Annikitsumik aatsitassarsiornermi suliniutit marluk

Assiliinermik pikkorissarneq tamanullu ammasumik oqalugiarneq

Aatsitassarsiorfimmik piginnittup Jeffrey Swangerip “Ujaqqanik pinnersaasiassanik qalluiffiga”-mik qulequtalimmik tamanut ammasumik oqalugiarnissaanut Aatsitassanut Ikummatissanullu Naalakkersuisoqarfiup innuttaasut tamaasa aggersarpai. Jeffrey Swangerip qanoq ililluni Californiami ujaqqanik pinnersaasiassanik qalluiffimminik ingerlatsinini, qanorlu ililluni ujaqqanik pinnersaasiassanik tunisassiornermi peqatigisaanik ujarassiornermik takornariartitsinermik ingerlataqarnerminik saqqummiussissaaq.

Tamanut ammasumik oqalugiarneq marlunngornermi ulloq 14. November 2017-imi nal. 19-22 Ilisimatusarfiup Auditoriaani ingerlanneqassaaq.

Aatsitassanut Ikummatissanullu Naalakkersuisoqarfik sapaatip akunnerani uani annikitsumik aatsitassarsiornermik akuersissutaatilinnut assiliinermik pikkorissaassaaq. GEUS-imi ukiorpassuarni ujarassiornermi assiliisartoq Jakob Lautrup maanga pikkorissaajartortitseqqullugu qaaqquarput. Taassuma qanoq ililluni ujaqqanik pitsaanerpaamik assiliisoqartarnera ilinniartitsissutigissavaa.

Annikitsumik aatsitassarsiornermik ingerlatsisussaagaanni assigiinngitsunik arlalinnik piginnaasaqarnissaq pisariaqarpoq. Aatsitassanut Ikummatissanullu Naalakkersuisoq Múte Bourup Egede, oqarpoq:

”Annikitsumik aatsitassarsiorfiuteqateqarluni ingerlatsiniaraanni sunut tamanut ilisimasaqalaarnissaq pisariaqarpoq. Taamaammat annikitsumik aatsitassarsiornermik akuersissutaatillit piginnaasaasa ineriartortinnissaat aamma aalluppara.”

Ujaqqanik assiliisarneq immikkut piginnaaneqarfigissassat ilaattut  taaneqartariaqarpoq,   taamaalillunimi  assersuutigalugu annitsumik aatsitassarsiortutut nammineerluni assilisat nittartakkakkut quppernermi kusanarnerusumik saqqummiunneqarsinnaammata.

Paasissutissat annertunerusut pissarsiarineqarsinnaapput:

Jane Petersen Lantz

Naalakkersuisup allattaa – Aatsitassanut Ikummatissanullu Naalakkersuisoqarfik

tlf: 346839, e-mail: japl@nanoq.gl

 

Jørgen T. Hammeken-Holm

Naalakkersuisoqarfiup pisortaa – Aatsitassanut Ikummatissanullu Naalakkersuisoqarfik

tlf: 346846, e-mail: joeh@nanoq.gl