Tugtupit silisaq immikkut ilisimasalinnit nunanit tamalaaneersunit alutorineqarpoq

Ujaqqanik pinnersaasiassanik saqqummersitsinersuarmut Tucson Gem Shows, USA-mi Tucson-imiittumut nunatsinniit inunnik pingasunik peqataaffigineqartoq naammasseqqammivoq.

Aqqalo Kreutzmann, Nuummi Ujaqqerituut Peqatigiiffiata aallartitaa, Lars Schou, Foreningen af 16. August aallartitaa kiisalu ujarassiooq Arent Heilmann Aatsitassanut Ikummatissanullu Naalakkersuisoqarfimmeersoq Aatsitassanut Ikummatissanullu Naalakkersuisoqarfiup angalatippai.

Ujaqqanik pinnersaasiassanik saqqummersitsinerit nittarsaassinissamullu periarfissat ilisimaneqarnerat Aatsitassanut Naalakkersuisoqarfiup siaruarusuppaa. Taamaammat peqatigiiffiit Nuummi Ujaqqerituut Peqatigiiffiat Foreningen af 16. Augustilu Tucson Gem Showsimut peqataasussamik toqqaarusunnersut aperineqarput.

Ujaqqanik pinnersaasiassanik saqqummersitsineq pingaarnerit ilagaat, ukiullu tamaasa nunarsuarmi tamaneersunit inunnit 50.000 pallillugit amerlatigisunit ornigarneqartarluni. Tassani tuniniaasut, pisisartut, silisisartut, kuultimik pinnersaasiortut ilisimatusartullu taamaannerani ujaqqanik pinnersaasiassani susoqarneranik paasisaqarumasut naapittarput.

Aatsitassanut Ikummatissanullu Naalakkersuisoq Múte Bourup Egede, oqarpoq:
”Naalakkersuisut pingaartipparput nunaqavissunut aatsitassarsiornikkut ineriartornermi ikiuussinnaaffitsinni ikiuutissalluta. Pingaaruteqarluinnarpoq politikkikkut sulinermi nunaqavissut peqatigalugit aatsitassarsiorluni inuussutissarsornerup ineriatortinnissaa. ”

Kalaallit angalatitaasa ujaqqat ujaqqallu pinnersaasiassat assigiinngitsorpassuit, silineqanngitsut silisallu misissorpaat. Ujaqqanik pinnersaasiassanik saqqummersitsivinni ujaqqat pinnersaasiassat assigiinngitsunik pitsaassusillit qimerloornissaannut periarfissaqarluarpoq. Aallartitaasut aamma krystallinik kusanartunik kiisalu ujaqqanik pinnersaasiornermi atortunik takusaqarput. Ataatsimut isigalugu ujaqqanik pinnersaasiassanik nittarsaassineq isumassarsiffiulluarpoq.

Tucson Gem Shows aamma nammineq tunisassiat pillugit toqqaannartumik naliliititsiffiuvoq. Nuummi Ujaqqerituut Peqatigiiffiat Foreningen af 16. Augustilu ujaqqanik pinnersaasiamik tugtupitinik silisanik pitsaasorujussuarnik nassarput. Ujaqqat pinnersaasiat tugtugpitit silisat Kalaallit Nunaanni silisisartunit assigiinngitsunit silisaapput.

Ujaqqap pinnersaasiassat tugtupitit akimut ersingajattut piserusussinnaasunut nunanilu assigiinngitsuni ujaqqanik pinnersaasiortut kattuffiini immikkut ilisimasalinnut takutinneqarput. Immikkut ilisimasallit nunanit assigiinngitsuneersut tamarmik tugtupitip silinissaannut piukkunnassuseqarnera alutorsaatigaat. Immikkut ilisimasallit iluarisimaarinninnerannut kalaallit silisisartuisa pitsaasumik silisisimanerattaaq patsisaavoq.

Tugtupit akimut ersittoq nunarsuarmi ujaqqat pinnersaasiassat piumaneqarluartut allat assigalugit siunissaqarluartoq immikkut ilisimasallit siulittuutigaat. Akimmut ersittumit akimmut ersingajattumik tugtupitimut soqutiginninnerup aammattaaq tugtupitimik akimmut ersinngitsumik, nunatsinni ukiorpassuarni tunisassiarineqarsimasumut soqutiginninneq peqatigisaanik annertusassavaa. Tugtupitilli qaffasissumik pitsaassuseqartup nunarsuarmi ilisimaneqarlualernissaanut annertuumik suliaqartoqaqqaarnissaa pisariaqarpoq. Tamanna ilaatigut tugtupitip peqassutsikkut annertussusaata misissuiffiginissaa niuerutigissaanullu annertuumik nittarsaassinissamik suliaqartoqartariaqarluni.

Angalatinneqartut angerlamut apuukkunik allaaserisassaqarput, angalaneq nalunaarusiamik kinguneqassaaq, tassanilu ujaqqanik pinnersaasiassanik nittarsaassinermi peqataasut annikitsumik aatsitassarsiornermik akuersissutaatilinnit allanit ilisimasanik pissarsiatik ingerlateqqissavaat. Nalunaarusiarlu tamanut takusassiarineqassalluni.

Uunga saaffiginnilluni paasissutissat annertunerusut pissarsiarineqarsinnaapput:
Jørgen T. Hammeken-Holm
Naalakkersuisoqarfiup pisortaa - Aatsitassanut Naalakkersuisoqarfik
tlf: 346846, e-mail: joeh@nanoq.gl

Lars Schouip mobiliata normua +299 23186