Aalisarneq pillugu inatsisissatut siunnersuummut isummersorsinnaanngilanga

Allattoq: Aalisarnermut Piniarnermullu Naalakkersuiosoqarfimmi pisortaaneq, Jørgen Isak Olsen

KNR.gl-mi tusagassiortup tallimanngornermi septembarip 8-anni allaaserisamut kusananngilluinnartumut allaaserisaqannginnermini minnerpaamik aperisimasussaagaluarpaanga aalisarnermut inatsimmut akerliusunut ilumut tapersersuisuunerlunga. Aamma aalisarnermut inatsisissaq pillugu aggusti naalersoq ataatsimeersuartunut peqataanngilanga.

Radioaviisip aaqqissuisoqarfia KNR-imiluunniit nutaarsiassaqartitsiviit maannakkut uannut suli saaffiginninngillat aalisarnermut inatsisissamut akerliusunut tapersersuisuunera ilumoornersoq ilumuunnginnersorluunniit uppernarsarniarlugu.

Aamma pingaaruteqarpoq oqaatigissallugu radioavisit ikinnerpaamik maannamut sisamat saqqummiunneqareersimammata.

Pissutissaqavippoq radioavisip tallimanngornermi septembarip 8-anni ilanngutassiaanut isornartorsiuissalluni.

KNR.gl ilaatigut allappoq: “Aalisarnermut inatsisissaq pillugu tallimanngormat isumasioqatigiittoqarmat naalakkersuisoqarfimmi pisortaq Jørgen Isak Olsen oqarsimaneragaavoq inatsisissamut siunnersuummut akerliusut isumaqatigalugit.” (Qallunaatuaani allassimalluni aggusti naalersoq ataatsimiittoqarmat.) Sorleq ilumuussava?

Nutaarsiassaqartitsivillu nangilluni ima allappoq: “Taamaattuminguna ataatsimiititaliap Naalakkersuisoq ataatsimeeqatiserisimagaa. Ataatsimiititaliaq isumaqarpoq naalakkersuisoqarfimmi pisortap Naalakkersuisup politikkikkut siunniussanut toqqaannartumik akerliusumik iliortariaqanngitsoq.”

Matumuuna erseqqissaassutigilluinnarusuppara ataatsimilluunniit aalisarnermut inatsisissaq pillugu ajortumik iluarinnittumilluunniit oqaatigisimannginnakku, ingattamik aalisarnermut inatsisissamut akerliusunut tapersersuisimananga.
Atorfilittatut suliat ataasiakkaat pillugit nammineerlunga isummersorfigisussaanngilakka, suliarineqartut aamma kinaassusersiunngitsumik suliarisussaavakka, soorlu matumani aalisarnermut inatsisissaq pineqartillugu.
Assuarilluinnarpara nunatsinni tusagassiorfiit pingaarnersaata tusagassiortuisa ilaataa allassinnaammagu uangagooq aalisarnermut inatsimmut akerliusunut tapersersuisuugunartunga. Ila kinamita tunngavissaqanngitsumik taama oqarsimasoq.

Tusagassiortoq allassinnaaguni akerliusunut qaammatip siuliani tapersersuisuunerarlunga, taava allalinnginnermini aperisimasariaqaraluarpoq ilumut taamaattoqarnersoq.

KNR nittartakkamini kialluunniit atuarsinnaasaani aallakaatitassiortarnerminut ileqqorissaarnissaq pillugu ajunngilluinnartumik malittarisassaqarpoq. Tassani ima qulequtalimmi naapertuilluartuliornermi ilaatigut ima allassimasoqarpoq: Isornartorsiuinerit saassussinerillu akerlilerneqarsimasariaqarput, taamaattumillu aallaavittut akissutit ataqatigiissinneqarsimasariaqarlutillu assinganik isigineqartariaqarput.
Tamatumunnga tunngasumik saaffigineqanngilanga.

Paasissutissat kikkunnulluunniit ajoqusiisinnaasut, kanngunarsaasinnaasut narrujuummisitsisinnaasulluunniit avammut saqqummiunneqannginnerini, siullertut pineqartumut saqqummiunneqarnerisigut misilinneqaqqaartariaqarput.

Tamatumunnga tunngasumik saaffigineqanngilanga.

Imalu qulequtalimi suliffiup avataatigut eqqissilluni inuunermi erseqqissaassutigineqarpoq, allassimasoqarpoq: Inuit ataasiakkaat pillugit tusaamasat (tusatsiakkat) KNR-imi atorfillit mianersuuttassavaat. Tusaamasat (tusatsiakkat) aatsaat tamanit tusaamaneqarpata, siullertut tusaamasap (tusatsiakkap) ilumuussusia ilumuunngissusialuunniit uppernarsiniarlugu, inuup pineqartup saaffigeqqaarneratigut annerusumik iliuuseqarfigissanerlugu aaqqissuisoqarfimmiut eqqarsaatigisinnaavaat. Aappaattut tusaamasaq (tusatsiagaq) ilumoornersoq paasiumallugu pisortaqarfiit pineqartut paasiniaaffigineqarsinnaapput.

Nutaarsiassaqartitsiviup aaqqissuisoqarfiata tamanna pillugu saaffigisimanngilaanga.

KNR pinngitsoorani uannut tunngasumik naqqiissuteqartariaqarpoq, KNR-ip aallakaatitassiortarnerminut ileqqoreqqussaani ima qulequtalimmi kukkunerit, allassimasoqarmat: Inunnut ataasiakkaanut suliffeqarfinnulluunniit akornusiisinnaasunik paasissutissanik ilumuunngitsunik KNR saqqummiussisimappat, tusagassiut paasissutissanik ilumuunngitsunik saqqummiussivigineqarsimasoq aqqutigalugu kukkuneq piaartumik naqqiuteqarfigineqassaaq. Naqqiuteqarnissaq qaninnertut pisortarisamit akuerineqarsimassaaq.

Ataatsimiititaliaq nal. 19.30 ataatsimiippoq

Ilanngullugu saqqummiunneqarpoq Aalisarnermut Piniarnermullu Naalakkersuisoq Karl-Kristian Kruse Inatsisartut Aalisarnermut, Piniarnermut Nunalerinermullu Ataatsimiititaata siunnersiuinissaminik aggersaaneranut takkutinngitsoortoq. Eqqortoq unaavoq ataatsimiititamit allakkatigut aggersaaneq tallimanut qiteqquteqqammilaartoq Naalakkersuisoqarfiup mailianut takkummat, aggersaanerlu nalunaaqutaq tallimanut pisussanngorlugu saqqummiunneqartoq. Tupinnanngitsumik Naalakkersuisoq piffissap taassuma iluani takkussinnaasimanngilaq. Pissarsiariniarnera iluatsinngimmat allamik suliaqarnerata nalaani tamanna pimmat. Isumaqatigiittoqarneratigulli siunnersiuinissamik aggersaaneq unnukkut arfineq pingasut qeqqanut nuunneqarpoq.

Attavigineqarsinnaavoq Aalisarnermut Piniarnermullu Naalakkersuisoqarfimmi pisortaaneq, Jørgen Isak Olsen. Mail: jio@nanoq.gl