Aviâja Egede Lynge Meeqqat Illersuisuattut ingerlaannassaaq

Aviâja Egede Lynge 2021 tungaanut Meeqqat Illersuisuattut toqqaqqinneqassasoq Naalakkersuisut aalajangerpaat

(kalaallisuua naqqitaq): 

Ulloq 10. januar 2018 Naalakkersuisut aalajangiipput Aviâja Egede Lynge Meeqqat Illersuisuattut toqqaqqinneqassasoq.
Taamatut iliortoqarpoq killilimmik atorfeqartitsineq pisortatigoortumik 1. juni 2018 naasussaammat.

Isumaginninnermut, Ilaqutariinnermut, Naligiissitaanermut Inatsisinullu Atuutsitsinermut  Naalakkersuisoq Sara Olsvig ima oqaaseqarpoq:

”Aviâja Egede Lyngep toqqaqqinneqarneratigut meeqqat illersuisuattut atorfiup ingerlanneqarnerata allannguuteqanngitsumik ingerlaannarnissaa qulakkeerneqarmat nuannaarutigaara. Meeqqat pisinnaatitaaffiisa qulakkeerneqarnissaannik suliaqarneq ukiuni kingullerni annertuumik angusaqarfiusimavoq taamaammat meeqqat illersuisuata meeqqat illersuisoqarfianik ineriartortitseqqinnissaa suliallu pingaaruteqaqisup ingerlaqqinnissaa malinnaavigissallugu qilanaaraara”.

Meeqqat Illersuisuata Aviâja Egede Lyngep toqqarneqaqqinnini tulluusimaarutiga:
Meeqqat sinnerlugit oqaaseqartartuuneq ingerlateqqissagakku ataqqinaatitut tiguara. Suliakka MIO’llu suliai tatigineqarmata assut qujamasunnaqaaq, Meeqqallu Illersuisuattut piffissami siullermi sulisimaninni ilisimalersimasama misilittagarilersimasamalu atorluarnissaannut qilanaarpunga”, Aviâja Egede Lynge oqarpoq.

Meeqqat illersuisuat pillugu Inatsisartut Inatsisaat malillugu Meeqqat Illersuisuattut killilimmik atorfeqarneq sivisunerpaamik ukiunik arfilinnik sivisussuseqarsinnaavoq. Taamaattumik Aviâja Egede Lynge maannakkut ukiut pingasut kingulliit Meeqqat Illersuisuattut sulisussanngorpoq.

Annerusumik paasisaqarniaraanni attavissaavoq:
Naalakkersuisumut Allatsi Nina Jul Larsen, Oqarasuaat 299 53 93 71.
Aviâja Egede Lynge, avi@mio.gl , Tlf. 53 12 74.