Kinguaassiutitigut atornerluineq ataasiinnarluunniit akuersaarneqassanngilaq

Ullumikkut NAKUUSA-p kinguaassiutitigut atornerluisarneq akioniarlugu paasissutissaliani aallartippaa. Atornerluisarnermut akiuiniarnermi innuttaasut tamarmik peqataanissaminnut sakkussaqalernissaat paasissutissaliap siunertarivaa.

Nunatsinni kinguaassiutitigut atornerluisarneq kanngutsaatsuliornerlu annertoorujussuuvoq, tamatumalu kingunerisaanik innuttaasut peroriartorneranni atugarisaat atugarissaarnerallu sunnerneqartarpoq.

“Meeqqat kinguaassiutitigut atornerlunneqartarnerat inuiaqatigiittut unammilligassatta annersaasa ilagivaat. Kinguaassiutitigut atornerluineq ataasiinnarluunniit akuersaarneqassanngilaq. Tassa suliniutip oqariartuutaasaa pingaarnerit ilaat, neriuppungalu inuttaasunit tamanit tigulluarneqarumaartoq. Tamatta ullut tamaasa allanngueqataasinnaavugut”, Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq Sara Olsvig oqarpoq.

Kinguaassiutitigut atornerluisarnermut akiuiniarnermi Nakuusap paasissutissaliaa manna suliniutit annertuut ataqatigiissakkallu ilaattut isigineqassaaq. Pinaveersaartitsineq siusinaartumillu iliuuseqarneq ukkatarineqarput.

“Naalakkersuisuni atornerluinerit akiorniarlugit periusissiamik ataatsimoortumik suliniuteqaleruttorpugut, tassani immikkoortortat suliassaqarfiillu assigiinngitsut suleqatigiiffigisaanik suliniutissanik piareersaaffigisatsinnik. Atornerluinernik akiuiniarnermut suliniut 2018-imut Aningaasanut Inatsimmit aningaasaliiffigineqarpoq, soorlu aningaasaliissutit amerlanerusut siusissukkut pitsaaliunermillu suliniutinut immikkoortinneqartut. Upernaaq manna atornerluinermik akiuinissamut suliniutip saqqummiunnissaa qilanaaraara,
Naalakkersuisoq Sara Olsvig nangippoq.

Atornerluinermut akiuiniarluni ataatsimut periusissiaq sulianik ilisimasallit immikkoortullu attugaasut suleqatigilluinnarlugit ineriartortinneqarpoq, taassumalu suliniutissat nutaat ineriartortinneqartut pitsaasuunissaat qulakkiissavaa. Periusissaq iliuusissatut pilersaarutinik arlalinnik ikorfartorneqassaaq.

Atornerluinernut akiuiniarnermut suliniutip kinguaassiutitigut atornerluisarnerup annikillisarnissaa kiisalu innuttaasunut tamanut kinguaassiutitigut atornerlunneqarsimasunut pitsaanerpaamik ikiuinissaq tapersersuinissarlu qulakkiissavaa anguniarlugulu.

“Uannut pingaaruteqarpoq oqaatigissallugu oqartussaasut kisimiillutik suliaq kivissinnaanngimmassuk. Taamaammat Nakuusap suliniutaa pingaaruteqartorujussuuvoq. Meeqqap kinguaassiutitigut atornerlunneqarsimaneranik pasitsaassaqaraanni innuttaasut suut meeqqami eqqumaffigisariaqarneraat kiisalu innuttaasoq taamaattoqartillugu qanoq iliortassanersoq pillugit paasissutissiinermik pisariaqartitsisoqartoq misissuinerit takutinnikuuaat. Paasissutissaliaq pisariaqartitsinermut iluaqutaassasoq neriuutigaara”, Naalakkersuisoq Sara Olsvig naggasiivoq.

Sulisunut ilisimasalinnut ilinniartitsinerit pikkorissaanerillu annertuut ingerlanneqarput, taakkulu ilaatigut imaraat sumiginnagaanermut tunngasut, matumani kinguaassiutitigut atornerluinerit ilanngullugit. Assersuutigalugu sulisut sulianik ilisimasallit 700-it missaaniittut ulloq manna tikillugu ernumassutsimut uuttuut pikkorissarfigereersimalerpaat, taannalu tassaavoq meeqqat kinguaassiutitigut atornerlugaasimanermik eqqugaasimasut pitsaanerusumik maluginiarneqartalernissaat pillugu periaaseq.

Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoqarfik, Isumaginninnermut Aqutsisoqarfik kommunit peqatigalugit qulakkeerpaat innuttaasunut paasissutissaliap kingunerisaanik pisariaqartitsisunut upalungaarsimasoqarnissaa.

Paasissutissat allat naalakkersuisup allattaanut saaffiginnilluni pissarsiarineqarsinnaapput: Upaluk Poppel, oqarasuaat 53 93 71.