Aappariinni nakuusertarneq pillugu suliniuteqarnerup nukittorsarnissaa suli ukkatarineqarpoq

Sapaatip akunnerani uani nunatsinni qimarnguinni sulisunut Aasianni Kattunnermi pikkorissartitsisoqassaaq. Nunatsinni qimarnguinni sulisut misilittagaannik paarlaasseqatigiinnikkut sulisunillu ilinniartitseqqinnikkut aappariinni nakuusertarneq akiorniarlugu suliniutit nukittorsarneqarnissaat anguniagaavoq. Pikkorissartitsinermi ilaatigut apeqqutit makku sammineqassapput: Qanoq iliorluni arnap nakuuserfigineqartup illersornissaa naliliiffigineqartarpa? Aappariinneq asannilersoornermik aallartiffiusoq qanoq isilluni nakuusernermik kinguneqalersarpa?

Kattunneq pillugu suliniut Mary Fonden-ip, Danner-ip, Kalaallit Nunaanni qimarnguiit, Mælkebøttecenter-ip, Isumaginninnermut, Ilaqutariinnermut Naligiissitaanermut Inatsisinillu Atuutsitsinermut Naalakkersuisoqarfiup kiisalu OAK Foundation Denmark-ip akornanni suleqatigiiffiuvoq. Suliniut 2014-imi ingerlanneqalerpoq, 2019-imilu ukiup sisamararterutaa siulleq tikillugu ingerlasussaalluni. Ulloq manna tikillugu Kattunneq aqqutigalugu qimarnguinni sulisunut pikkorissartitsinerit arfinillit aamma sulisunut ilisimasalinnut ilaqutariinnik nakuusernermik eqqugaasimasunut sulialinnut isumasioqatigiinnerit pingasut ingerlanneqarsimapput.

Kalaallit Nunaanni nakuusertarnerup misissuiffiginerani paasinarsivoq arnat inersimasut 62 %-ii inuunerup ilaani nakuusernermik eqqugaasarsimasut, arnallu ukioqanngitsuniit 14-it angullugit ukiulinnik meerallit 16%-ii aapparisamiit timikkut nakuuserfigineqartarsimasut.

”Kattunnermi suleqatigiittoqarnera assut nersorusuppara. Aappariinni nakuusertarnermut akiuiniarnerit nukittorsassavagut. Peqatigitillugulu inuit qimarnguinni, amerlanertigut nammineq kajumissutsiminnik sulisut, nakuusernermik eqqugaasunut suliniutigisartagaannut qujamasuttorujussuuvunga. Nakuusernerup iluani kisitsisit takussutissat namminneq oqaluttuarput, tassuunalu takuarput nakuusernermik akiuiniarneq suli ingerlattariaqaripput. Tamakkulu pissutigalugit nakuusernermut periusissatut iliuusissatullu pilersaarummik 2017-ip kingorna atorneqalersussamik ineriartortitsinermik aallartitsisimavunga, taamaalinerani Naalakkersuisut massakkut Nakuusernermut Periusissatut Iliuusissatullu Pilersaarutaat naasussaammat" Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq oqarpoq.



Annertunersumik paasisaqarusuttut Naalakkersuisup allattaa Nina Jul Larsen oqarasuaat 539371 aqqutigalugu attavigisinnaavaat.



Paasissutissarsiffiit:
Meeqqat Kalaallit Nunaanni – meeqqat 0-iniit 14-inut ukiullit ilaqutariillu atugarissaarnerannik misissuineq, SFI, 2008.
Innuttaasunik misissuineq 2005-2010, Statens Institut for Folkesundhed, 2010.
Inuusuttuuneq ilungersunartoq, Kalaallit Nunaanni inuusuttut atugarissaarnerat 2011 – meeqqat atuarfianni atuartunik angajullernik misissuineq, Statens Institut for Folkesundhed, 2012