Kalaallit Nunaanni saliinissamik isumaqatigiissut atsiorneqarpoq

Danmark Kalaallit Nunaallu amerikamiut Kalaallit Nunaanni sakkutooqarfigisimasaanni saliinissamut isumaqatigiissuteqaqqammerput.

Miljø- og fødevareministeri Esben Lunde Larsen Naalakkersuisullu Siulittaasuat Kim Kielsen isumaqatigiissut isumaqatigiissut ullumi atsiorpaat Kalaallit Nunaata Københavnimi Sinniisoqarfianni.

Danmarkimi naalakkersuisut illersornissaq pillugu isumaqatigiissuteqarneranni nutaami ukiuni arfinilinni aggersuni atugassanngorlugit 180 mio. kr.-it immikkoortippaat, taakkulu piviusunngortinnissaat aqutsisooqatigiit Kalaallit Nunaannit Danmarkimiillu sinniisoqarfigineqartup akisussaaffigissavaat. Aqutsisooqatigiit ataatsimoorlutik aalajangiiffigissavaat sumi qaqugulu saliisoqassanersoq.

- Danmarkimi naalakkersuisut saliinissamik aningaasaliiniarlutik aasarli nalunaaruteqarput, nuannaarutigaaralu maanna aalajangiisumik isumaqatigiissuteqarfigigatsigu.Sulinermi aallartissinnaanngorparput. Ilisimavara Kalaallit Nunaanni suleqatitsinnit tamanna aamma qilanaarineqartoq, aqutsisooqatigiinnillu Kalaallit Nunaannit Danmarkimiillu sinniisuuffigineqartumik pilersitsineq pitsaavoq,tassani ataatsimoorluni suliassanik aalajangiisassallutik, Esben Lunde Larsen oqarpoq.

- Kalaallit Nunaannit ukiorpassuarni kissaatigineqarsimavoq amerikamiut sakkutooqarfigisimasaanni saliisoqassasoq. Danmarkimi naalakkersuisut suliassaq pillugu akisussaaffimmik tigusinerat saliinissallu ingerlanneqarnissaannut ukiuni tulliuttuni suleqatigiinnissarput nuannaarutigaara, Naalakkersuisut Siulittaasuat Kim Kielsen oqarpoq.

Isumaqatigiissummi pineqarput amerikamiut sakkutooqarfigisimasaat atorunnaarnikut allamillu isumaqatigiissuteqarfigineqarsimanngitsut. Kalaallit Nunaat Danmarkilu ataatsimoorlutik amerikamiut atortukuminnik qimatsivigisimasaanni sumi saliisoqassanersoq aalajangissavaat.

Aqutsisooqatigiit ilaatigut aalajangiiffigissavaat sumi saliisoqassanersoq, qanoq tulleriiaarisoqassanersoq kiisalu pitsaasumik sukkasuumillu saliisoqarnissaa qulakkeerniarlugu qanoq iliortoqassanersoq. Aqutsisooqatigiit aamma sumiiffinni mingutsitsinerup nalilersorneqarnissaata pisariaqarneranik aalajangiissapput.

Sumiiffiit isumaqatigiissummi ilaatinneqartut ilagaaq Marraq Nuup kujataaniittoq aamma Ikkatteq Tasiilap eqqaaniittoq. Marraq Ikkatterlu sorsunnersuup aappaanni Atlantikoq qulaallugu timmisartuussinermut atugassatut amerikamiunit pilersinneqarsimasunik qimatanik mittarfeqarput. Ikkattemi mittarfiup eqqaani nappartarpassuit orsussaasiviusimasut, illorsuakut angallassissutaasimasullu qimanneqarsimapput.

Isumaqatigiissut uani atuaruk.



Paasiniaaffissat:
Tusagassiivimmi pisortaq Paornánguaq Kleist, Namminersorlutik Oqartussat, mobil +45 31 70 42 67
Miljø- og Fødevareministeriami tusagassiortulerisut pisortaat Jens Fuglsang Edelholt, , mobil +45 91 35 69 96