Tuttut neqaanni Sarcocysterinik (uumasuaqqat miluguffigisaminut ilanngartuisut) siumuisoqartarsimanera

2017-imi ukiaagaa tuttut neqaanni qaqorteqqasunut eqqaanarsinnaasunik qaqortutut saattukujuutut isikkulinnik siumuisoqartarsimanera pillugu piniartut amerlaqisut Pinngortitaleriffimmut saaffiginnittarsimapput. Tuttup neqaata misissuiffiginerani Pinngortitaleriffiup paasivaa miluguffigisaminnut ilanngartuisoq (Sarcocystis) matumani pineqartoq.

Sarcocyster Kalaallit Nunaanni tuttuni 1998-imili ilisimaneqarput, ukiulli amerlanerit sioqqullugit tuttuneereersimanissaat ilimagineqarluni. Sarcocyster Kalaallit Nunaanni tuttoqarfinni arlalinni siumorneqartarsimapput, soorlu Kangerlussuaq-Sisimiut, Akia-Maniitsoq, Ameralik aamma Qeqertarsuatsiaat.

Tuttut neqaanni qaqortunik ammalortuaqqanik nassaartoqartarsimanera pillugu ukiut ingerlaneranni Pinngortitaleriffik saaffigineqartarsimavoq. Ammalortuaqqat taakku qumaarsussuup Taenia krabbei-ip manniliarai. Tamakku aamma umimmanni siumorneqarsinnaapput.

Kalaallit Nunaanni inuiat akornanni Sarcocysterimik imaluunniit Taenia krabbei-mik tunil-laassuisoqarsimaneranik nalunaarsuisoqarnikuunngilaq. Mianersortoqarnissaali pillugu neqit nujuartaneersut minnerpaamik 75° Celsius angullugu uunnanneqartarnissaat inassutigineqarpoq. Taamatut uunnaaneq uumasuaqqanik miluguffigisaminut ilanngar-tuisinnaasunik toqoraassaaq. Neqi naammattumik qalaassaq siatarluunniit qasersumik kajorpasissumilluunniit qalipaateqalersarpoq.

Neqinik qerititerineq, pujoorineq panersiinerlu uumasuaqqat miluguffigisaminut ilan-ngartuisunut Sarcocysterinik imaluunniit Taenia krabbei-nik toqoraaneq ajorput, silaannarmut nillertumut panertumullu tulluarsarsimanerat pissutaalluni.

Neqit nujuartuneersut sialluarneqarsimanngitsut pinngortitamut qimaannarneqanngin-nissaat qimminullu nerukkaatissatut atorneqannginnissaat innersuunneqarpoq. Taakkumi taaneqartut uumasuni kiisortuni sinnikusiortartunilu qanoq sivisutigisumik uumasinnaanerat apeqqutaalluni parasitinik ingerlatitseqqiisinnaapput. Neqi tunillanneqareersoq pinngor-titamut qimaannagaq tuttut amerlanerit tunillatsinnissaannut kinguneqarsinnaavoq.

Neqimik Sarcocysterimik tunillanneqarsimasumik nerinianngikkuit neqi isumannaatsumik iginneqarnissaa inassutigissavarput. Tamannalu ikuallaaneq aqqutigalugu pisariaqarpoq. Taamaanngippat neqi tunillanneqareersoq nunamut matoorunneqanngikkuni ujaqqanik matoorluartariaqarpoq, taamaalilluni uumasut kiisortut sinnikusiortartullu angusinnaa-junnaassammassuk.

Sarcocyster uumasuni allani aamma nassaassaasinnaavoq, soorlu timmissani. Timmissat uumasulluunniit allat neqaanni qaqorteqqasunut assingullutik allanartunik siumuis-sagaluaruit tuttup neqaanut tunngatillugu inassutigineqartut atoqquneqarput.

Tuttup timmissalluunniit neqaanik qaqorteqqasunut eqqaanarsinnaasumik imalimmik pisaqarsimassaguit taakkua neqaannik misissugassatut misiligutissamik Pinngortitaleriffik pissarserusuppoq.

Inussiarnersumik inuulluaqqusilluta
Uumasut Nakorsaqarfik Inuussutissalerinermullu Oqartussaaffik, Pinngortitaleriffik aamma Nunatta Nakorsaaneqarfia

Apeqqutissat uunga ingerlatinneqassapput:
Kalaallit Nunaanni Uumasut Nakorsaqarfik Inuussutissalerinermullu Oqartussaaffik
Imaneq 1A 701
3900 Nuuk
Email: uumasut@nanoq.gl
Oqarasuaatip nr.: 34 50 00