Inatsisartunut qinersinermi allakkatigut taasineq

Qinersineq 24. april 2018-imi Inatsisartunut qinersinissamut atatillugu pappiaqqamik taasivimmik nassiussinikkut allakkatigut qinersinissamik periarfissaqarpoq.

Allakkatigut taasisinnaaneq pisinnaavoq, ulloq una aallarnerfigalugu: Marlunngorneq 13. marts 2018

Kommunimi inuit nalunaarsorsimaffianni, tassa folkeregisterimi allakkatigut qinersisoqarsinnavoq. Inuit nalunaarsorsimaffiitut aamma paasineqassapput kommunimi najugaqarfiup pingaarnerup avataani kommunip allaffii.

Napparsimmavinni imaluunniit peqqissartarfinni paaqqutarineqartarfinniluunniit allani uninngasut aammalu pinerluuteqarsimasunik isumaginnittoqarfiup inissiisarfiani inissinneqarsimasut aamma allakkatigut taasisinnaapput.

Qinersisartut najugaqarfinni avinngarusuni najugaqartut inummi qinersinermik siulersuisut toqqagaanni allakkatigut taasisinnaapput.

Qinersisartut umiarsuarni Kalaallit Nunaanni angerlarsimaffeqartuniittut umiarsuup naalagaanit taassumaluunniit toqqagaanit taasisinneqarsinnaapput.

Silasiorfinni timmisartunullu mittarfinni il.il. allakkatigut taasisoqarsinnaavoq inummi Qinersinermut ataatsimiititaliamit piginnaatinneqartumi.

Qinersisartut Danmarkimiittut Savalimmiuniittulluunniit inuit nalunaarsorsimaffianni imaluunniit Kalaallit Nunaata sinniisoqarfiani Københavnimiittumi allakkatigut taasisinnaapput.

Qinersisartut Naalagaaffiup avataaniittut Danmarkip aallartitaqarfiini imaluunniit konsuleqarfiini taasisinnaapput.

Allakkatigut taasissut kommunimi qinersisartup qinersisussat allassimaffimmiiffigisaanut nassiunneqassaaq. Allakkatigut taasissut taasiartorfimmut qinersisartup qinersisussat allassimaffimmi nalunaarsorsimaffigisaanut ullormi qinersiffiusup ingerlanneqarnera naatinnagu tiguneqareersimassaaq, tassa imaappoq marlunngorneq 24. april 2018 nal. 20:00 nallertinnagu. Taamaattumik siunnersuutigineqarpoq allakkatigut taasinissaq piffissaalluartillugu ingerlanneqassasoq.

Annertunerusumik paasisaqarusukkaanni inuit nalunaarsorsimaffiat, folkeregisteri saaffigineqarsinnaavoq.

Nuuk ulloq 13. marts 2018

Attaveqarfissat
Qinersinermut Ataatsimiititaliap allattoqarfia Email: qinersineq@nanoq.gl, Oqarasuaat: +299 34 50 00.