Qimminut akiuussusersuisartutut allagartartaartut 26-it

Najukkani qimuttoqarfinni qimminut, qimmit peqqinnissaanut qimmillu nappaataanik annertunerusumik ilisimasaqalernermikkut qimminut akiuussusersuisartutut allagartartaartut 26-it pilluaqquagut

Kalaallit Nunaanni Uumasunut Nakorsaqarnermut Inuussutissalerinermullu Oqartussaaffiup (UNIO) qimminut akiuussusersuisartutut kalaallinik ilinniartitsinertik sisamassaat naammasseqqammerpaa.  Pikkorissarnerit Ilulissani, Upernavimmi, Sisimiuni aammalu Ilulissani ingerlanneqarput.

Kalaallit Nunaanni qimminut akiuussusersuisartut 26-t maanna qimminik qimmuttunik mikrochips-inik nalunaaqutsersuisalernissaminnut qimmillu akiuussutissaanik kapoorisalersinnaanissaminnut ilinniartinneqarsimalerlutik allagartartaarput.

UNIO-p qimmit qimuttut peqqissuutinniarlugit nukippassuit atortariaqartarpai. Uumasut nakorsaanit ikiorsiisoqartarlunilu siunnersuisoqartarpoq, kalaallillu qimmiisa qimuttut piujuaannarsinnaanissaat qulakkeerniarlugu akiuussusersuisartunik ilinniartitsineq ingerlanneqarluni. Qimmeq qimuttoq kalaallit kulturikkut kingorngussaasa pingaarutillit ilagaat  "Qimmit Qimuttut pillugit Inatsit" -illu 1. januar 2017-imi allanngortinneratigut qimmit taakku siunissami piujuarnissaanut suliat annertunerusumik ukkatarineqalerput. 

Inatsisip allanngortinnerata kingunerisaanik qimmit tamarmik qimmit nappaataanut (hundesyge) parvovirus-imullu akiuussutissanik kapineqartartussanngorput.  Tamatuma saniatigut qimmit mikrochips-imik nalunaaqutsersorneqartartussaalerput, qimmillu ataasiakkaat taakkulu piginnittui pillugit paasissutissat nuna tamakkerlugu qarasaasiakkut toqqortaatigineqalerlutik.

Pikkorissarnerit nalinginnaasumik ulluni pingasuni ingerlanneqartarput.  Akiuussusersuisartussat ulluni marlunni siullerni qimmit timai timaasalu sananeqaataannut qimmillu avatangiisaannut, nappaatinut, inatsisinut, upalungaarsimalluni suliassanut, uumasut atugarissaarnissaannut aammalu uumasut peqqissusaannut kiisalu aseruuttoortoqartillugu periusissanut tunngasunik ilinniartinneqartarput.  Ullut pikkorissarfissat siulliit marluk akiuussusersuisartutut allagartartaarniarluni angusaqarfiusussamik misilitsinnermik naggaserneqartarput.

Ullut pingajuanni paasissutissat qarasaasiakkut toqqortaatit pillugit ilinniartitsisoqartarpoq.  Nalunaaqutsersuummi mikrochippiusumi paasissutissat piginnittumut qimmeqatigiillu pillugit paasissutissanik imaqarput.  Minnerunngitsumillu paasissutissat tamakku qarasaasiakkut toqqorsivimmi pigisassanngorlugit immiunneqartartussaapput, tassani ilanngunneqartartussaallutik qimmit akiuussutissanik sorlernik kapineqareersimanersut aammalu qimmit tulliani akiuussutisseqqinneqarnissaat qaqugu pissanersoq.

Qarasaasiami paasissutissat toqqortaatit sakkussaapput pitsassuit, taamaattorli qimmit piffissaq eqqorlugu akiuussusertittarnissaat aammalu akiuussusersuisartut sulinerannik ikorfartortarnissaat qimmiutillit ataasiakkaat akisussaaffigaat.

Ukiup siulliup ingerlanerani qimmit  piaraagunik inersimasuugunilluunniit pinngitsooratik pingasoriarlutik akiuussuserneqartartussaapput.  Akiuussusersuinerit siulliit marluk qaammammik ataatsimik akuttussusilerlugit ingerlanneqartartussaapput akiuussutissat iluaqutigineqassappata. Akiuussusersuinissamut piffissarititaasut malinneqanngippata qimmit aallaqqaataaniit akiuussusersorneqartariaqassapput.

Uumasunut Nakorsaqarnermut Inuussutissalerinermullu Oqartussaaffiup akiuussusersuisartunngortut nutaat suleqatiginissaat qilanaaraa.  Pineqartut innuttaasunik, oqartussanik minnerunngitsumillu Kalaallit Nunaanni qimminut tamanut annertuumik pingaarutilimmillu sullissipput. 

UNIO-mut saaffiginnissutit mail-ikkut uunga ingerlatinneqassapput uumasut@nanoq.gl

imaluunniit oqarasuaammut uunga +299 34 50 00