Immikkoortortaq nutaaq kiffartuussinermik misigisanillu pitsaanerusunik pilersitsivoq

Dronning Ingridip Napparsimmavissuani immikkoortortaq nutaaq kiffartuussinermik misigisanillu pitsaanerusunik pilersitsivoq

2018-imi februaarip ulluisa aallaqqataanniit Dronning Ingridip Napparsimmavissuani napparsimasunut immikkut nakkutigisarialinnut paaqqutarisalinnullu immikkoortortaq nutaaq iluaqutigaat.

”Immikkoortortami napparsimasut nakkutigineqarnissamut, nakorsartinnissamut paaqqutarineqarnissamullu annertunerusumik pisariaqartitsisut isumagineqarput, taannalu immikkoortortani nalinginnaasuni nakorsaanermut neqeroorutaasumut peruluttunillu nakkutilliivimmi neqeroorutaasumut atassusiisuuvoq,”
pinasuagassanut immikkoortortami peqqissaasutut aqutsisoq Caroline Dollerup-Scheibel, sulisut aqutsisullu allat peqatigalugit immikkoortortamik nutaamik pilersitseqataasoq, nassuiaavoq.
Taassuma sulisut nappariataartunik nakkutilliinermik nakorsaanermillu ilinniarsimanerat kiisalu nakorsaanerup pinasuagassanut – peruluttunullu immikkoortortap, uninngaviullu ingerlaqqiffiusussap akornanni qanimut suleqatigiinnikkut ingerlanneqarnera, nassuiaatigaattaaq.

Maannamut uummalluttuunerupput
” Immikkoortortami napparsimasunut ataasikkaanut tunngatillugu annertunerusumik nakkutilliisinnaaneq iliuuseqalertorsinnaanerlu neqeroorutigaagut” immikkoortortartaami peruluttunut immikkoortortaqarfimmeereersunik nakkutilliivimmi peqqissaasoq Louise Jensen, suleqatigiinnut napparsimasunik paaqqutarinninnermik nakorsaanermillu isumaginnittunut ilaasoq, nassuiaavoq. Suleqatigiit aqqaneq marluusut taarseraallutik sulisarput. ” Immikkoortortaq atulermalli ullormut napparsimasut sisamat missaat uninngasorisarpagut taakkulu tassaagajupput uummammikkut nappaatillit,” peqqissaasoq nangilluni oqaluttuarpoq.

Napparsimasut naamagisimaarinnittut uninngaviillu oqilisaanneqartut
Immikkoortortaq nutaaq napparsimasunut peruluttunut immikkoortortamut unittariaqanngitsunut taamaattorli nakkutigineqarnissamut nakorsarneqarnissamullu annertunerusumik pisariaqartitsisunut sunniuteqarpoq. Napparsimasunut taakkununnga ilaavoq 57-inik ukiulik Jakunguaq Skade Nuummeersoq. Taanna qanittukkut uummammi taqaagut annikitsumik milittoorpoq peruluttunullu immikkoortortameereerluni immikkoortortamut nutaamut nuunneqarluni. ”eqqissinartunik avatangiiseqarneq sulisullu suliassaminnik ilisimaarinnilluarnerat misigaara,” taanna oqaluttuarpoq. ”paarilluarneqartutut misigaanga ass. pigaartut allanik taarsertarnerat malugisanngilara,” itisiliivoq.
Aqutsisoqarfiup pisortaata Malene Marie Nielsen-ip napparsimmavissuarmi kiffartuussinerup nutaap naammagisimaarnera oqaatigaattaaq.

”Immikkoortortaq nutaaq napparsimasunut pinasuagassanut immikkoortortap uninngaviullu nalinginnaasup akornanniissimasunut pitsannguutaavoq. Napparsimasunut taakkununnga maanna pitsaalluinnartumik neqeroorutissaqalerpugut. Tamatuma peqatigisaanik immikkoortortaq nutaaq uninngavimmut siornatigut peruluttunut immikkut sulisussanik inissamillu atorfissaqartitsisartumut annertuumik oqilisaavoq. Taamaammat immikkoortortap nutaap iluaqutitai amerlapput,”
pisortaq naggasiivoq.

Attavissaq: Aqutsisoqarfiup pisortaa Malene Marie Nielsen oqarasuaatikkut: +299 34 43 93 imal. e-mailikkut: sundhedsledelsen@peqqik.gl