Svenskit 2018-mi Nunani Avannarlerni Ministerit Siunnersuisooqatigiivinut siulittaasuutitaqarnerat aallartippaat

Nordiske flag

Nunani avannarlerni suleqatigiinnermut ministerit svenskit 2018-mi Nunani Avannarlerni Ministerit Siunnersuisooqatigiivinut siulittaasuutitaqarnerat aallartippaat

Peqqissutsimut Nunanullu Avannarlernut suleqateqarnermut Naalakkersuisoq 2018-mi suleqatigiinnermut ministerit siullermeersumik ataatsimiinneranni peqataavoq. Sverige-p siulittaasuutitaqarnerani qulequtarineqarpoq ”Et inkluderende, innovativt og holdbart samt et trygt Norden”.

Ministerit ataatsimiinnermi aalajangiuppaat nunat avannarliit ataatsimut ukiumi tulliuttumi missingersuutissaannut 2018-mi annertussuseq attatiinnarniarlugu, tamanna 950 mio.Dkr.-nik annertussuseqarpoq.

Ataatsimiinnermut atatillugu NORDREGIO-p kingullermik Nunanik Avannarlernik allaaserisaa saqqummiunneqarpoq, tassani ilaatigut immikkut taaneqarpoq Nunat Avannarliit ataatsimut isigalugit nunarsuarmi aningaasaqarnikkut annertunerpaat aqqaneq aappaattut inissisimasut. Tamatumunnga ilutigitillugu nassuiaammi takuneqarsinnaavoq, Nunat Avannarliit nunarsuarmi immikkoortortat ilagigaat, pitsaanerpaanik aallaavissaqartut, Naalagaaffiit Peqatigiit 2030-p tungaanut nungusaataanngitsumik tunngaveqarluni ineriartortitsinermut anguniagaasa piviusunngortinniarneri pineqaraangata.

Ataatsimiinnermut atatillugu Peqqussutsimut Nunanullu Avannarlernut Suleqateqarnermut Naalakkersuisup Agathe Fontain-ip immikkut erseqqissarumavaa, Kalaallit Nunaannut annertuumik pitsaaqutaasoq, nunarput nunarsuup ilaani inuinnaat oqartussaaqataatitaanerinut taama siuarsimatigisumut peqataalluni suleqataasinnaappat aamma nungusaataanngitsumik tunngaveqarluni ineriartornermut tunngatillugu, soorlu tamanna pisoq Nunani Avannarlerni.

Politikkikkut qitiusumik sammisaqarfinni soorlu aningaasaqarnikkut, avatangiisitigut, isumaginninnikkut kultureqarnikkullu tunngasuni nunat avannarliit suleqatigiinnerat periarfissiivoq Naalakkersuisut politikkiannik avammut saqqummiussisarnissamut aammalu nunat avannarliit allat misilittagaannik iluaquteqartarnissamut.

”Nunat avannarliit ullumikkut tamanut saqqummiuppaat nunat avannarliit tuniniaanissamut suliniummut periusissiaat nutaaq, taanna ilaatigut ineriartortinneqarsimavoq siorna London-imi misilittakkat tunngavigalugit, tassani nunarput aamma peqataanikuuvoq. Neriuutigaara nunat avannarliit nittarsaassineq pillugu suleqatigiinnerannut peqataanitsigut nunarput pillugu ilisimasat annertunerulersinneqarumaartut taamaattumillu assersuutigalugu takornariat amerlanerusut nunatsinnukartalernissaannut pilerinnilersissallugit” Agathe Fontain naggasiivoq.


Ilisarnaat nutaaq nunanut arfineq pingasunut assersuutaavoq nunat avannarliit suleqatigiinnerannut, una aamma takuuk: https://thenordics.com