Suka K. Frederiksen: Københavnimi sapaatip akunnera iluatsiffiulluartoq

Københavnimi sapaatip akunnera pisoqarfiulluarsimaqaaq, ilaatigut Tunngaviusumik Inatsisissaq Pillugu Isumalioqatigiisitap katitigaanera Naalakkersuisunit aaqqiissutissanik suliaqartoqarsimalluni, taassumalu saniatigut Namminiilivinnissamut, Nunanut Allanut Nunalerinermullu Naalakkersuisoq Suka K. Frederiksenuna sapaatip akunnera Nunanut Allanut Ministerimik, nunat aallartitaat assigiinngitsut aammalu Naalakkersuisut Siulittaasuata ukiortaami ilasseqatigiisitsineranut peqataasimalluni.

Naalakkersuisoq Nunanut Allanut Ministerimik ataatsimeeqateqarnera akaaraqatigiissumik ingerlanneqarpoq tassanilu Pituffik Thule Air Basemi sullissinissamut isumaqatigiissut pillugu tigussaasumik siuariartoqarnissaa naammassisaqartoqarnissarlu siunertaralugu ukkatarinnippoq. Naalakkersuisup naqissuserpaa Kalaallit Nunaannut kalaallinullu inuiaqatigiinnut pitsaanerpaamik iluaqutiginninnissaq siunertaralugu Kunngeqarfimmit isumaqatiginninniarnerit ingerlanneqartut. Ministeri Naalakkersuisorlu isumaatigiipput anguniagaq taanna pillugu amerikamiunik isumaqatigiittoqartariaqartoq, isumaqatigiittoqassasorlu. Ministerip Naalakkersuisullu aammattaaq Nunat Avannarliit Killiit niuernikkut suleqatigiinnissamut isumaqatigiissut oqaloqatigiissutigaat, tassanilu Naalakkersuisumit Nunanut Allanut Ministeriaqarfiup suliamik ingerlatsisimanera pakatsissutigalugulu ernummatigalugulu uggornartippaa. 

Taakku saniasigut nunarsuarmi arfanniartarneq pillugu ataatsimiititaliarsuaq (IWC) pillugu, issittumi suleqatigiinneq, EU-p missingersuutissai pillugit suleqatigiinnissamut isumaqatigiissut aammalu Brexit taamatullu Ilulissani isumaqatigiissutup 2018-imi ukiunik qulinngortorsiornissaa pillugit oqaloqatigiittoqarluni.

Nunanut Allanut Ministerimik ataatsimeeqateqannginnermi Naalakkersuisup Danmarmi amerikamimiut aallartitartaavat Carla Sands, Danmarmi Kinap aallartitaa Deng Ying taamatullu Canadap aallartitaa Emi Furuya ataatsimeeatigai. 

Amerikap aallartitaa qaammatip ataatsip matuma siorna atorfimmini aallartippoq, Danmark kisiat pinnagu aammali Kalaallit Nunaanni Savalimmiunilu USA sinniisuuffiginissaanut qilanaarutigeqaa. Kalaallit Nunaat USA-lu issittumi suliat pillugit qanimut suleqatigiipput, tassani Issittumi Siunnersuisooqatigiit aamma ilisimatusarneq sakkutooqareqarnerup saniatigut eqqartorneqarput. 2018 ukiup affaani siullermi Aallartitap Kalaallit Nunaannut tikeraarnissani piviusunngortikkusuppaa. 

Aallartitap Deng Yingip Kalaallit Nunaannut soqutiginninnini ersersilluarpaa, Kalaallit Nunaata Kinallu qanimut suleqatigiinnerup ineriartorsimaneq nuannaarutigaa. Ukiap ingerlanerani kalaallit pisortatigoortumik tikeraarsimanera kinamiunit kalaalliniillu naammagisimaarluarneqarpoq. Suleqatigiinnerup inerisaqqinnissaa qilanaarfigineqarpoq, ilaatigullu 2018-p ingerlanerani kinamiut kulturiat-, aammalu filmfestivaleqarnissaat siunertarineqarpoq. 

Canadamiut aallartitaata Emi Furuya-ip septembarimi angalaqatigisani peqatigalugit Kalaallit Nunaannut tikeraarsimanertik qujassuteqarfigaa. issittoq pillugu siammasissumik suleqatigiinneq pillugu canadap tungaanit pitsaasutut isigineqarpoq, taamatullu ilaatigut illuatungeriilluni killeqarfiit pillugit suleqatigiinneq nuannaarutigineqarluni.

Naggataatigullu Naalakkersuisoq Naalakkersuisut Siulittaasuata Københavnimi ukiumoortumik ukiortaami ilasseqatigiisitsinerani peqataavoq. Ilasseqatigiisitsinermi danskit ministeriinik arlalinnik, nunat allat attaveqaataat aammalu nunat allat Danmarkimi aallartitanik naapitsinissaq ilassinninnissarlu periarfissaqarfigineqarpoq.

 

Paasissutissanik annertunerusunik pissarsiaqarusukkussi attavigisiuk Naalakkersuisoqarfimmi pisortaagallartoq Jacob Isbosethsen +45 40402623 / +299 556772