Nuugaatsiap eqqaata aatsitassarsiorfigineqarnera unitsinneqarallarpoq

Nuugaatsiap eqqaani piffik qaqqap sisoornissaanut suli aarlerinartoqarnera pissutigalugu matuneqarallarpoq

Nunaqarfiup Nuugaatsiap eqqaani piffik piffissami killilerneqanngikkallartumi aatsitassarsiornermik ingerlatsinermut matuneqarallassasoq Naalakkersuisut aalajangerpaat. 2017-mi tamaani qaqqap sisoornerata ulussaarsuaqarneratalu kingorna qaqqap sisoorsinnaaneranut suli aarlerinartoqarpoq. Piffik 1964 km2-sut annertussuseqartoq innuttaasut inuillu aatsitassarsiornernik ingerlatsinermi akuusut isumannaatsuunissaat qulakkeerniarlugu matuneqarallarpoq.

Piffiup matuneqarnera Aatsitassanut Ikummatissanullu Naalakkersuisoqarfiup innersuussuteqarneratigut pivoq. Naalakkersuisoqarfiup Ujarassiornermut Immikkoortortaata piffik maanna matuneqarallartoq misissuiffigaa, piffimmilu sulianik ingerlatsineq qaqqap sisoorneranik aarlerinartorsiorfiusinnaallunilu kinguneqarsinnaasoq nalilerlugu. Naliliineq ilaatigut piffimmi suliffeqarfimmit namminersortumit ujarlernissamik qinnuteqaateqartoqarnera tunuliaqutaralugu ingerlanneqarpoq.

Sooq aasaq manna qaqqap sisoornera pinersoq suli killilimmik ilisimaneqarpoq. De Nationale Geologiske Undersøgelser for Danmark og Grønland (GEUS) qaqqap sisooqqissinnaaneranut aarlerinaammik misissuinissamik suliniummik aallartitsivoq. Aatsitassanut Ikummatissanullu Naalakkersuisoqarfiup suliniut tamanna piffimmilu ilisimasaasinnaasut nutaat allat ilaatillugit, piffiup aatsitassarsiornernik ingerlatsinermut ammaanneqarsinnaanera ingerlaavartumik nalilersortassavaa.

Piffiup ammaqqinneqarsinnaanerata tungaanut aatsitassarsiornermik ingerlatsinissanut sunulluunniit akuersissutinik tunniussisoqassanngilaq, taamaalillunilu piffimmi akuersissuteqarluni akuersissuteqarnaniluunniit aatsitassarsiornernik ingerlatsineq inerteqqutaavoq.

Piffik  matoqqatinneqartoq taassumalu isortartussusaa pillugu paasissutissat www.nunagis.gl aamma licence-map.bmp.gl takuneqarsinnaapput. 

Ukununnga saaffiginnilluni paasissutissat annertunerusut pissarsiarineqarsinnaapput:

Naalakkersuisoqarfiup pisortaa Jørgen T. Hammeken-Holm, oqarasuaat: 346846, e-mail: joeh@nanoq.gl

imaluunniit

Naalakkersuisup allattaa Jane Petersen Lantz oqarasuaat: 346839/597909, e-mail: japl@nanoq.gl

Nunap assingani nunap matugallarneqartup sumiiffia takuneqarsinnaavoq: