Nunat Avannarliit Killiit suleqatigiinnerat

Namminiilivinnermut, Nunanut allanut Nunalerinermullu Naalakkersuisoq Suka K. Frederiksen

Københavnimi decembarip aallaqqaataani 2017 ”SDGs in the Arctic – Local and Global perspectives” pillugu qaffasissumik ataatsimeersuarneq Nunanut Allanut Ministerimit uanniillu qaaqqusisuuffigineqartumut atatillugu piffissami kingullermi maluginiakkakka pillugit oqaaseqalaarniarpunga.

Kalaallit Nunaanni nunanut allanut tunngasunut Naalakkersuisuuvunga, taamaattumillu nunat allat nunanut allanut politikkikkut pingaartitaat oqaaseqarfigisinnaanagit.

Issittunut tunngasut nunarsuarmioqatigiinni pingaartinneqartut Naalakkersuisunit Kalaallit Nunaanniillu ukkatarineqarput. Kunngeqarfiup issittumi politikkia Kalaallit Nunaannut pingaaruteqarpoq, taamaattumik Namminiilivinnermut, Nunanut allanut, Nunalerinermullu Naalakkersuisutut politikki tamanna kalaallinit pingaartinneqartoq suliaqarfiginissaa pingaartinnissaalu taamaattussaannartut isigaara.

Tamanna naalakkersuinikkut sulinermi peqataalluarfiginissaanik pingaaruteqarpoq, soorlu decembarip aallaqqaataani 2017 Issittoq pillugu SDG-mik ataatsimeersuaartitsinermi pisoq.

Nunarsuarmi imminut napatinnissap ineriartortinneqarnissaanik siunertaqartumik Nunat tamalaat Naalagaaffiit Peqatigiit peqatigalugit sulissuteqarnera tamatsinnut tunngassuteqarpoq minnerunngitsumik aamma siunissami kinguaariit tullii atorumaagaannik. Nunarsuarmilu anguniakkani pineqartuni Kalaallit Nunaannut aamma arlalippassuartigut attuipput, taammaammat suliniutit pineqartut Naalakkersuisut tapersersugaraat, Naalakkersuisullumi sinnerlugit tamanna peqataaffigaarput.

Ilisimaneqareersutut danskit naalakkersuisuinut immikkoortuni arlalitsigut isumaqataasanngilagut. Savalimmiuniillu suleqaterput arlalitsigut paasilluarsinnaavara, uagulli allatut qisuariarfigisimavarput.

Naalakkersuisutut suliassaqarfinni suliaqarninni aaqqiissutissarsiornissamik ujartuineq pingaartitaraara, tamatumalu saniatigut aamma nunanut allanut ministeriaqarfiup aggustip aallaqqaataani 2017 nunat avannarliit killiit suleqatigiinnissamut isumaqatigiissutaat pillugu Namminersorneq pillugu inatsisip qanoq paasineqarsinnaanerannik oqariartuutaat apeqquserluarsinnaallugu. Isumaqarpungali tamanna danskit tungaaniit silatusaartumik naleqquttumillu aaqqinneqanngitsoq.

Maanna allaffissornikkut Nunanut Allanut Ministeriaqarfik attavigereerparput aammalu aaqqiissutissanik ujartueqatigalutigu. Qanoq isumaqarnerput pillugu Nunanut Allanut Ministeriaqarfik ilisimatereerparput, sooq suliassaq Nunanut Allanut Ministeriaqarfik suleqatigalugu nunat marlut akornanni suliassatut isigineripput, tamannalu maanna ingerlavoq.

Annertunerusunik paasisaqarusukkussi Nalakkersuisoqarfimmi Pisortaagallartumut Jacob Isbosethsen saaffiginnissinnaavusi oqarasuaat +299345152