Ilulissat Kangiata illorsuassaanik najugaqartut sanaartussapput

Kranit, usisaassuit suliffeqarfiutillillu maskiinaat aasaru Kitaani Ilulissat eqqaani Kangiata illorsuassaanut sanaartorfissami sisaat ikorfartuutit siulliit inississulerpatigit maskiinani inuttaasut tassaassapput Kalaallit Nunaanni suliffeqarfiutillit KJ Greenland A/S-imeersut. Suliffeqarfiup Kangiata illorsuassaata sanaartornissaanut pingaarnertut suliffeqarfiutilittut ingerlatsisuunissaq pillugu Realdania By & Byg’ilu isumaqatigiissut atsioqqammerpaa.

2018-imi aasakkut Ilulissat Kangiata illorsuassaanik sanaartorneq aallartippat nunat tamalaanut inornerunngitsunik alutornartorsuarnillu takorluuk kat qisunnut, sisannut, sallilikkanut igalaaminernullu najugaqartut nukissallit allanngortitereqataassapput. Ilulissat Kangiata illorsuassaa Namminersorlutik Oqartussat aamma Avannaata Kommunia suleqatigalugit Realdaniamit sanaartorneqassaaq, aammalu paasisitsiniaaffimmut Nordea-fondeni tapiissuteqartuuvoq. Realdaniap ingerlatseqatigiiffiutaata Realdania By & Byg’ip – Kangiata illorsuassaanik sanaartortitsisuu­sup – Ilulissani tunngaveqartumik KJ Greenland A/S-imik pingaarnertut suliffeqarfiutilittut isumaqatigiissut atsioqqammerpaa.

Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoq Hans Enoksen oqarpoq:

”Ilulissat Kangiani illorsuassap sanaartornissaanut nunatsinnit suliffeqarfimmik toqqagaqarneq nuannaarutigaarput. Ilisimasanik qitiusumik katersuiffissap Kalaallit Nunaanni siunissami takornariartitsinermut assut ilorraap tungaanut sunniuteqarnissaa naatsorsuutigaarput, illorsualiornerullu malittarinissaa qilanaaraarput”.

Avannaata Kommuniani borgmester, Palle Jeremiassen oqarpoq:

”Kangiani illorsuassaq ingerlanneqaleruni kommunimi suliffeqarfinnik pilersitsillunilu takornariartitsinermik annertusaassaaq. Ilulissanilu aallaaveqartumik pingaarnertut suliffeqarfiutilinnik toqqaanikkut suliniut maannakkumiilli najukkami sumiiffiusumi suliffeqartitsinermut ilapittuuteqarnera aallarteriissaaq.”

Realdaniami pisortani qullersaq, Jesper Nygård oqarpoq:

”Maanna suliniummi ingerlassap tullia tikipparput, titartaqqaakkat najoqqutassatullu titartakkat tigussaasutut sisammik, igalaaminermik qisummillu sanaartukkanut allanngortitaalerlutik. Issittup uppiata nuna qulaallugu ingerlaarneranik isumassarsiffiusup illup alutornaqisup piviunngornerata takunissaa pissangageqaarput. Aamma KJ Greenland A/S, najukkami iternga tikillugu ilisimasalimmik, aammalu qaasuitsup killeqarfiata avannaani sanaartornermi unammillerfiusartunik misilittagalimmik KJ Greenland A/S-ilu suleqatigiinnissarput qilanaaraarput.”

Karl Jensen, KJ Greenland A/S-imi pisortaq oqarpoq:

”Kalaallit Nunaaniinnaanngitsoq aammali nunarsuaq tamakkerlugu Ilulissani Kangiani illorsuassaq naleqqerfiulissaaq. Sanaartugassap illutamigut toqqammavissaasa piviusunngortinnissai qilanaaraarput neriuutiginartumik tikeraassat amerlasoorpassuit misigisassarsiorfissaasa suliaralugit aallartinnissarput qilanaaraarput.”

2017-imiilli sanaartorfimmi suliat aallartipput, taamanikkut sanaartorfigissaanermik Avannaata Kommunia aallartitaqarluni, taamaalilluni illuliorneq 2018-imi aasakkut aallartissinnaassammat. Ilulissat Kangiani illorsuassap 2020-mi  sanaartorneqareerluni piareernissaa naatsorsuutigineqarpoq.

Ilulissat Kangiani illorsuassaq

Ilulissat eqqaanni qitiusumik ilisimasanik siammarsaasarfiup sumiiffimmi takornariartitsinerup ineriartornera nukittorsassavaa, sumiiffiullu alutornartup oqaluttuarisaanera, allanngoriartornera pingaaruteqassusialu paasisitsiniaassutigissallugit, ilaatigullu silap pissusaata allanngoriartornerata pingaaruteqarnera pillugit oqaluttuarinnissalluni. Kangiani illorsuassaq, Dorte Mandrup arkitekter’imit titartagaasoq ukiumut inunnik 25.000-it missaannik pulaartoqartarnissaa naatsorsuutigineqarpoq. Illorsuassamut suleqatigiit tassaapput Namminersorlutik Oqartussat, Avannaata Kommunia, Realdania aamma Nordea-fondeni.

Uani annertunermik paasiniaagit: www.realdania.dk/ilulissat-isfjordscenter

Annertunerusumik paasisaqarusukkuit attavigikkit:

Naalakkersuisoqarfiup pisortaa Jørn Skov Nielsen, Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfik: Oq.: +299 55 61 88 // e-mail: jsn@nanoq.gl

Avannaata Kommuniata borgmesteria, Palle Jeremiassen: Oq.: +299 94 30 67 // e-mail: paj@avannaata.gl

Realdaniami pisortani qullersaq Jesper Nygård, tusagassiorfinnut pisortaq Pia Møller Munksgaard aqqutigalugu: Oq.: +45 29 69 52 49 // e-mail: pmm@realdania.dk

Pisortaq Karl Jensen, KJ Greenland A/S: Oq.: +299 94 26 63 // e-mail: karl@kj.gl

Realdania By & Byg’imi suliniutinut pisortaq, Frants Frandsen: Oq.: +45 2969 5275 // e-mail: ff@realdaniabyogbyg.dk