NAKUUSAp suliniutaanut tunngatillugu isumaqatigiissutit

Naalakkersuisut Kommune Qeqertalimmut Avannaata Kommunianullu nutaamik suleqatigiinnissamut isumaqatigiissuteqarnerat

Nuannaarutissaavoq kommunit maannamut tamarmiullutik NAKUUSAp suliniutaanut “Uagut ulluinnarput Uagut niperput”-mut atsiorsimalermata. Decemberip qaammataani 2017-imi Naalakkersuisoq Sara Olsvig kiisalu  Kommune Qeqertalimmi borgmesteri Ane Hansen Avannaata Kommunianilu borgmesteri Palle Jeremiassen atsioqatigiipput.

Uagut ulluinnarput Uagut niperput” NAKUUSAp suliniutaasa ilagivaat, tassani kommunit Meeqqat Isummersorfianik atuarfinnilu Nakuusaaqqanik pilersitsinissaq siunertaavoq, taamaaliornikkut inuiaqatigiinni meeqqat nipaasa tusarneqartalernissaat anguniagaalluni.

Kommunit Meeqqat Isummersorfii tamarmik immikkut 13-iniik 18-it tungaannut ukiulinnik ilaasortaqarput, tassani inuusuttuaraq nammineerluni ilaasortaarusunnerminik qinnuteqarnermini ilaasortanngortitaasarluni. Kommunip Meeqqat Isummersorfia kommunip politikeriinut siunnersortitut inissisimasuuvoq.

Saniatigut NAKUUSA ukiumut ataasiarluni Meeqqat Isummersorfiinik ataatsimoortitsilluni ataatsimeersuartitsisarpoq, inuiaqatigiinnut tunngassuteqartunik qulequtaqartitsisarluni. Ataatsimeersuarneq kingulleq Ilulissani oktoberip qaammataani pivoq, tassanilu Ilinniagaqarnissamut piareersimaneq qulequtaritinneqarluni.

Atuarfiit Nakuusaarai atuartunit annernit ilaasortaaffigineqarput, taakkulu nunatsinni meeqqat sinnerlugit oqaaseqartartuullutik.

“Kommune Qeqertallip Avannaatalu Kommuniata meeqqat pisinnaatitaaffiisa nukittorsarneqarnissaannut peqataarusunnerat assut nuannaarutigaara, atuarfinni Nakuusaaqqanik kommuninilu taakkunani marluusuni Meeqqat Isummersorfinnik pilersitsinikkut tamanna pissaaq. Maannamut misilittakkatsinni ersarilluinnarsivoq kommunini Meeqqat Isummersorfeqartuni Nakuusaaraqartunilu kommuninit meeqqat atugaannik eqqummaariffigineqarnerunerat. Naalakkersuisunit anguniakkat ilagivaat meeqqat pisinnaatitaaffii sulinermi sinaakkutarineqarlutik nunatsinni atuutsinneqalernissaat”, Naalakkersuisoq Sara Olsvig oqarpoq.

Suleqatigiinnissamut isumaqatigiissutit Januarip aallaqqataani 2018-imiit ukiuni pingasuni atuuttussamik atuutsinneqalerput, ukiullu pingasut qaangiunnerinni isumaqatigiissut sivitsorneqarsinnaatitaalluni.

Upernaamut ukiamullu NAKUUSA Kommune Qeqertalimmi Avannaatalu Kommuniani ilinniartitsisunik pikkorissaanissaminut piareersaaleruttorpoq, taamaaliornikkummi atuarfiit Nakuusaaqqanik pilersitsinissaat anguneqassammat.

Meeqqat inuusuttuaqqallu tusarneqartalernissaannut Naalakkersuisoq Sara Olsvig qilanaalereeerpoq.

 

Paasisaqarnerorusukkuit attavigikkit:

Naalakkersuisup allattaa Nina Jul Larsen, +299 539371

Suliniummi suliaqartoq Najaaraq Møller, +299 346640, moln@nanoq.gl

Pilersaarutiliornermi aqutsisoq, Arnavaraq Jørgensen, +45 30281895, ajoergensen@unicef.dk