Kalaallit Nunaata OL-mut peqataanissaanut tapersersuinissaminut piareerpoq

Naalakkersuisoq Doris J. Jensen Kalaallit Nunaata OL-mut peqataanissaanut tapersersuinissaminut piareerpoq

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Kalaallit Nunaannit OL-imut peqataasunut marluusunut tapersersuinini takutinniarlugu PyeongChang-imut aallassaaq.

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq oqarpoq:

Nuannaarutigaara Timersornermut tunngasunik Naalakkersuisutut Korea Kujallermi OL-eqarneranut qaaqquneqarnera. Ukiuunerani OL-ip ammarnersiorneqarnerani najuunnissannut aamma Laila Friis-Salling-imut Martin Møller-imullu tapersersuinissannut qilanaartorujussuuvunga. Ukiukkut OL-eqarnerani nunatsinniik peqataatitaqaqqaarnitsinniik ukiut 50-it qaangiupput, qallunaat erfalasuat atorlugu, politikkikkullu anguniagaraara nunatta erfalasua atorlugu OL-imut peqataasalernissarput.”

Nangipporlu: “Ukiuunerani OL-imi peqataanissamut timersortartut marluusut anngunnerat ataqqilluinnarpara. OL-imut peqataaneq timersortartup misigisinnaasaanut pitsaanerpaanut ilaavoq – nittarsaassinerallu kusanarluinnarpoq. Pitsaanerpaamik kissaappakka. Nalunngilara, maannakkut peqataanerinnaalluunniit Kalaallit Nunaanni timersornermut pitsaasumik sunniuteqassasoq, tamatuma takutippaa, ilungersortumik angusassamillu toraagaqarluni suliniuteqarnikkut nunarsuatsinni pitsaanerpaanut ilannguttoqarsinnaasoq. Qularutiginngilara Martin Møller aamma Laila Friis-Salling meerartatsinnut inuusuttortatsinnullu amerlasuunut maligassiuisuusut.”.

Naalakkersuisoq Doris J. Jensen ulluni 9.-12. februaari 2018-imi nunani tamalaaneersut Timersornermut Naalakkersuisorpassuit allat peqatigalugit PyeongChang-imiippoq. Najuunnissamut pilersaarusiorneqarpoq, ammaanersiorneq isiginnaassallugu tamassuminngalu nunat assigiinngitsut naalakkersuisuisa ilasseqatigiinnissaannut peqataanissaq, minnerunngitsumillu 2 x 15 km-imut sisoraatinik ujakkaarneq 2 x 15 km Martin Møller-ip peqataaffigisaa najuuffigissallugu. Laila Friis-Salling februaarip 19-ani unammiffimmiissaaq .

 Annertunerusumik paasissutissat pillugit naalakkersuisup allattaa Rosa Thorsen mobili +299 553303 imaluunniit rosat@nanoq.gl attavigineqarsinnaavoq.