Nunat Avannarliit Killiit ukiumoortumik ataatsimiinnerat

Nunat Avannarliit Killiit ukiumoortumik ataatsimiinnerat, taamatullu nunat avannarliit killiit nunanut allanut ministeriisa ataatsimiinnerat

Nunat Avannarliit Killiit Siunnersuisoqatigiivisa ukiumoortumik ataatsimiinnerat augustip 31-anni septemberillu aallaqqaataani 2017 Islandip Inatsisartuini Altingimi Reykjavikimiittumi ingerlanneqarpoq.

Ataatsimiinnermi Kommuninut, Isorliunerusunut, Attaveqaqatigiinnermut Ineqarnermullu Naalakkersuisoq Erik Jensen Namminiilivinnermut, Nunanut Allanut Nunalerinermullu Naalakkersuisoq taarserlugu peqataavoq. Taassuma saniatigut Savalimmiut nunanut allanut Naalakkersuisuat, Poul Michelsen aamma Islandip nunanut allanut ministeriat, Guðlaugur Þór Þórðarson peqataapput.

Ataatsimiinnermi qulequtarineqarpoq ”Nunat Avannarliit Killiit Issittumi
nukittooq”. Siunnersuisoqatigiip innersuussutigivaa nunani avannarlerni killerni naalakkersuisut apeqqutit issittumut tunngassuteqartunut qaninnerusumik suleqatigiinnissaat.

Tassungalu tunngatillugu Savalimmiuni nunanut allanut Naalakkersuisoq aamma Islandip nunanut allanut Ministeriat oqalugiarput oqallinnermik malitseqartinneqartumik.

Ministerit tamarmik oqalugiarnerminni nunat avannarliit killiit siunissami Issittumi nunap inissisimanera atorluaasinnaasoqarsinnaanera, taamatullu issittoq pillugu apeqqutini suleqatigiinnerup sutigut nukittorsarneqarsinnaanerat saqqummiuppaat.

Naalakkersuisup oqalugiarnermini ersarissarpaa nunat taakku pingasut issittumi oqallinnermi sunniuteqarsinnaaneq maannamut periarfissat pioreersut atorlugit pisinnaasoq. Oqariartuutigaalu Kalaallit Nunaat sunniuteqarsinnaaffigisai tassaasut Nunani Issittuni Siunnersuisooqatigiinni peqataasarneratigut, Nunat Avannarliit Ministeriisa Siunnersuisoqatigiiviani aammalu Nunat Avannarliit Siunnersuisooqatigiivianni oqallinnerni sunniuteqaqataanikkut peqataanikkullu pisinnaasoq.

Nunat avannarliit killiit ministeriisa augustip 31-anni 2017 ataatsimiinnerat

Nunat Avannarliit Killiit Siunnersuisooqatigiivisa ukiumoortumik ataatsimeereernerup kingorna Nunat Avannarliit Killiit nunanut allanut ministerii pingasuusut ukiumoortumik ataatsimeeqatigiipput. Tamanna nunat avannarliit killiit nunanut allanut ministeriisa augustip 22-anni 2016 ataatsimiinneranut nanginneruvoq, aalajangiunneqarnikuummat ministerit ukiumut ataasiarlutik ataatsimiittarnissaat. Nunanut allanut politikki pillugu taamatullu ataatsimut soqutigisat eqqartueqatigiissutigineqartassallutik.

Ataatsimiinnermi ilaatigut Tuluit Nunaata EU-mit aninera (Brexit), nunarsuarmioqatigiinni killilersugaanngitsumik niueqateqarnissamut isumaqatigiissutit taamatullu nunani avannarlerni killerni niuerneq eqqartorneqarput.

Suleqatigiissutissatut atsiorneqartumi nunat avannarliit killiit atorfilittatigoortumik suleqatigiissitaliortoqarnissaat siunertaralugu pilersitsisoqassasoq isumaqatigiissutigineqarpoq. Taakkua niueqatigiinnerup annertusarnissaa periarfissaata annertusarneqarnissaata ilusilersorneqarnissaa, taamatullu soqutigisani ataatsimoorunneqartuni assigiinngitsuni suleqatigiinnerup nukittorsarneqarnissaat suliassarissallugit. Taakku saniatigut Nunat Avannarliit Killiit nunanut allanut ministeriisa ukiumut ataasiarlutik, sapinngisamik nunat avannarliit killiit siunnersuisooqatigiivisa ataatsimiinnerat iluatsillugu ataatsimiittarnissaat isumaqatigiissutip imarivaa.

Nunanut avannarliit killiit nunanut allanut ministeriisa tulliani ataatsimiinnissaat aappaagu Nuummi pinissaa pilersaarutigineqarpoq.

Suleqatigiinnissamut isumaqatigiissut (tuluttut)

 

Annertunerusumik paasisaqarusukkussi uku attavigisinnaavasi Jacob Isbosethsen, jsis@nanoq.gl Oqarasuaat: +45 40402623 /Monika Paulli Andersen mopa@nanoq.gl / Oqarasuaat: +299 553320 / +45 51640373