Ilinniartut Kalaallit Nunaannut uterunik ingerlaannartumik qinersinissamut peqataasinnaalerput

Namminersorlutik Oqartussat nalunaarutigeqqammerpaat, innuttaasut, ilinniartuunermi kingorna ukiut marluk qaangiutinnginneranni Kalaallit Nunaannut utertut, Kalaallit Nunaanni ulloq siulleq aalajangersimasumik najugaqaleqqiffimminni Inatsisartunut qinersinissamut kiisalu qinigassatut sassarnissamut pisinnaatitaaffeqartut.

Innuttaasut akornanni nalornissutigineqarnikuuvoq, innuttaasunut Kalaallit Nunaannut utertunut aalajangersakkat suut atuunnersut. Maanna naqissuserneqarpoq, ilinniartuunerup kingorna ukiut marluk qaangiutinnginneranni Kalaallit Nunaannut uteraanni, taava nunami ikinnerpaamik qaammatit arfinillit najugaqarsimanissamik malittarisassamik eqqugaasoqassanngilaq.

Qinersisarneq pillugu inatsimmi allassimagaluarpoq, Inatsisartunut qinigassatut sassarsinnaassagaanni qinersisinnaassagaannilu, qinersinissap ullua qaammatinik arfinilinnik sioqqullugu innuttaasoq Kalaallit Nunaanni aalajangersimasumik najugaqarsimassasoq.

1986-imi Inatsisartut aalajangerpaat, innuttaasut, Kalaallit Nunaata avataani ilinniartut, Kalaallit Nunaanni najugaqarnissamik piumasaqaammik naammassinninngiikkaluarlutik Inatsisartunut qinersisoqarnerani qinersisinnaasut. Maanna innuttaasunut angerlartunut aalajangersagaq erseqqissarneqarpoq.

Aalajangersakkami 1986-imeersumi innuttaasut ilinniartuunngitsut allat aamma ilaapput. Tamanna aamma innuttaasunut assersuutigalugu, napparsimmavinni uninngasimasunut imaluunniit nunami allami Kalaallit Nunaata sinniisoqarfiini atorfeqarsimasunut atuuppoq.

Suli piumasaqaataavoq, Kalaallit Nunaannit aallarnissaq sioqqullugu nunatsinni sivikinnerpaamik ukiut marluk najugaqarsimanissaq, kiisalu assersuutigalugu ilinniariarluni aallarsimanissaq. Taamaasilluni Kalaallit Nunaata avataaniinneq utaqqiisaagallartumik aallaqqanertut pissuseqassaaq. Aamma piumasaqaataapput, nammineersinnaatitaaneq kiisalu qallunaatut innuttaassuseqarneq.

Sukumiinerusumik paasissutissanik piniaruit: Immikkoortumi pisortaq Klaus Georg Hansen, Nunamut Namminermut Immikkoortortaq, Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfik Oqarasuaat toqqaannartoq: +299 34 51 11, email: kgh1@nanoq.gl