Ilaqutariinni aqqutissioqatigiinneq – atuagaq ilitsersuut

Isumaginninnermut Aqutsisoqarfiup atuagaq Ilaqutariinni aqqutissioqatigiinneq – ilaqutariinni aqqutissioqatigiinnerup sulinermi periutsitut atornissaa pillugu sulisunut ilitsersuutaasoq, kommuninut ulluni makkunani nassiussuuppaa. Atuagaq illoqarfinnut, isumaginninnermi ingerlatsivinnut ilaqutariinnillu sullissivinnut – ilaqutariinni aqqutissioqatigiinneq pillugu pikkorissarfiusimasunut - tamanut nassiussuunneqarpoq.

Atuagaq suliarineqarpoq Isumaginninnermut Aqutsisoqarfimmi immikkut siunnersortimit Maria Forbergimit aamma siunnersortimit Susanne Qvist Andersenimit. Grafikerip Maria Motzfeldtip ilusilersornera isumagaa Christian F. Rexilu atuakkamik titartagartalersuisuulluni.

Ilaqutariinni aqqutissioqatigiinneq suleriaasiuvoq inunnik isumaginninnermi atorneqarsinnaasoq. Periutsimi aallaaviuvoq ilaqutariit tamarmik nukissaqarnerat – aamma ilaqutariit inooqatigiissutsikkut ajornartorsiutillit. Ilaqutariinni aqqutissioqatigiinnermi ilaqutariit qanigisatik, ikinngutitik imaluunniit meeqqap inuunerani inuit pingaarutillit allat naapittarpaat. Peqataasut tamarmik meeqqap ilaqutariillu inuunerisa qanoq pitsaanerulersinnaanerat pillugu oqalliseqataasarput. Ilaqutariinni aqqutissioqatigiinnerup ilaqutariit meeqqallu tusaaneqarsinnaalernissaat peqataaffigisarpai, siunissami qanoq pisoqarnissaanut aalajangiinissamut periarfissittarlugit.

Isumaginninnermut Aqutsisoqarfik maanna illoqarfinni nunaqarfinnilu ukunani ilaqutariinni aqqutissioqatigiinneq pillugu pikkorissartitsinikuuvoq: Sisimiut, Maniitsoq, Ilulissat, Tasiilaq, Qaqortoq, Narsaq, Nanortalik, Upernavik, Kullorsuaq, Qaanaaq, Uummannaq, Kangaatsiaq, Nuuk aamma Qasigiannguit. Nuna tamakkerlugu inuit 266-it ilaqutariinni aqqutissioqatigiinnermik periutsimik ilinniartinneqarput. Inuit 196-it suliniuteqartutut pikkorissarnernut peqataapput, 70-illu ataqatigiissaarisutut ilinniartinneqarlutik.

Ilaqutariinni aqqutissioqatigiinnermi aallarniisut assersuutigalugu tassaasinnaapput isumaginninnermi siunnersortit, ilaqutariinnik katsorsaasartut, perorsaasut il.il., meeqqap inuusuttulluunniit ikiorneqarluni tapersersortariaqarneranik paasisaqartut. Ataqatigiissaarisoq tassaavoq inuk arlaannaannulluunniit attuumassuteqanngitsoq, aqqutissioqatigiinnermi kikkut peqataanissaat pillugu ilaqutariinnik oqaloqateqartussaq aamma ilaqutariinni aqqutissioqatigiinnermut atatillugu suliassanik tigussaasunik tamanik isumaginnittussaq, Maria Forberg Isumaginninnermut Aqutsisoqarfimmi immikkut siunnersortaasoq oqaluttuarpoq.

Aammattaaq atuagaq nittartakkami uaniissaaq: www.centralraadgivningsenhed.gl – tassanilu aamma filmit mappersakkallu nassaarineqarsinnaapput.