik timmisartuunneqartussanngorpat kia qassillu ingiallorsinnaavaat?

Peqqinnissaqarfiup immikkoortortaqarfimmut inatsisiliunneqartut malippai. Meeraq 18-it inorlugit ukiulik ass. pinasuartumik angallanneqassappat, suliaritikkiartussappat illoqarfimmiluunniit allami misissortissappat angajoqqaat arlaannut ataatsimut angalaneq ineqarnerlu Peqqinnissaqarfiup akilissavai.
Pinasuartumik angallassinerni ilaatigut timmisartumi inissaqarsinnaasarpoq. Taamaammat ilaanni angajoqaat marluullutiik ingiallortaasinnaanerat neqeroorutaasarpoq. Taamaattorli ilaqutariit namminneq saniatigut ingiallortaasup ineqarnera utimullu angalanissaanut aningasartuutit namminneq isumagissavaat.

Inersimasoq napparsimappat angallanneqassappallu kia qassillu ingiallorsinnaavaat?
Peqqinnissaqarfiup immikkoortortaqarfimmut inatsisiliunneqartut malippai. Inersimasutut tassanngaannaq napparuit inuunerillu navianartorsiorpat tamatumunngalu atatillugu angallanneqassaguit, qanigisamit ataatsimit ingiallorteqarnissannut aningaasartuutit Peqqinnissaqarfimmit akilerneqassapput.

Peqqinnissaqarfimmi siunnersorti ataaseq naammappa?
Atorfik taanna peqqinnissaqarfimmi nutaajuvoq qanittukkut aatsaat ulloq naallugu suliffiulersoq. Pisariaqartitsineq naliliivigineqartuarpoq.

Attavissaq:
Aqutsisoqarfiup pisortaa Malene Marie Nielsen oqarasuaat: +299 34 43 00 imal. e-mail: sundhedsledelsen@peqqik.gl