Naalakkersuisut aammalu nunat avannarliit suleqatigiinnerat

Nunat avannarliit suleqatigiinnerannut Islandimi naalakkersuisoq Sigurdur Inge Johansson nunatsinnut tikeraarpoq Islandimi suleqatigiinnermut naalakkersuisoq Nuummi ulloq 28. februar Nunat Avannarliit isumasioqatigiinnerannut Naalakkersuisumit Agathe Fontainimit aggersarneqarpoq.

Nunat avannarliit suleqatigiinnerat 2019-imi Islandimit aqunneqassaaq aammalu Islandimi naalakkersuisut suleqatigiinnissamut pilersaarutaat Nunat Avannarliit Siunnersuisoqatigiiffiata ukiamut ataatsimiinnissaanni saqqummiunneqassalluni. Island Kalaallillu Nunaat Islandip Nunat Avannarliit Siunnersuisoqatigiiffianni siulittaasuunerani suleqatigiinnermi suliniutinut atatillugu suleqatigiinnissaq anguniagaqarfigilluartarpaat.

“Nunat avannarliit isumasioqatigiinnissaanni Islandimi suleqaterput aggersarpara Island siulittaasuulernissamini qanoq pilersaaruteqarnersoq paasisaqarfigerusullugu” taama oqarpoq Agathe Fontain.

Pisuussutinik atorluaaneq pillugu suliniutinik annertuunik Island 2014-imi siulittaasuuffeqarnermini aallartitsivoq. Aalisakkat nunatsinni pisarineqartut tunisassiarineqartullu iluanaarutigineqartarnerata annertusarnissaa piffissap taamaalinerani nunatsinni annertuumik aamma suliniutigineqarpoq.

“Islandip siulittaasuuffeqarnermini suliniutaa suliassaqarfimmi tamatumani nammineq suliatsinnut pingaarutilittut isumassarsiorfigaarput neriuppungalu ukiuni aggersuni nunat avannarliit suliniutaat ingerlateqqissinnaassallutigit nunatsinni inuussutissarsiutinik ineriartortitsinitsinnut iluaqutaasumik.” Taama oqarpoq Agathe Fontain

Annertunerusumik paasisaqarusunnermi saaffigineqarsinnaavoq Naalakkersuisup allattaa Nauja Møller oqa.: +299 582654 mail nmoe@nanoq.gl