Nersutit qaasuttut neqaat qalatsilluaqqaartakkit – trikineqarsinnaammata!

Nannup, aarrup, puisip allallu nersutit qaasuttut neqaat qalatsilluaqqaartassavatit, neqip qalatsilluarneqarsimasup trikinii inunnut tuniluussinnaaneri tamatumuuna pinaveersaartinneqarsinnaammata.

Neqi sakkukinnerpaamik 75 celsius gradinut qalatsittassavat.

Neqi qalatsilluarneqarsimasoq trikininik tuniluussinnaasunik aarlerinartuerutissaaq. Neqi qalatsilluarneqarsimasoq sialluarneqarsimasorlu qasertumik imaluunniit qasertumik, kajortumik qalipaateqartarpoq.

Nannut aarillu neqaat tunisassiatut tunitinnagit imaluunniit tunissutigitinnagit trikineqarnersut septembarip aallaqqaataanit 2017-imi nakkutigineqarunnaassapput,
trikininik pinngitsaaliilluni nakkutilliisussaatitaaneq pillugu nalunaarut marsip 14-ianni 1966-imeersoq atorunnaassammat.

Trikini pillugu nalunaarutip atorunnaartussanngornera toqqammavigaa, nunatsinni neqinik trikineqarsinnaasunik ullutsinni misissueriaatsit naammakkunnaarsimanera.

Trikininik misissuisarnerup takutippaa, nalileruminaatsinneqarlunilu neqit misissorneqartut trikineqarnersut trikineqannginnersulluunniit. Taamaattumik trikininik misissuineq atuisunut toqqissisimassutigineqarneq ajorpoq.

Taamaattumik Kalaallit Nunaanni Uumasunut Nakorsaqarfik Inuussutissalerinermullu Oqartussaaffik, Peqqissutsimut Naalakkersuisoqarfik Nunatsinnilu Nakorsaaneqarfik inassuteqarput, nannup, aarrup, puisit nersutillu allat qaasuttut neqaat tunngavimmikkut trikininik tunillannartoqartutut pineqartariaqartut.

Trikinip quperlui neqi qeritinneqaraluarluni panertinneqaraluarluniluunniit toquneq ajorput, quperlut nillertumut silaannarmullu panertumut naleqqussarsimasuugamik. Taamaattumik qularnaavillugu trikininik tunillatsittoqassanngippat neqi uunneqassaaq, qalatsilluarneqarluni imaluunniit sialluarneqarneqarluni.

 

Inussiarnersumik inuulluaqqusilluta

Kalaallit Nunaanni Uumasunut Nakorsaqarfik Inuussutissalerinermullu Oqartussaaffik, Peqqissutsimut Naalakkersuisoqarfik aamma Nunatsinni Nakorsaaneqarfik

 

Apeqqutissaqaruit uunga saaffiginnissaatit:
Kalaallit Nunaanni Uumasunut Nakorsaqarfik Inuussutissalerinermullu Oqartussaaffik
Imaneq 1A 701
3900 Nuuk
Email-adresse: uumasut@nanoq.gl
Telefonnr.: 34 50 00