Imigassaq pillugu inatsit ullumi atuutilerpoq

Blomst Imigassaq pillugu inatsit nutaaq ullumi 1. marts 2018-imi atuutilerpoq. Imigassamut aalakoornartortalimmut atatillugu malittarisassat nutaat uani takusinnaavatit.

Imigassanik aalakoornartortalinnik nittarsaassinissamik inerteqquteqarnermi imigassanik aalakoornartortalinnik nittarsaassinerup killilersimaarneqarnissaanik
Nunarsuaq tamakkerlugu peqqinnissamik suliniaqatigiiffiup WHO-p kaammattuutai imigassaq pillugu inatsisikkut malinneqarput – pingaartumik imigassat aalakoornartortallit ersarissuunerannik, pissarsiarineqarsinnaanerannik nittarsaanneqartarnerannillu killilersuinissaq pillugu kaammattuutit eqqarsaatigalugit.

Imigassaq pillugu inatsimmi pineqarput imigassat 2,25 %-it sinnerlugit kimittussusillit. Inatsimmi ilaatinneqarput imigassanik aalakoornartortalinnik atuisunut tuniniaanerit sassaallertarnerillu tamarmik. Matuma kinguliani inatsisip pingaarnertut imarisai takusinnaavatit:

  • Inatsisartut inatsisaat malillugu pisiniarfinni imigassat aalakoornartortallit pisiassanit allanit assiaqusersorneqassapput. Ulloq 1. januar 2019-imi nalunaarut atuutilissaaq pisiniarfinni imigassanik aalakoornartortalinnik assiaqusersuinissaq pillugu malittarisassanik erseqqinnerusunik aalajangersaasoq.
  • Imigassanik aalakoornartortalinnik nittarsaassineq inerteqqutaalerpoq. Taamaattorli suliffeqarfiit ilisarnaataat suli takutinneqarsinnaapput. Aammattaaq nittarsaasseqqusinnginnerup kingunerisaanik nunatsinni suliffeqarfiit imigassanik aalakoornartortalinnik internetikkut nittarsaasseqqusaanngillat.
  • Imigassanik aalakoornartortalinnik tuniniaaneq piffissani ukunani pisinnaavoq:
    Ataasinngornermit tallimanngornermut nal. 09.00-imit 18.00-ip tungaanut.
    Arfininngornermi nal. 10.00-imit 14.00-p tungaanut.
    Sapaatini nalliuttunilu imigassanik aalakoornartortalinnik tuniniaasoqaqqusaanngilaq.
  • Imigassanik aalakoornartortalinnik sassaallertarneq piffissani ukunani pisinnaavoq:
    Ataasinngornermit sisamanngornermut nal. 12.00-imit 24.00-p tungaanut.
    Tallimanngornermi arfininngornermilu nal. 12.00-imit 03.00-p tungaanut.
    Sapaatini nalliuttunilu nal. 12.00-imit 24.00-p tungaanut.
  • Tamatuma saniatigut juulliaqqami juullerujussuarmilu imigassanik aalakoornartortalinnik sassaallertoqarsinnaanngilaq aammalu ukiortaami juullillu ulluisa aappaanni nal. 12.00-imit 03.00-p tungaanut sassaallertoqarsinnaalluni.
  • Inunnut takuneqarsinnaasumik aalakoortunut imaluunniit 18-it inorlugit ukiulinnut imigassanik aalakoornartortalinnik tuniniaaneq sassaallersinnaanerluunniit suli inerteqqutaavoq. Akuersissummik pigisaqartup tamanna pillugu pisinianut takuneqarsinnaasumik allagarsiissaaq.
  • Inuit 18-it inorlugit ukiullit, tamatumani niuertarfimmi ilinniartut saqisutullu ilinniartut pinnagit, sulinerminni imigassanik aalakoornartortalinnik tuniniaanatillu sassaallersinnaatitaanngillat
  • Inuusuttuaqqat 18-it inorlugit ukiullit nal. 20.00 kingorna inuusuttuaqqamut akisussaaffeqarluni inersimasumik ingiarteqanngikkunik sassaallertarfimmeeqqusaannginnerat ingerlaannarpoq.
