Imigassanik aalakoornartortalinnik nittarsaasseqqusinnginneq 1. marts 2018-imit atuutilissaaq

Imigassaq pillugu inatsit sisamanngorpat ulloq 1. marts atuutilerpat nunatsinni imigassanik aalakoornartortalinnik nittarsaassinissaq aallaaviatigut inerteqqutaalissaaq. Tamanna aamma inuinnarnut internetikkut nittarsaanernut atuuppoq. Taamaattorli sassaallertarfiit tuniniaaviillu niuertarfiup iluani assiaqutilinni imigassanik aalakoornartortalinnik tuniniaavinni sassaallertarfinnilu nittarsaassisinnaapput.

- ”Imigassanik aalakoornartortalinnik nittarsaassinissamik inerteqquteqarnermi imigassanik aalakoornartortalinnik nittarsaassinerup killilersimaarneqarnissaanik WHO-p kaammattuutai imigassaq pillugu inatsit malinneqarpoq. Nittarsaassinerit siunertaat ataasiinnaavoq, tassalu piseqqusaarineq aammalu sapinngisamik amerlasuunik pisiniarnissaq kiisalu meeqqat inuusuttuaqqallu nittarsaassinernut sunnertiasuusut ilisimavarput. Taamaattumillu imigassanik aalakoornartortalinnik nittarsaasseqqusaannginneq pitsaaliuinermi pingaaruteqarpoq meeqqat inuusuttuaqqallu eqqarsaatigalugit,” taama oqarpoq Peqqissutsimut Naalakkersuisoq Agathe Fontain.

Imigassanik aalakoornartortalinnik nittarsaassineq eqqarsaatigalugu malittarisassat makku 1. marts 2018-imit atuutilissapput:
  • Imigassanik aalakoornartortalinnik allagarsiinissaq allatuulluunniit nittarsaassinissaq inerteqqutaavoq. Nittarsaasseqqusaannginnerup nassatarisaanik nunatsinni suliffeqarfiit imigassanik aalakoornartortalinnik internetikkut nittarsaasseqqusaajunnaassapput.
  • Meqqit, saqqarmiusat, ilisarnaatit allalluunniit imigassamut aalakoornartortalimmut atuisup paatsorutaasinnaasaanik atuinissaq inerteqqutaavoq. Taamaattorli suliffeqarfiup tunisassiaasa ilisarnaataannut tamanna atuutinngilaq.
  • Imigassanik aalakoornartortalinnik akeqanngitsumik tunniussinissaq inerteqqutaavoq.
Nittarsaassinissamik inerteqquteqarnermi ilaatinneqanngillat tusagassiorfiit nunanit allaneersut kiisalu niuertarfinni sassaallertarfinnilu assiaqutilinni nittarsaassinerit.

Imigassanik aalakoornartortalinnik atornerluineq pitsaaliorniarlugu aammalu imigassap aalakoornartortallip ersarissuunerata, pissarsiarineqarsinnaanerata nittarsaanneqarsinnaaneratalu killilersimaarneqarnissaat pillugu WHO-p kaammattuutai imigassaq pillugu inatsimmi tunngavigineqarput. Nunat arlallit, tassungalu ilanngullugu Islandimi imigassanik aalakoornartortalinnik nittarsaasseqqusinnginneq imigassamik aalakoornartortalimmut tunngasutigut pitsaaliuinermik ilaattut atuutsippaat.

Imigassaq pillugu inatsit nutaat uani takusinnaavat: ”Imigassaq pillugu Inatsisartut inatsisaat nr. 35, 23. november 2017-imeersoq” www.inatsisit.gl


Annertunerusunik paasisaqarusuttut naalakkersuisup allattaanut Nauja Møller, mobil: +299 58 26 54 imaluunniit e-mail: nmoe@nanoq.gl saaffiginnissinnaapput