Aalisarnermut nunat immallu issittut avannarlerni isumaqatigiissusiortoqarpoq

Aatsaat taamatut isumaqatigiissusiortoqarpoq, tassa ajornartorsiut suli pilersinneqanngitsoq nunat taakku qulit ajornartorsiummik aaqqiissuteqarmata. Isumaqatigiissutsip siunissami nunat immallu issittut avannarlerni aalisarsinnaaneq unitsissanngilaa kisianni issittup imartaatani aqunneqanngitsumik aalisarfigineqarnissaa pinngitsoortissuaa.

Issittup imartaaani aalisarnissamut isumaqatigiissutissamut isumaqatigiinniarnerit naammasseqqammerput. Naalagaaffiit annertuut qulit aalisartoqarfiusut, tassa avataani naalagaaffik Kalaallit Nunaat (Kunngeqarfik Danmark, Savalimmiunut Kalaallit Nunaannullu atatillugu), Canada, USA, Rusland aamma Norge Islandilu, EU, Korea kujalleq, Japan aammalu Kina issittup imartaatani aqunneqanngitsumik aalisarfigineqarnissaa pinngitsoortinniatlugu isumaqatigiipput. 

Ukiut tamaasa siku issittup imartaaniittoq milliartortarpoq taamaasillunilu nunat issittut imartaani aalisartoqarnissaanut periarfissaqalertitilluni, Sikuiuitsup Avannarlermik aamma taaneqartartumik.

Tamaani suli aningaasarsiutigalugu aalisartoqalinngilaq. Tamaani imaani isumalluutit pillugit ilisimatusarneq killeqartorujussuuvoq, siunissamili qanittumi issittup imartaani aalisakkanik aalisarneqarsinnaasunik naammattunik peqanngitsoq ilisimatuut isumaqatigiillutik. Silap pissusaata allanngoriarternerali issittumilu kissatsikkiartornera sukkasuumik ingerlavoq, taamaammat ineriartornermut malinnaanissaq paasisaqarluarsimanissarlu isumaqatigiissummut pisariaqarpoq.

Aatsaat taamatut isumaqatigiissusiortoqarpoq, tassa nunarsuarmiut mianersornissamik tunngaviup atorneqarnissaa siullermeertumik isumaqatigiissutigimmassuk aamma aalisarneq suli aallartinngitsoq aamma tamaani imaani isumallutinik aaqqinneqarsinnaanngitsumik ajoqusiisoqannginnerani malittarissaliortoqarmat.

’Assut nuannaarutigaara nunat tallimat issittup imartaanut sineriallit isumaqatigiissutissamut isumaqatigiissinnaangatta. Isumaqatigiinniarnerit assut ilungersunarsimapput, kisianni Issittumi aalisakkatigut isumalluutigut pitsaasumik paarissagigut tamatta soqutigisaraarput. Nuannaarpunga sanilitsinni issittumi naalagaaffiit sineriallit immikkut soqutigisaannik isumaqatigiissut eqqarsaatiginnimmat, tassa issittup imarpia.

Immikkut nuannaarutigaara isumaqatigiissutip nunat inoqqaavi tamaanilu inuit taakkulu Issittumi pinngortitami ataqatigiinnerit pillugit ilisimasaannik ataqqinnimmat’, Tamanna Aalisarnermut, Piniarnermut Nunalerinermullu Naalakkersuisoq Karl-Kristian Kruse oqarpoq.

Aalisagaqarneq pillugu annertunerusumik ilisimasaqalernissatta tungaanut tamaani nunat aalisannginnissaannut isumaqatigiissut pisussaaffiliivoq. Taamaattumik siunissami akuttunnitsumik ataatsimiiffiusussamik nunani tamalaani ilisimatuussutsikkut suleqatigiinnerup aallartinnissaanik isumaqatigiissut imaqarpoq. Imaani pinngortitami ataqatigiinnerit pillugit nunat inoqqaavisa immikkut ilisimasaat isumaqatigiissummi ataqqineqarput. 

Isumaqatigiissut tassaanngilaq issittup imartaa siunissami qaquluunniit eqqissisimatinneqassasoq; akerlianik isuma pingaarutilik tassaalluni naammattunik ilisimasaqalersinnata aamma piujuartitsinermik tunngaveqartumik malittarisassat pisariaqartut inissinneqarpata aalisarneq ammaanneqassanngitsoq. 
Isumaqatigiissut inatsisitigut pituttuisuuvoq, taamaattumillu siunissami Issittumi ineriartornermut sakkortuumik sunniuteqassalluni.

Kalaallit Nunaat eqqarsaatigalugu issittumi imartanut mianernartunut ammaanneqalersunut mianersortumik piujuartitsinermillu tunngaveqarnissap qulakkeerneqarnissaa naalagaaffittut sinerialittut immikkut akisussaaffeqarnerput isumaqatigiissummi tassani erseqqissumik naluaarutigineqarpoq peqatigisaanillu isumaqatigiissut taanna naalagaaffinnut aalisartunut allanut angisuunut aamma pisussaaffiliinera qulakkeerneqarluni.

Isumaqatigiissut 2018 ingerlanerani ministerinik nunat qulit assigiinngitsuninngaanneersunik atsiorneqassaaq, tassanilu Kalaallit Nunaat nalliuttorsiorpaluttumik atsiortitinissami Kalaallit Nunaannut qaaqqusivoq.
Isumaqatigiinniarnerit ulloq 30. november 2017-imi USA-mi Washington, D.C.imi naammassineqarput. Taanna isumaqatigiinniarnerit arfinilissaraat. Isumaqatigiinniarnerit atorfilittatigut ingerlanneqarsimapput. Kalaallit Nunaat Kunngeqarfiup Danmarkip aallartitaanut Aalisarnermut Piniarnermut Naalakkersuisoqarfikkut isumaqatigiinniarnermi siuttuusimavoq. Kunngeqarfiup aallartitaanut aamma ilaapput ICC Kalaallit Nunaat, Washington D.C.-imi Kalaallit Nunaata Sinniisoqarfia, danmarkimi Nunanut allanut ministeriaqarfik aamma savalimmiuni Nunanut Allanut Inuussutissarsiornermullu ministeriaqarfik.

Oqaaseqaat Chairmans Statement (tuluttuujuvoq)

Saaffigisassaq: Birgitte Jacobsen, Aalisarnermut Piniarnermullu Naalakkersuisoqarfik, +299 548901