Naalakkersuisoq Erik Jensen KANUKOKA´p isumasioqatigiisitsineranut peqataavoq

Naalakkersuisoq Erik Jensen KANUKOKA´p isumasioqatigiisitsineranut 8. aamma 9. september 2017-imi Qaqortumi ingerlanneqartumi peqataavoq

Naalakkersuisoq Erik Jensen-ip aqutsinermut inatsisissatut siunnersuut nutaaq pillugu ilisimatitsivoq, tamanna Inatsisartut 2017-imi ukiakkut ataatsimiinneranni saqqummiunneqassaaq. Siunnersuutip atuutilerneratigut nunaqarfinni aqutsisut piginnaanngorsassapput aammalu nuna tamakkerlugu sumiiffinnut ataatsimiititaliat pilersinneqassallutik.
Siunnersuutip inuit tamat oqartussaaqataanerata nukittunerulersinneqarnissaanik kissaateqarnermut aammalu kommunit nunatsinni innuttaasunik eqaannerusumik pitsaanerusumillu kiffartuussinissaannik kissaateqarnermut takussutissaavoq.
Naalakkersuisoq Erik Jensen oqarpoq: ”Kommunivut Naalakkersuisunut pingaarnertut suleqataapput. Kommunit ingerlalluartut inuiaqatigiinnut najukkatsinnut pingaaruteqarluinnarput, aammalu kommunit akunnerminni suleqatigiinnermik ingerlalluartumik ataatsimoorlutillu isumaqatiginninniarsinnaanermik pilersitsinissaat pingaaruteqarpoq. Taamaattumik neriuutigivara, ataatsimoorfiusumik nukittuumillu kommunit aqqutissaminnik ataatsimoorlutik siuariarfissaminnik nassaarumaartut.”

Annertunerusumik paasissutissanik piniarnermi Naalakkersuisup allattaa Thora H. Nielsen attaveqarfigineqarsinnaavoq emailikkut: thni@nanoq.gl imaluunniit oqarasuaat toqqaannartoq 34 52 58.