  • Imigassanik aalakoornartortalinnik tuniniaanermik sassaallertarnermillu suliaqartut imigassanik aalakoornartortalinnik akisussaassuseqartumik tuniniaaneq sassaallernerlu pillugu pikkorissartitsinermi Naalakkersuisunit neqeroorutigineqartumi peqataasimassapput. Pikkorissarnermut nalunaartoqarsinnaavoq nittartakkami www.certifikat.gl
  • Pisortani suliffeqarfiit namminersortullu tamarmik arlalinnik sulisoqartut imigassaq pillugu politikiliornissamik pisussaaffeqarput. Suliffeqarfiit imigassaq pillugu politikiliornissamut atatillugu ilitsersuut pinngitsuuisinnaannginneq pillugu ilisimasaqarfimmit Allorfimmit saqqummersinneqartoq isumassarsiorfigisinnaavaat. Ilitsersuut ukunani takuneqarsinnaavoq www.allorfik.gl aamma www.peqqik.gl
  • Imigassanik aalakoornartortalinnik tamanik tuniniaanissami sassaallernissamilu akuersissuteqartoqartariaqarpoq. Imigassanik aalakoornartortalinnik tuniniaasinnaanermut sassaallersinnaanermullu akuersissut kommunalbestyrelsimut qinnutigineqassaaq. Ilitsersuut aammalu qinnuteqarfissiat uani takuneqarsinnaapput www.sullissivik.gl
  • Imigassanik aalakoornartortalinnik tuniniaasinnaanermut sassaallersinnaanermullu akuersissummik qinnuteqartut tamarmik imigassaq pillugu politikiliussapput, tassani takuneqarsinnaassalluni akuersissuteqartup imigassanik aalakoornartortalinnik tuniniaanerup sassaallernerullu akisussaassuseqartumik qanoq ingerlanniarneraa. Akuersissummik qinnuteqarnissamut imigassaq pillugu politikiliornissamut toqqammavissaq uani takuneqarsinnaavoq www.sullissivik.gl
  • Politiinut, nunaqarfimmi aqutsisunut, kommunimi meeqqanut inuusuttuaqqanullu ingerlatsivimmut kiisalu peqqissutsimut pitsaaliuinermullu kommunimi ingerlatsivimmut tusarniaareernikkut kommunalbestyrelsi imigassanik aalakoornartortalinnik tuniniaanissamut sassaalliinissamullu akuersissuteqarsinnaavoq. Imigassanik aalakoornartortalinnik tuniniaanermut sassaallernermullu akuersissutit ukiuni pingasuni atuuttussatut tunniunneqartassapput.
  • Assersuutigalugu pisortatigoortumik aaqqissuussani ataasiaannartumik pisuni imigassanik aalakoornartortalinnik sassaallersinnaanermut akuersissuteqarnermi imigassat aalakoornartortallit 16 % sinnerlugu kimittussusillit sassaalliutigineqarsinnaatitaanngillat.
  • Ataasiaannartumik akuersissuteqarnermi piffissaq sassaallerfiusoq nal. 12.00-imit – 24.00-mut pisinnaavoq, taamaattorli tallimanngornerni arfininngornernilu nal. 03.00-p tungaanut sivitsorneqarsinnaalluni.
  • Sumiiffinni najugaqarfiunngitsuni imigassanik aalakoornartortalinnik sassaallersinnaanermut akuersissutinik immikkut ittunik qinnuteqarnissamut periarfissaqarpoq.
  • Nerisassanik annissassanik pisinermut atatillugu imigassanik aalakoornartortalinnik pisinissaq periarfissaajunnaarpoq.
Annertunerusumik paasisaqarusukkuit www.inatsisit.gl -imi imigassaq pillugu Inatsisartut inatsisaat nr. 35, 23 november 2017-imeersoq takusinnaavat.

Annertunerusumik paasissutissanut atatillugu attavigineqarsinnaavoq naalakkersuisumut allatsi Nauja Møller, mobil: +299 58 26 54 imaluunniit e-mail: nmoe@nanoq.gl